Estudos Universitarios. Os estudos de Grao.

No Espazo Europeo de Educación Superior ( EEES) as ensinanzas universitarias oficiais están estruturadas en tres ciclos:

-Grao,

-Máster e

-Doutoramento.

Os estudos de Grao teñen como finalidade a obtención por parte do estudante dunha formación orientada á preparación para o exercicio profesional.

En xeral, teñen unha duración de 4 anos ou 240 créditos ECTS. Excepcionalmente, algúns Graos teñen unha duración superior, como Veterinaria, Odontoloxía e Farmacia (300 créditos ECTS) ou de Medicina (360 créditos ECTS).

O ECTS ou crédito europeo é a unidade de medida dos estudos. Equivale a 25/30 horas de traballo dedicadas a conseguir os obxectivos previstos no programa da titulación. Están recollidas neste cómputo as horas de clase, as de estudo, seminarios, preparación de avaliacións etc...

Os graos compóñense de materias: de formación básica, obrigatorias, optativas; así como prácticas externas e un traballo fin de grao.

O título oficial que se obtén ao superar estes estudos é o de Graduado/A.

Todos os graos adscríbense a algunha das ramas de coñecemento:

-Artes e Humanidades,

-Ciencias,

-Ciencias da Saúde,

-Ciencias Sociais e Xurídicas,

-Enxeñería e Arquitectura.