IES A SANGRIÑA

Orde sobre uso de móbiles nos centros de ensino

Mar, 09/01/2024 - 14:08 — IES A Sangriña

Ao abeiro do disposto na Orde do 4/1/2024 CCEFPU sobre o uso dos móbiles, o IES A Sangriña aplicará as sancións derivadas da citada orde:

Prohibición a todo alumnado matriculado no centro do uso de teléfonos móbiles ou calquera outro dispositivo durante a totalidade da xornada escolar (entradas, saídas, recreos, actividades extraescolares, uso da cafetería etc).
Os teléfonos móbiles e outros dispositivos só poderán ser utilizados baixo a autorización e/ou demanda expresa e directa do/a docente en períodos lectivos como ferramentas didácticas. Fóra deste uso queda totalmente prohibido ao alumnado do centro manipular, extraer, custodiar o móbil na aula ou en calquera lugar dentro das instalacións do centro.
O incumprimento desta norma será considerado como falta leve á convivencia. A acumulación de tres faltas leves por este motivo pasará a considerarse como falta grave e será motivo de acción disciplinaria ou incoación de expediente.

Conferencia: audiovisual e accesibilidade

Mar, 09/01/2024 - 12:20 — IES A Sangriña

Hoxe celebrouse no IES A Sangriña unha conferencia do profesor Pablo Romero Fresco organizada polo departamento de Orientación. O profesor do Departamento de Tradución e Lingüística da Faculdade de Filoloxía e Tradución da Universidade de Vigo ofreceunos unha disertación titulada "Como facer os medios audiovisuais accesibles para todas as persoas".

Nesta charla explicouse o traballo que están a facer na Facultade de Filoloxía e Tradución e, concretamente, no grupo de investigación GALMA, para que os medios audiovisuais (TV, cine e mesmo teatro) sexan accesibles para todas as persoas que non poidan acceder á versión orixinal, ben porque non coñezan o idioma (para o que traballan na dobraxe e na subtitulación) ou porque sexan xordas ou cegas (o que require subtitulación inclusiva ou audiodescrición). Mediante proxectos con cadeas de televisión, empresas e gobernos de todo o mundo están a traballar nun novo método de produción de subtítulos en directo mediante a colaboración entre subtituladores/as e programas de recoñecemento de fala. Ademais, crearon un novo sistema de traballo, chamado accessible filmmaking, que promove a colaboración entre cineastas e tradutores/as, e que están a espallar por todo o mundo, incluído un curso de formación para os/as profesionais de Netflix nas súas oficinas de Hollywood. Nesta charla viuse o impacto que este traballo pode ter na formación dos novos tradutores/as e intérpretes da facultade e na súa futura vida profesional.

Desexámosvos felices festas e próspero aninovo

Xov, 21/12/2023 - 14:30 — IES A Sangriña

Feliz Nadal

Bibliotrega: mercado solidario co Proxecto Paleng

Mér, 20/12/2023 - 13:11 — IES A Sangriña

Mercado libros Nadal

Hoxe, durante os dous recreos, a Bibliotegra Magdalena Garabatos organizou un mercado de libros de segunda man, doados por membros da comunidade educativa, para recaudar fondos para o “Proxecto Paleng”, que traballa polo fomento da lectura en lingua autóctona no Lesotho rural.

Con esta iniciativa, alumnos e profes conseguiron darlles unha segunda vida a estes libros que lles permitirán ter novas e interesantes lecturas a prezos moi baixiños e, ademais, colaborar con este fermoso e importante proxecto.

Conferencias do profesor Emilio García Roselló

Mér, 20/12/2023 - 12:52 — IES A Sangriña

Conferencias do profesor Emilio García Roselló

Nesta mañá de hoxe, o profesor e Vicedecano de Relacións Internacionais a Faculdade de Comercio de Vigo, Emilio García Roselló, pronunciou dúas conferencias dirixidas ao alumnado de Economía do noso centro.

O evento estivo organizado polos departamentos de Economía e Orientación. A conferencia de 1º de Bacharelato versou sobre a mercadotecnia na era dixital, mentres que os alumnos e alumnas do 2º curso ampliaron os seus coñecementos sobre modelos de negocio na era dixital.

O profesor Emilio García Roselló é especialista na aplicacións das TIC ao comercio e trata de contribuír a que as persoas e as organizacións acepten o dixital e a innovación como parte das súas vidas profesionais, con entusiasmo e sen medo. Como investigador está centrado no campo de ecological informatics, e máis concretamente en biodiversity informatics.

Fomos á Casa de Rosalía de Castro e a Pontevedra

Mér, 20/12/2023 - 12:41 — IES A Sangriña

visita pontevedra e rosalía de castro

O alumnado de 3º de ESO realizou, onte día 20 de decembro, unha excursión educativa á Casa Museo de Rosalía de Castro e á cidade de Pontevedra organizada polo departamento de Lingua Galega e Literatura.

Na viaxe, subvencionada con fondos que o departamento conseguiu da Deputación de Pontevedra, o alumnado puido coñecer a Casa da Matanza, sé do Padroado Rosalía de Castro, que está dedicada ao estudo e divulgación da figura da autora de Cantares Gallegos e Follas Novas, icono da cultura galega desde o Rexurdimento.

Posteriormente, os estudantes desprazáronse á cidade de Pontevedra, onde gozaron de pasear polas súas rúas e visitaron o Museo Provincial. Nesta institución realizaron unha visita guiada, con especial atención á obra de Castelao.

Conferencia sobre química, alimentos e cociña

Mar, 19/12/2023 - 15:40 — IES A Sangriña

Onte celebrouse no IES A Sangriña unha conferencia do profesor Ricardo Riguera organizada polos departamentos de Física e Química e Orientación. O profesor da USC e investigador do CiQUS (Centro singular de Investigación en Química Biolóxica e Materiais Moleculares) ofreceunos unha interesante disertación sobre a relación entre a Química e a conservación dos alimentos e o seu emprego no mundo da culinaria.

O profesor Ricardo Riguera é autor de máis de 250 publicacións e patentes, inicialmente centradas en produtos naturais bioactivos, química medicinal e desenvolvemento de métodos de RMN para asignación de configuración absoluta. En 2013, a Real Sociedade Española de Química outorgoulle a Medalla Félix Serratosa, polo seu traballo en Química Orgánica, e en 2018 o Premio GERMN pola súa investigación no campo da RMN.

O APALPADOR - III Concurso de Debuxo de Nadal

Lun, 18/12/2023 - 09:46 — IES A Sangriña

Concurso de debuxo de nadal o apalpador ies a sangriña

O Equipo de Dinamización da Lingua Galega quere que, un ano máis, o alumnado da Sangriña celebre o Nadal da maneira máis artística. Para iso, convocamos un concurso para que debuxedes ao Apalpador ou á Apalpadora, personaxes protagonistas do Nadal galego.

O premio consistirá nun vale de 30€ en material de debuxo, libros ou material escolar.

Os orixinais deberán enviarse por correo electrónico, antes do 12 de xaneiro, a asangrinha.edlg@gmail.com

O EDLG promove o cinema en galego

Sáb, 16/12/2023 - 21:28 — IES A Sangriña

Cinema en galego

O Equipo de Dinamización da Lingua Galega do IES A Sangriña está a levar a cabo unha campaña de promoción de filmes aos que o alumnado pode acceder no noso idioma en diferentes plataformas como Netflix, Amazon Prime, RTVE Play, Filmin ou a propia web da TVG.

Os filmes están a ser divulgados cun grande mural ubicado no vestíbulo do centro onde se penduran carteis de elaboración propia que inclúen unha imaxe da película e unha breve sinopse. Ademais, estes mesmos materiais están a ser difundidos diariamente nas redes sociais do EDLG (tedes a ligazón ao Instagram nunha icona na marxe dereita desta web).

Boa parte dos contidos poden localizarse tamén na web https://pipocas.amesa.gal da Mesa pola Normalización Lingüística, repositorio que vos convidamos a visitar.

O IES A Sangriña participará no programa EduMob

Mar, 12/12/2023 - 15:13 — IES A Sangriña

edumob

Tras a publicación definitiva dos resultados da selección de centros para a participación no programa EduMob, no IES A Sangriña podemos manifestar con orgullo que non simplemente fomos seleccionados, senón que o noso proxecto foi o que obtivo unha valoración máis alta de entre todos os presentados polos centros públicos de ensino non universitario da Comunidade Autónoma de Galicia que se candidataron.

EduMob é un programa de intercambio individual de alumnado en réxime de reciprocidade con alumnado matriculado en centros pertencentes á Région Académique de Grand Est (Francia) para o curso 2023/2024 que, ademais de facilitar administrativamente a mobilidade internacionals dos nosos estudantes, pode chegar a sufragar boa parte dos gastos ocasionados por este tipo de actividade.