Lecturas de medo en secundaria

O alumnado de secundaria participou o pasado 31 de outubro na lectura dun conto de medo moi especial pertencente ao libro Os contos de terror do tío Montague de Chris Priestley. Atoparás máis información sobre esta e outras actividades no noso blogue Bibliosansa.

 

Participación na Marcha Ciclista pola Igualdade.

O pasado venres o alumnado de 5º e 6º de Educación Primaria participou como convidado na Marcha Ciclista pola Igualdade, organizada polo Concello de Narón, e para o que contamos así mesmo coa colaboración da Concellería de Igualdade do Concello de San Sadurniño.

Ademais da marcha en bici, o alumnado asistiu a un espectáculo denominado "Maxia pola Igualdade" no Auditorio de Narón.

Foi unha experiencia moi positiva que agardamos repetir, así coma retomar as saídas en bici que en anos anteriores houbo que anular por mor das inclemencias meteorolóxicas.

E a modo de resumo, aí tedes un pequeno vídeo:

Onde o mundo se chama biblioteca

O pasado 24 de outubro, Día da Biblioteca, levamos a cabo unha sesión de formación de usuarios e usuarias cos dous grupos de 1º de ESO. Deixámosvos unha presentación na que lembramos aquela data.

Día do Peón 2017

O pasado xoves, ademais do Magosto, celebramos o Día do Peón baixo a convocatoria de Brinquedia Rede Galega do Xogo Tradicional.

Outro ano máis a actividade foi un éxito coa rapazada, e agardamos que en vindeiras edicións máis familias se sumen á tirada conxunta.

A modo de resumo, velaí vai un vídeo que recolle as diferentes actividades realizadas (clic sobre a imaxe para visualizalo):

Imaxe de biblioip

QUE FANTASMADA DE LIBROS!!!

Unha das actividades que organiza a Biblioteca de Infantil e Primaria para celebrar o Samaín son as lecturas de medo. Neste curso os protagonistas das lecturas foron as pantasmas.

Os corredores, as portas e os taboleiros apareceron cheos de fantasmas.

No Castelo das Fantasmas, os rapaces tiñan que abrir as ventás e atopar a correspondente ao seu curso. Alí estaba agochada a silueta da fantasma que aparecía na portada do libro que lles correspondía ler ese día.

Con esa silueta na man tiñan que atopar o seu libro e... a tremer de medo todos xuntos coas historias de fantasmas.

Premendo na imaxe tedes un pequeno vídeo co resumo da actividade.

 

 

MAGOSTO NO COLEXIO

MAGOSTO NO COLEXIO

Hoxe vivimos unha xornada diferente no colexio. Celebramos o magosto e desta volta xuntamos a todos os rapaces e rapazas de infantil, primaria e secundaria. Non puidemos celebralo fóra pola meteoroloxía, por iso fixémolo no pavillón de deportes municipal e o resultado podemos catalogalo de excelente. O comportamento do alumnado moi modélico e tanto profesorado como alumnado puidemos degustar unhas boas castañas quentiñas co seu vaso de leite. Grazas especialmente ao Concello por traernos tanto castañeiros como castañas e á ducia de voluntarios de ESO que llas pelaron aos nenos e nenas de infantil e 1º prim.

Foi unha bonita mañá que rematou cos de primaria e 1º ESO bailando o peon e para poñer o punto diferente á xornada, no comedor arrincamos coa campaña "UN PAÍS PARA COMELO" dedicado ás comidas rexionais típicas españolas. Empezamos hoxe con Asturias, e qué mellor que unha fabada e un cachopo para entrar en calor nesta fría mañá de novembro.

Parabéns para todos por colaborar...e colaborar ben.

Xuntamos unha escolma de fotos da mañá como testemuña da xornada.

Celebración do Día do Peón

Baixo a convocatoria de Brinquedia Rede Galega do Xogo Tradicional, mañá xoves celebraremos o xa tradicional Día do Peón.

Dentro das diferentes actividades previstas, as 13:00 h realizaremos no pavillón unha tirada conxunta de peóns na que participará a meirande parte do alumnado do centro. E, coma en anteriores edicións, as familias estades convidadas a tomar parte en dita tirada.

Semana de "Merendas terrroríficas".

Co gallo da realización de actividades en torno ao Samaín, e incluído dentro das actividades do programa "Aliméntate ben", o alumnado de Educación Infantil e Educación Primaria realizará durante esta semana unhas merendas bastante especiais.

E como para mostra un botón, velaí van unhas imaxes dos simpáticos fantasmas que puideron crear e degustar no día de hoxe.

      

 

Imaxe de biblioip

AS PANTASMAS NA BIBLIO DE SANSIÑO

Na seguinte presentación podedes ver o primeiro boletín deste curso que preparamos coas novidades da Biblioteca de Infantil e Primaria.

Dedicámosllo a lecturas de pantasmas, xa que é o tema que escollimos para as Lecturas de medo que imos facer no Samaín.

O noso centro, un dos protagonistas na actividade "Reunión de traballo robótica primaria".

No día de hoxe catro alumnas e alumnos de 5º de Educación Primaria (Adrián Fernández, Alma Penabad, Diana Pita e Jaime Rodríguez) acompañados polos mestres Mar e Iván, participaron nesta actividade organizada pola Consellería de Educación.

Esta reunión de traballo englóbase dentro das actividades do programa "Introdución á robotica educativa en Primaria", programa no que o noso centro está a tomar parte durante este curso.

 

O alumnado realizou unha demostración en vivo de como traballamos nas clases de Robótica que se imparten en 4º de Educación Primaria, durante a cal recibiron a visita de Román Rodríguez, Conselleiro de Educación. Segundo fontes da Consellería, o curso pasado fomos o único centro público de Galicia que impartiu Robótica coma área de libre configuración na etapa de Educación Primaria.

Así mesmo, o profe Iván participou coma poñente na mesa redonda que levaba por título "Experiencias robótica primaria". Na mesma, falou do procedemento que seguiu o noso centro para obter a aprobación da administración educativa para impartir Robótica coma área de libre configuración, así coma de aspectos relacionados coa posta en práctica e desenvolvemento desta área.

Xa para rematar, aí tedes uns vídeos nos que podedes apreciar o ambiente vivido durante a actividade, así coma o tan bo desempeño do alumnado, feito polo que recibimos multitude de felicitacións. E mil grazas á profe Mar polas imaxes e os vídeos!


 

Distribuir contido