IES A SANGRIÑA

Con motivo das obras na rúa Coruña, a ruta de transporte escolar A Pasaxe - Porto CAMBIA NOVAMENTE O SEU SENTIDO, pasando a ser este o anterior ao 11 de decembro. A partir do 16 DE XANEIRO a primeria parada da ruta volverá a ser A PASAXE e a última parada será PORTO.

Durante este curso escolar a asociación Executivas de Galicia, co apoio da Consellería de Cultura, Educación e Universidade da Xunta de Galicia, desenvolverá o proxecto EduReferentes.

Este proxecto, no que participará o alumnado de 4º de ESO do IES A Sangriña, ten como finalidade achegar a 20 centros educativos da comunidade galega, información e acompañamento para facilitar o seu coñecemento sobre o mundo laboral, desde unha perspectiva de xénero.

Para acadar esa finalidade, levaránse a cabo 3 actuacións concretas:

1. Charlas informativas coas que achegar ás aulas a realidade laboral coa colaboración de mulleres galegas, Referentes en distintos ámbitos laborais/profesionais. Estas mulleres forman parte do directorio #ReferentesGalegas que se pode visitar en https://executivasdegalicia.org/listado-de-referentes/.
2. Sesións de mentoría individualizada nas que mulleres mentoras acompañarán a 5 alumnos e alumnas de cada centro educativo no seu proceso de orientación vocacional.
3. Obradoiros de Softskills e creatividade para potenciar as habilidades e competencias persoais e laborais dun grupo de 25 alumnos e alumnas.

O alumnado de 1⁰ de Bacharelato realizou hoxe unha viaxe académica á cidade de Vigo para asistir ao filme "O corno" e realizar unha visita guiada á exposición "Vigo no tempo" na sede de Afundación (de Abanca).

O CORNO é un filme galego, dirixido por Jaione Camborda, que vén de ser recentemente premiado no prestixioso Festival Internacional de Cine de San Sebastián. Este drama ambiéntase na Illa de Arousa, no ano 1971. María é unha muller que gaña a vida mariscando. Tamén é coñecida na illa por axudar outras mulleres nos seus partos con especial dedicación e coidado. Tras un inesperado suceso, vese obrigada a fuxir e comeza unha perigosa travesía que a fará loitar pola súa supervivencia. Buscando a súa liberdade, María decide cruzar a fronteira por unha das rutas de contrabando entre Galicia e Portugal.

VIGO NO TEMPO é a quinta das exposicións que se poñen en marcha no marco dun proxecto máis amplo, 'Cidades no tempo', que inclúe unha exposición en cada unha das sete principais cidades galegas. Despois de Santiago, Ferrol, Lugo e A Coruña, a proposta continúa a súa andaina en Vigo co obxectivo de recuperar a cultura urbana como compoñente fundamental da identidade de Galicia. Pode visitarse na Sede de Afundación de Vigo ata o 20 de xaneiro de 2024.

Ao abeiro do disposto na Orde do 4/1/2024 CCEFPU sobre o uso dos móbiles, o IES A Sangriña aplicará as sancións derivadas da citada orde:

1. Prohibición a todo alumnado matriculado no centro do uso de teléfonos móbiles ou calquera outro dispositivo durante a totalidade da xornada escolar (entradas, saídas, recreos, actividades extraescolares, uso da cafetería etc).
2. Os teléfonos móbiles e outros dispositivos só poderán ser utilizados baixo a autorización e/ou demanda expresa e directa do/a docente en períodos lectivos como ferramentas didácticas. Fóra deste uso queda totalmente prohibido ao alumnado do centro manipular, extraer, custodiar o móbil na aula ou en calquera lugar dentro das instalacións do centro.
3. O incumprimento desta norma será considerado como falta leve á convivencia. A acumulación de tres faltas leves por este motivo pasará a considerarse como falta grave e será motivo de acción disciplinaria ou incoación de expediente.