Blogue de admin

A programación de robots é unha das actividades que máis chaman a atención ao alumnado pois a tecnoloxía leva implícita motivación. Partindo desta premisa, esta semana iniciamos ao alumnado na lectura e interpretación de secuencias de programación cun interesantísimo kit de robots TRUE TRUE!

O alumnado de primaria atópase inmerso na exploración e aprendizaxe do funcionamento destes aparellos. Están resultando ser unha forma moi atractiva de achegar aos máis pequenos ao mundo da robótica e ademais, están poñendo a proba as súas habilidades de pensamento computacional, o que pode espertar neles capacidades, competencias e coñecementos que se afastan do estritamente curricular. Ademais resultan un xeito de aprender moi manipulativo e lúdico, que é o que máis nos gusta!!! Proximamente seguiremos vendo o que se lles ocorre facer con estes bechiños!

O alumnado da clase de 1º e 2º de Educación Primaria participou no VIII Concurso De Recitado Poético “Rosalía sempre viva” convocado pola casa-museo de Manuel María. Este concurso ten como finalidade a potenciación da expresión oral e a creatividade do alumnado a través do coñecemento e recitado da obra de Rosalía e de Manuel María.

Na primeira fase, que se levou a cabo no centro, resultaron gañadores Arón, David e Mía. Os tres seleccionados foron o pasado sábado 2 de marzo a Outeiro de Rei para participar na fase final. E aínda que a gañadora da fase final foi Daniela do CPI de Xanceda. Arón, David e Mía tamén o foron porque foron os protagonistas dunha xornada única na que brillaron con luz propia. Ademais tiveron a sorte de visitar a Casa Museo de Manuel María que é unha caixa de lembranzas tanto da súa persoa coma da súa obra. Puidemos ver os seus libros, as súas fotos, a súa maquina de escribir, unha colección de navallas...

Só nos queda agradecer a Arón, David e Mía e as súas familias a súa total colaboración para que a xornada decorrese con tanto éxito e que os/nos acompañaran con tanto agarimo, así como polo trato que nos dispensaron Antón e todas as persoas da casa-museo do poeta.

Que paren as rotativas! o novo xornal "MINIREPORTEIROS DO NOSO" está en marcha, e os nosos xornalistas non paran de escribir artigos contándonos cousas sobre as novidades, acontecementos e celebracións da nosa escola e da contorna. Con motivo da Semana da Prensa, o alumnado está aprendendo moitas cousas sobre as noticias en soporte físico e dixital, e coa intención de recuperar neles o interese por este último, decidimos comezar a crear o noso propio xornal/revista, que esperemos podamos desfrutar todos proximamente.

PRAZO DE PRESENTACIÓN: Do 1 ao 20 de marzo de 2024, ámbolos dous incluídos para todo o alumnado que se matricula por primeira vez no sistema educativo, así como para aqueles alumnos/as que desexen cambiar de centro escolar sempre que existan prazas vacantes.

DOCUMENTACIÓN A PRESENTAR:

-Solicitude Modelo ED550B-G asinado obrigatoriamente polos dous proxenitores.

-Documento acreditativo do requisito de idade do alumno/a (fotocopia do libro de familia ou fotocopia do DNI do alumno/a).

-Certificado oficial do expediente académico (alumnado de primaria).

-Sentenza xudicial de separación ou divorcio e/ou convenio regulador onde conste a custodia do menor, de darse o caso.

-Para acreditar o criterio  "Familia monoparental" deberá presentarse a certificación de recoñecemento da Dirección Xeral de Familia, Infancia e Dinamización Demográfica da Consellería de Política Social e Xuventude da Xunta de Galicia ou da autoridade competente doutras administracións públicas. 

LUGAR DE PRESENTACIÓN:

O 26 de febreiro celebramos o aniversario de Rosalía de Castro, escritora ilustre da nosa cultura galega, á que homenaxeamos con orgullo como muller valente, loitadora e icona da nosa tradición. Moitos dos seus poemas, ben coñecidos polos galegos e galegas, fan apoloxía á beleza da nosa terra, da nosa lingua e das nosas costumes.

Para recordala, este curso quixemos facer algo distinto en conxunto todo o centro. Os días anteriores a esta data, aprendemos a facer papel reciclado, como símbolo do amor que ela tiña pola natureza e os nosos bosques. Cada alumno fixo unha folla de papel, e logo unha rosa de papel vermella en homenaxe ao seu nome. Logo, nesas follas, escribimos anacos das súas verbas, e con todo iso, e aproveitando unha preciosa ilustración que nos fixo a artista Tania Solla, creamos un mural na entrada do centro.

Que vos parece o resultado? Nos estamos moi orgullosos/as do noso traballo, tanto como de ser herdeiros/as de Rosalía.