Inicio

Blogue

Buzón de Suxestións

Ola amig@s:

Invitámovos a mandarnos dende este formulario calquera comentario que nos queirades facer para mellorar o noso servizo de biblioteca escolar.

Podes mandar as túas queixas, se algo do que estamos a facer non che gusta ou pensas que está mal organizado.

Podes enviarnos as túas suxestións, cousas que non facemos e que pensas que poden ser un recurso interesante para a biblioteca.

Tamén nos podes enviar aqueles recoñecementos que queiras, as actividades, recursos ou iniciativas que pensas que son importantes manter para dar un servizo de biblioteca de calidade.

En fin, que estaremos moi atent@s ás vosas impresións e tentaremos así facer a mellor biblioteca posible.

Final do campionato de Xadrez

Posted Maio 30th, 2024 by quinif

Hoxe xogamos a final do campionato de Xadrez que organizou a Biblio do cole, enfrontado a Pedro de 4º contra Yordi de 5º.

Levaban xa catro partidas gañadas cada un, contra compañeir@s moi ben preparados, pero foron quen de ir vencendo en todos os emparellamentos que lles tocaron.

Finalmente tiveron este enfrontamento, do que resultou gañador Yordi de 5º curso.

Noraboa a tod@s @s participantes, e sen dúbida están deixando un ronsel de xogadores nos tempos de lecer na biblio que dá gusto velos!

 

As Dinochilas vanse de paseo

Posted Febreiro 29th, 2024 by quinif

DINOCHILAS:

 -Cada semana levo unha Dinochila á miña casa. Cada unha ten 5 contos, para que a miña familia me lea un conto cada noite.

 -Coas Dinochilas pretendemos achegar @s nen@s aos contos, espertando a súa paixón pola lectura, á vez que comparte coa súa familia un momento de tranquilidade antes de durmir. Aconséllase o diálogo sobre cada relato, así como asegurarnos de que o nen@ comprende o argumento, facéndolle preguntas relacionadas coa historia que acabamos de compartir.

 Tamén se poden realizar outros xogos como buscar un novo final ao conto, describir obxectos, conversar sobre as actitudes dos personaxes, describir algún personaxe ou debuxo,…

 Pero a finalidade sempre será o goce pola lectura, así como crear un hábito lector dende o primeiro ano de escolarización d@s nen@s.

 

 

 

 

O teu son vaime!

Posted Decembro 1st, 2023 by quinif

Mirade que fermoso vídeo realizado por centros de toda a xeografía da nosa fala (dende o norte de Portugal ata os territorios dos nosos irmáns do Bierzo), decindo algo que é a esencia do futuro do noso idioma: Arrecheguémonos para semos nós!

Podemos sentir todos os sotaques con que falamos ao longo do país, e aínda así comprobar como nos entendemos e podemos fundirnos neste canto xeral, harmonizando e acompasando os nosos sons.

E con Ghayoso fundíndose co seu micro!

M(P)adriñ@s Lectores

Posted Novembro 6th, 2023 by quinif

Un ano máis volven as lecturas ao patio de infantil coas nos@s voluntari@s, as nosas madriñas e os nosos padriños lectores.

Crear afeizón á lectura, desenvolver lazos de amizade e solidariedade entre o alumnado, xogar xuntos... son moitas das cousas que promove esta iniciativa dos apadriñamentos lectores.

Dentro de pouco botaremos tamén a andar o club de lectura dos adultos, que este ano van ler "Senlleiras" de Antía Yáñez, e neste mesmo lugar vos informaremos de como vai indo a cousa.

Entrementres, deixámovos unhas fotos dos nosos apadriñamentos lectores que enfeitan o patio de infantil.

DinoTerror

Posted Outubro 31st, 2023 by quinif

Onte á noitiña, quentando xa os ánimos para o Samaín, puidemos escoitar na Biblioteca do Condesa varios contos de terror.

Cunha boa afluencia de aterrorizad@s nen@s e nais e pais, os nosos contacontos nos regalaron unha presadiña de contos de terror que nos encantaron a tod@s e que nos animaron a ler estas historias nos fondos da Biblioteca.

Pois iso, nen@s, lede para pasar un terrorífico Samaín.

Ven e arrepíate no Samaín da Biblioteca

Posted Outubro 25th, 2023 by quinif

Xa o fixemos antes da pandemia, e arestora volve O CONTACONTOS MÁIS TERRORÍFICO.

Vén ao Samaín da biblioteca o vindeiro luns á noitiña, porque ás sete e media imos ter unha xornada de terror con monstros, bruxas, sacauntos e bestas varias...

Vén..... se te atreves!!!

Feira de proxectos

Posted Maio 16th, 2023 by quinif

A nosa árbore dos enca(o)ntos

Posted Abril 25th, 2023 by quinif

A nosa árbore de libros, símbolo do nosocompromiso coa lectura, xa é unha realidade.

E canda el temos os dous espazos lectores feitos con vimbios hai a penas un mes.

Durante toda esta semana, no tempo en que imos realizar os mercadiños de intercambio de libros, estarán no patio cuberto, na entrada peonil do colexio, lembrando a todos que os libros sempre estarán aí, facendo medrar en nós, igual que unha árbore, o coñecemento, a fantasía e o desfrute.

Día (mellor dito, semana) do libro

Posted Abril 21st, 2023 by quinif

Deixámovos aquí o cartel desta semana na que imos celebrar a festa dun invento que nos fai máis felices, máis sabios e, probablemente, mellores persoas.... o libro.

Comezaremos a semana realizando unha árbore, esta árbore dos enca(o)ntos que aparece no cartel, con libros expurgados da biblioteca.

Logo nos días sucesivos teremos 4 mercadiños de intercambio de libros, cos nosos dólares coa efixie de Francisco Fernández del Riego, autor ao que homenaxeamos merecidamente nas letras galegas deste ano 2023.

Desfrutade desta semana na honra do libro, e lembrade de coidar estas xoias da creación humana, pois como dixo Jorge Luis Borges:

De los diversos instrumentos del hombre, el más asombroso es, sin duda, el libro. Los demás son extensiones de su cuerpo. El microscopio, el telescopio, son extensiones de su vista; el teléfono es extensión de la voz; luego tenemos el arado y la espada, extensiones de su brazo. Pero el libro es otra cosa: el libro es una extensión de la memoria y de la imaginación.

Powered by Drupal - Design by artinet