Skip to Content

Co galego a ciencia aínda me leva lonxe

Co galego a ciencia aínda me leva lonxe

Esta actividade está integrada nun proxecto maior chamado O galego lévame lonxe e consiste en que profesores de diferentes departamentos utilizan materiais en portugués nunha das súas unidades didácticas. Desta maneira, preténdese que o alumnado que non frecuenta a materia de Lingua Portuguesa se torne consciente da vantaxe competitiva de falar galego e da utilidade da súa variante internacional no ámbito científico.

O galego lévame lonxe realízase no ámbito dos plans PROXECTA +, dentro da temática Promoción do Patrimonio e da Lingua Galega e ligado ao Programa de Proxectos de innovación en dinamización lingüística.

Datas para as recuperacións de materias pendentes – ESO

Exames de pendentes ESO IES A SANGRIÑA

Publicamos a continuación as datas entre as que deben encadrarse as probas oficiais de pendentes da Educación Secudaria Obrigatoria no IES A Sangriña. En consecuencia, o profesorado coordinará co alumnado que teña que facer os exames de recuperación a súa realización nos días asignados, pasando a ter esta prevalencia sobre o resto de actividades do centro.

Datas para a calendarización dos exames de recuperación:

  • Luns 6 de maio.
  • Martes 7 de maio.
  • Mércores 8 de maio.
  • Xoves 9 de maio.

Deseñando unha mellor Educación Sexual

Educación Sexual IES A SANGRIÑA

Esta semana, os diferentes grupos de 1º de ESO e de 1º de Bacharelato, realizarán candanseu obradoiro de educación sexual, impartido por Sabela Salgueiro (traballadora social especializada en Educación Sexual Integral e Violencias Sexuais).

Os obxectivos para 1º de ESO son os seguintes:

  • Fomentar o desenvolvemento da identidade corporal.
  • Recoñecer a sexualidade como coñecemento social.
  • Analizar o contexto patriarcal e as súas consecuencias (estereotipos de xénero, sexismo e violencia).
  • Desmitificar o amor romántico.
  • Recoñecer relacións interpersoais non saudables e fomentar a comunicación efectiva.

Os obxectivos para o alumnado 1º de Bacharelato son:

  • Fomentar actitudes positivas cara a diversidade sexual.
  • Garantir o coñecemento do que é unha boa saúde sexual para promover a eliminación de comportamentos de risco.

Avaliación de Diagnóstico - 2º de ESO

Probas diagnósticas

O IES A Sangriña realizará, entre os días 10 e 11 de abril, a Avaliación de Diagnóstico programada pola Dirección Xeral de Ordenación e Innovación Educativa | Consellería de Cultura, Educación, Formación Profesional e Universidades para o seu alumnado de 2º de Educación Secundaria Obrigatoria.

Desde o centro, aproveitamos para lembrar ás familias do noso alumnado que a corrección deste tipo de probas é totalmente anónima e que baixo ningún concepto poderán afectar ás cualificacións dos seus fillos e fillas en ningunha das materias das que os e as estudantes serán avaliados.

Realizaranse probas de Lingua Galega e Literatura, Lingua Castelá e Literatura, Inglés e Matemáticas. Destes materiais existirán adaptacións habilitadas para o alumnado con protocolos derivados de necesidades especiais de aprendizaxe.

Se ben é certo que os centros si serán avaliados e recibirán un informe sobre o seu desempeño, hai que lembrar tamén que está totalmente prohibido por lei a elaboración de clasificacións de centros baseadas nesta información.  Os devanditos informes deberán ser empregados polos centros para deseñar aquelas medidas de mellora que, en consecuencia, se estimen oportunas.

Exames de recuperación de materias pendentes - 2º de Bacharelato

Recuperacións 2º BAC

Publicamos o calendario de recuperacións de materias pendentes para o alumnado de 2º de Bacharelato. Coa finalidade de aproveitar mellor os tempos e os espazos, algunhas probas con alumnado non coincidente de maneira simultánea en espazos compartidos.

Na táboa da imaxe poden consultarse o lugar e hora de realización de cada exame. Se a imaxe non se reproducise coa calidade suficiente no teu navegador, podes consulta-la en pdf premendo aquí.

Prevención da violencia contra as mulleres

Prevención violencia mulleres a sangriña

Esta actividade formativa e informativa realizouse o pasado venres 5 de abril. O seu obxectivo foi concienciar o alumnado participante, de 1º de Bacharelato e de 2º de FP Básica, da lacra que supón a violencia contra as mulleres na nosa sociedade e da necesidade de erradicala. 

Esta actividade está integrada no Plan director para a convivencia e a mellora da seguridade nos centros educativos e os seus contornos. Os obxectivos que se pretenden acadar coas actuacións recollidas no Plan Director, son todos aqueles que procuran dar respostas coordinadas e eficaces a todas as cuestións relacionadas coa seguridade dos alumnos nos centros educativos e os seus arredores, os que fortalecen a cooperación policial coas autoridades educativas, os que pretenden mellorar o coñecemento que a poboación escolar posúe sobre os recursos policiais ou os que fomentan nos rapaces o respecto polos dereitos fundamentais.

A Sangriña en Orpagu

ORPAGU IES A Sangriña

Hoxe, o noso alumnado de Economía de 4º de ESO tivo o privilexio de acudir a unha visita moi especial. Fomos ás instalacións que Orpagu ten aquí, na vila da Guarda. Alí recibíronnos o seu presidente, Joaquín Cadilla, a directora xerente, Juana Parada e Hugo Lage, responsable do proxecto Orpagu educativo (un compendio de proxectos que Orpagu realiza dentro do eido da Educación para achegar o mundo da pesca con palangre de superficie ao conxunto da sociedade).

Orpagu é a frota máis importante de toda Europa en canto á pesca de palangre de superficie grazas aos seus 74 buques, especializados na pesca de peixe espada e especies afíns. O seu obxectivo é contribuír a coidar da actividade pesqueira dos palangreiros; desenvolvéndoa, regulándoa e potenciándoa, ao tempo que loita e defende os intereses de todo o sector. Orpagu  está en constante evolución, innovando para superar as expectativas do sector. Basea o seu traballo na artesanía, centrando os seus esforzos na sustentabilidade para coidar do mar e de ti.

Moitas grazas pola fantástica acollida!!!

Seguridade Vial con Daniel Castelo

Seguridade Vial IES A Sangriña

Hoxe tivemos unha visita que xa é todo un clásico no IES A Sangriña, a de Daniel Castelo. Exalumno do centro, pai de dúas das nosas estudantes e, sobre todo, o mellor concienciador e divulgador sobre Seguridade Viaria que poderiamos pedir.

A súa é unhas desas intervencións que se repiten cada ano por resultaren importantísimas, unha vez que só desde a formación e o coñecemento podemos contribuír, entre todas e todos, a reducir as mortes nas estradas. A charla foi, como sempre, moi directa e próxima... chea de exemplos da realidade da nosa contorna. O alumnado asistente; de 1º de Bacharelato, 1º dos Ciclos Medios e FP Dual; está xa próximo a sacar o permiso de condución. Agardamos que as súas palabras e consellos lles sexan útiles cando en breve comecen a conducir... e que xuntos/as fagamos das rúas e estradas uns espazos máis seguros.

Esta actividade está integrada no Plan director para a convivencia e a mellora da seguridade nos centros educativos e os seus contornos. Os obxectivos que se pretenden acadar coas actuacións recollidas no Plan Director, son todos aqueles que procuran dar respostas coordinadas e eficaces a todas as cuestións relacionadas coa seguridade dos alumnos nos centros educativos e os seus arredores, os que fortalecen a cooperación policial coas autoridades educativas, os que pretenden mellorar o coñecemento que a poboación escolar posúe sobre os recursos policiais ou os que fomentan nos rapaces o respecto polos dereitos fundamentais.

Obradoiro de primeiros auxilios

Primeiros auxilios IES A Sangriña

Na mañá de onte, o alumnado de 2º de ESO participou no Obradoiro de Primeiros Auxilios, unha actividade moi importante organizada polo Departamento de Educación Física que pode chegar a axudar a protexer a vida dos seres queridos ou de outras persoas que teñan sufrido un accidente.

Impartida pola Cruz Vermella, a sesión tivo como obxectivo o coñecemento, por parte dos e das estudantes, da chamada conduta PAS (siglas de protexer, avisar e socorrer). Deste modo, os rapaces e rapazas recibiron formación teórico-práctica sobre como deben realizarse actuacións de auxilio con diferentes vítimas e en diferentes situacións de risco. Ademais de aprender cales son os números de teléfono de emerxencia máis útiles e como deben ser empregados, o alumnado recibiu tamén formación sobre soporte vital básico e RCP (reanimación cardiopulmonar).

Física RE-CREATIVA

Benito Vázquez do Río A Sangriña

O pasado venres 22 de marzo, o noso alumnado puido gozar dunha fantástica e entretida conferencia impartida polo profesor da Universidade de Vigo Benito Vázquez Dorrío. O ponente obsequiounos cunha sesión profundamente práctica que resultou moi amena e instrutiva para o noso alumnado. 

O profesor José Benito Vázquez Dorrío é impulsor da chamada aprendizaxe manipulativa da física, que el mesmo define como “calquera material, conxunto ou instrumento para explicar, aprender un principio, un concepto ou unha lei” desta disciplina científica. O catedrático de Física Aplicada da Universidade de Vigo impulsou durante os últimos trinta anos esta estratexia pedagóxica a través de múltiples actividades formativas e educativas. En recoñecemento "á súa extraordinaria paixón pola docencia a través da experimentación na aula", así como "a destacada calidade do seu labor formativo a nivel universitario, especialmente no desenvolvemento de metodoloxías innovadoras para o profesorado" resultou gañador do Gañador do "PREMIO DE FÍSICA REAL SOCIEDAD ESPAÑOLA DE FÍSICA - FUNDACIÓN BBVA. Premio Enseñanza y Divulgación de la Física (modalidad Enseñanza Universitaria)" en 2023.

Distribuir contido


by Dr. Radut