Escolares

8 M.:Nin as borrascas poden coas mulleres!

Tagged:  

Aínda que choveu, nevou e ventou, no colexio celebramos, e por todo o alto, o día internacional da Muller Traballadora.

Tiñamos preparada unha merendaina (merenda máis andaina) e houbo que cambiar por unha merenteca (merenda máis discoteca) que fixemos no pavillón do colexio.

Lemos un manifesto, bailamos e xogamos en igualdade, merendamos dun xeito saudable... e reivindicamos o dereito da metade da poboación mundial a ser tratadas dignamente, en igualdade e en ausencia total de discriminación.

8 de Marzo: Marcha pola Igualdade

Tagged:  

O vindeiro 8 de Marzo faremos unha nova edición da nosa marcha pola igualdade.

Percorreremos parte do casco urbano do Barco coas nosas camisetas estampadas por nós mesmos, e coma un remuíño de bolboretas lilas, asolagaremos a vila de mensaxes pola igualdade.

Ao remate da nosa andaina faremos unha merenda saudable na Praza Maior.

Así que marcha+merenda=merendaina!!!

Unídevos a nós nesta MERENDAINA reivindicativa para acadar un mundo máis xusto, igualitario e solidario.

Tamén fixemos este novo podcast coa intervención e as investigacións do alumnado de 4º de primaria

Mulleres Galegas na Ciencia

Tagged:  

Este ano comezamos a celebrar o día da muller na ciencia con varias actividades:

  1. un programa de radio,
  2. unha exposición realizada polo noso alumnado coa biografía e achádegos de varias mulleres científicas que teñen deixado a súa pegada na historia,
  3. unha publicación dixital con estes traballos de investigación do alumnado
  4. e por último, e para pechar esta semana de conmemoración e de reivindicación do papel da muller no avance científico, teremos unha xornada de experimentos no que as rapazas do noso colexio han demostrar a súa competencia no ámbito STEM.

Podedes ver aquí a exposición virtual coas nosas investigacións sobre as mulleres galegas (aínda que tamén hai algunhas de fóra) que teñen destacado ou que foron pioneiras dentro do ámbito científico.

Así mesmo podedes escoitar este noso podcast realizado polo alumnado de 4º de primaria e Alexis e Manuel de 5ºB.

Por último deixámovos aquí unha pequena reportaxe gráfica da nosa xornada científica, cos experimentos que realizamos no patio do colexio.

Nós Tamén Creamos

Tagged:  

Este ano, dentro das iniciativas que sempre estamos a desenvolver para mellorar a calidade da educación que prestamos ao noso alumnado, un nutrido grupo de mestras e mestres do Ceip Condesa de Fenosa puxémonos como obxectivo desenvolver un traballo de gravación dun produto audiovisual no que @s nos@s alumn@s puidesen ceibar os seus impulsos creativos e aprender os requisitos técnicos que unha obra deste tipo require.

Para iso entramos no concurso de NÓS TAMÉN CREAMOS, no que se pide a cada centro participante a creación dunha ou varias curtametraxes de animación empregando a técnica do stopmotion, adaptando libremente un ou varios contos dunha escolma proposta pola organización do certame.

Este concurso leva aparellado un importante labor de formación do profesorado ao través dun curso de PLATEGA e máis coa creación dun grupo de traballo que, coma vedes, esta dando os seus primeiros pasos.

Todo isto facémolo dende a nosa aula do POLO CREATIVO Plus, un espazo educativo, innovador enfocado ás aprendizaxes colaborativas, conxuntas, e co obxectivo de integrar os retos tecnolóxicos en todos os campos do saber.

E a cousa comeza a dar os seus froitos, como mostra esta reportaxe fotográfica destes grandes pequenos creadores audiovisuais: @s nos@s alumn@s.

 

Achégase o día da Paz

Tagged:  

Tal e como sinalamos no titular desta entrada, achégase o Día da Paz, nun ano no que esta celebración escolar é máis importante ca nunca.

A guerra en Palestina, onde o estado de Israel, incumplindo todas as normas internacionais está realizando unha atroz destrución sistemática da franxa de Gaza, afectando a millóns de persoas, máis da metade deles nenas e nenos, así o esixe.

Somos conscientes de que esta nova espiral de violencia foi xerada por un acto terrorista verdadeiramente execrable, pero iso non dá dereito a ningún estado ao ataque indiscriminado da poboación civil, de hospitais, escolas e campos de refuxiados tal e como se está producindo.

Dende o noso colexio toda a nosa comunidade escolar vai reclamar a RESOLUCIÓN PACÍFICA DOS CONFLITOS, o DIÁLOGO e o cumprimento dos ACORDOS INTERNACIONAIS. Palestina debe vivir, as nenas e nenos palestinos teñen dereito a un futuro en paz.

O noso primeiro xesto pola Paz é este pequeno vídeo de animación que acaban de facer os nenos e nenas de primeiro A. Desfrutádeo!!

O Apalpador anuncia xa o Nadal!!

Tagged:  

Coma todos os anos o Apalpador baixou das súas montañas do Courel e veu ata o  colexio para saber se as barriguiñas das nenas e dos nenos están ben cheas.

Tróuxonos unha chea de castañas e de regalos e falounos da súa vida nos montes, facendo carbón.

Se en Vigo acenden as luces para anunciar o Nadal, nós, no Condesa de Fenosa, anunciámolo moito mellor coa visita do Apalpador.

Polo San Martiño, MAGOSTO e peóns ao Camiño

Tagged:  

Coma todos os anos, as castañas, o magosto, as caras tisnadas pola feluxe, as castañas amosegadas e aqueloutras que non e que estouran para risa de tod@s, e ao tempo o baile das buxainas (lembrade... polo San Martiño Peóns ao camiño) volven ao noso colexio.

E como dice a canción, Se chove... deixa chovere! aos galegos non nos asustan unhas cantas pinga. E se hai que facer o magosto, faise!!

Festival do 50 Aniversario

Tagged:  

Copia de programa 50 aniversario 1 de Carmela García Fernández

Cumprimos 50 anos

Tagged:  

Como xa moit@s saberedes este curso escolar é o número 50 dende a creación da Concentración Escolar, que traía ao alumnado das escolas unitarias das aldeas da contorna a estudar na cabeceira  do concello.

Co paso dos anos este centro foise convertindo no colexio que hoxe tod@s coñecemos, o Ceip Condesa de Fenosa.

Para celebralo temos unha serie de actos nos vindeiros días que iremos compartindo convosco a través de distintos medios, pero queremos comezar cunha escolma da nosa memoria fotográfica recollida entre membros actuais e pasados da nosa comunidade escolar.

Desfrutade deste paseo polo pasado do colexio, que a fin de contas é o pasado de todos e todas nós.

Distribuir contido