IES A SANGRIÑA

O APALPADOR - III Concurso de Debuxo de Nadal

Lun, 18/12/2023 - 09:46 — IES A Sangriña

Concurso de debuxo de nadal o apalpador ies a sangriña

O Equipo de Dinamización da Lingua Galega quere que, un ano máis, o alumnado da Sangriña celebre o Nadal da maneira máis artística. Para iso, convocamos un concurso para que debuxedes ao Apalpador ou á Apalpadora, personaxes protagonistas do Nadal galego.

O premio consistirá nun vale de 30€ en material de debuxo, libros ou material escolar.

Os orixinais deberán enviarse por correo electrónico, antes do 12 de xaneiro, a asangrinha.edlg@gmail.com

O EDLG promove o cinema en galego

Sáb, 16/12/2023 - 21:28 — IES A Sangriña

Cinema en galego

O Equipo de Dinamización da Lingua Galega do IES A Sangriña está a levar a cabo unha campaña de promoción de filmes aos que o alumnado pode acceder no noso idioma en diferentes plataformas como Netflix, Amazon Prime, RTVE Play, Filmin ou a propia web da TVG.

Os filmes están a ser divulgados cun grande mural ubicado no vestíbulo do centro onde se penduran carteis de elaboración propia que inclúen unha imaxe da película e unha breve sinopse. Ademais, estes mesmos materiais están a ser difundidos diariamente nas redes sociais do EDLG (tedes a ligazón ao Instagram nunha icona na marxe dereita desta web).

Boa parte dos contidos poden localizarse tamén na web https://pipocas.amesa.gal da Mesa pola Normalización Lingüística, repositorio que vos convidamos a visitar.

O IES A Sangriña participará no programa EduMob

Mar, 12/12/2023 - 15:13 — IES A Sangriña

edumob

Tras a publicación definitiva dos resultados da selección de centros para a participación no programa EduMob, no IES A Sangriña podemos manifestar con orgullo que non simplemente fomos seleccionados, senón que o noso proxecto foi o que obtivo unha valoración máis alta de entre todos os presentados polos centros públicos de ensino non universitario da Comunidade Autónoma de Galicia que se candidataron.

EduMob é un programa de intercambio individual de alumnado en réxime de reciprocidade con alumnado matriculado en centros pertencentes á Région Académique de Grand Est (Francia) para o curso 2023/2024 que, ademais de facilitar administrativamente a mobilidade internacionals dos nosos estudantes, pode chegar a sufragar boa parte dos gastos ocasionados por este tipo de actividade.

Actividades do Equipo de Dinamización da Lingua Galega

Sáb, 09/12/2023 - 20:46 — IES A Sangriña

Actividades EDLG novembro 2023

Compartimos con vós algunhas fotografías das diferentes actividades organizadas durante o último mes polo Equipo de Dinamización da Lingua Galega e o Departamento de Lingua Galega.

Luís "O Caruncho" impartiu no noso centro un fantástico Obradoiro de Regueifa, no que participou o alumnado de 2º de ESO. Entregáronse os premios do III Certame de contos de misterio e terror. QUEN DIXO MEDO!!! e o alumnado celebrou o magosto cunha xornada lúdica onde ademais de comer as castañas que tan ben nos preparou o alumnado do ciclo de Mantemento de Vehículos todos e todas gozaron de practicar unha grande variedade de xogos populares.

MOI IMPORTANTE. Cambio de sentido na ruta de transporte escolar A Pasaxe-Porto a partir do 11 de decembro.

Mar, 05/12/2023 - 12:44 — IES A Sangriña

transporte escolar

Con motivo das obras iniciadas na rúa Coruña, a ruta de transporte escolar A Pasaxe-Porto CAMBIA O SEU SENTIDO. A partir do 11 DE DECEMBRO a primeria parada da ruta será PORTO (saída ás 7.45 minutos) e a última parada será A PASAXE.

A Dirección.

O 24N vestimos de negro contra a violencia machista!

Xov, 23/11/2023 - 08:05 — IES A Sangriña

25n

Programación xeral anual

Lun, 20/11/2023 - 19:48 — IES A Sangriña

PXA SANGRIÑA

No adxunto pódese consultar e descargar a Programación Xeral Anual (PXA) do IES A Sangriña, aprobada polo Claustro do profesorado e polo Consello Escolar para o curso 2023 - 2024.

A PXA é o documento no que se concreta a planificación das actividades do centro para o curso escolar. A PXA é un instrumento que ten como finalidade que todas as estruturas e todos equipos de coordinación docente do instituto funcionen de maneira coordinada e colaborativa cos diferentes sectores da comunidade educativa. Ademais, este documento define os e as responsábeis de que as tarefas e as actividades acordadas se realicen de maneira que permitan conseguir os obxectivos do centro.

1 adxunto

PROGRAMA YAM

Mér, 15/11/2023 - 12:32 — IES A Sangriña

Yam

O IES A SANGRIÑA foi seleccionado pola Consellería de Cultura, Educación, Formación Profesional e Universidades para ser membro da rede galega de centros que desenvolverán o PROGRAMA DE PREVENCIÓN DO SUICIDIO NA MOCIDADE 2023-2028, COFINANCIADO POLA UNIÓN EUROPEA

O programa consiste en intervencións profesionais nos centros para a posta en marcha do programa de prevención do suicidio Youth Aware ofMental Health (YAM), o cal está centrado na creación de grupos de discusión entre alumnado de 3º da ESO. Os grupos estarán monitorizados por orientadores e profesionais da saúde mental do Sergas (psiquiatras, traballadore/as sociais, psicólogos/as) e estarán orientados cara a desenvolver estratexias para a resolución de conflitos que asemade reforzarán estratexias preventivas de comportamentos suicidas. Os grupos desenvolverán a súa actividade en horario lectivo logo de seren os pais/nais informados/as en reunións informativas que se convocarán no centro a tal efecto.

Máis info en : https://www.sergas.es/Asistencia-sanitaria/YAM?idioma=es e nos arquivos anexos

2 adxuntos

Plan dixital

Lun, 13/11/2023 - 23:38 — IES A Sangriña

Na ligazón que aparece abaixo pódese consultar o Plan dixital do IES A Sangriña, cuxa actualización foi aprobada no Consello Escolar con data de 13-11-2023.

O Plan dixital de centro é un documento a través do cal os centros analizan a súa realidade en relación ao uso das tecnoloxías dixitais e, a partir desta situación de partida, definen un plan de actuación que incluirá os obxectivos a conseguir, as actuacións específicas para implementar este plan, a súa avaliación e difusión. O obxectivo final da posta en marcha do Plan dixital é mellorar o desenvolvemento da competencia dixital do alumnado e o uso das tecnoloxías dixitais na aprendizaxe a través do desenvolvemento da competencia dixital do profesorado -tanto individual como colexiada- e da transformación dos centros en organizacións educativas dixitalmente competentes.

Plan dixital

RESERVA UN ARMARIO PARA A TÚA MOCHILA

Lun, 13/11/2023 - 20:25 — IES A Sangriña

Armarios

ALUMNADO PREFERENTE

En primeiro lugar, os armarios serán asignados a aqueles alumnos e alumnas que acheguen un informe médico que xustifique unha especial prioridade para o uso deste tipo de recurso. O formulario de solicitude estará ao dispor do alumnado en conserxería e será entregado en xefatura de estudos, xunto co informe médico.

REPARTO DO RESTO DOS ARMARIOS

Se existise unha oferta de armarios superior á demanda medicamente xustificada, os restantes asignaranse ao alumnado de 1º de ESO, organizándose o reparto entre os e as estudantes interesados de menor a maior idade.

DATA LÍMITE DE ENTREGA DE SOLICITUDES

27 de novembro de 2023.