CPI de San Sadurniño |

Minimundos Solidarios

Dom, 10/12/2023 - 20:53 — directora

Hoxe 10 de Decembro, coincidindo co Día dos Dereitos Humanos, queremos compartir con vós o noso proxecto solidario deste curso. Como ben sabedes, estamos colaborando coa ONG Causas Comúns e o seu proxecto “Utopía”. Este proxecto desenvólvese fundamentalmente en Guinea Bissau, un dos países máis empobrecidos e esquecidos do mundo. Mesturando a nosa liña de traballo “os contos” coa fotografía, recreamos uns minimundos que fotografamos e poñemos á venda. Cada alumno levará unhas copias para a casa para vender entre amigos e familiares. Non hai ningún prezo fixado, cada un pode axudar da forma que considere. Non é necesario tampouco que vendan todas as fotos que levan para a casa.

Xunto coas fotos, os nenos deberán cubrir un rexistro co número de exemplares vendidos e os cartos recadados. A data límite para traer os cartos será o venres 12 de xaneiro. Ademais, tamén poderedes mercar os nosos minimundos no Café D-Zine e en Librería Brétema.

Moitas grazas de antemán pola vosa colaboración!

Operación Quilo de Nadal 2023

Mér, 06/12/2023 - 22:40 — directora

Como anos anteriores, invitámosvos a participar na Operación Quilo de Nadal 2023, campaña de recollida de alimentos destinada a colaborar coa Cociña Económica de Ferrol e con Cáritas Parroquial de San Sadurniño, que levaremos a cabo entre os días 4 ao 16 de decembro. Consiste en colaborar traendo un quilo de comida ou mais para axudar á xente que máis o necesita. Para non xuntarnos cos mesmos produtos repartimos por cursos o que poden traer, e sería do seguinte xeito:

- Infantil: Pasta, pan raiado, fariña.

- 1º e 2º Primaria: Cacao, café soluble, leite, azucre.

- 3º e 4º Primaria: Galletas, cereais, pan raiado, produtos de hixiene.

- 5º e 6º Primaria: Leite, aceite, fariña, produtos de hixiene para bebés.

- 1º e 2º ESO: Vinagre, aceite, leite, cereais.

- 3º ESO: Leite, pan raiado, conservas, produtos de hixiene .

- 4º ESO: Produtos de hixiene, vinagre, aceite, legumes.

- Profes: Aceite, vinagre, viño branco para cociñar, produtos de hixiene para bebés.

Os produtos depositaránse na entrada dos edificios de Primaria e de Secundaria.

Pedímosvos desde aquí a vosa contribución, estamos ante a ocasión de axudar a persoas que teñen dificultades para comer cada día.

“Cun pequeno xesto de cada un, podemos cambiar a difícil realidade doutros”

25 N: Día Internacional da eliminación da violencia contra as mulleres

Sáb, 02/12/2023 - 01:06 — directora

O “SOS silencioso” é un xesto internacional para pedir auxilio ante a violencia de xénero, un xesto que aprendimos e que queremos axudar a visibilizar, grazas á FANPA de Ferrolterra. Ademais, tamén traballamos os estereotipos de xénero nas personaxes dos contos, coa actividade “Dalle a volta ao conto” proposta pola Biblioteca e que se seguirá traballando ao longo do curso en diversas materias. Clica nos enlaces para ver o noso traballo.

Erasmus+ STEAM/dixital

Dom, 26/11/2023 - 22:04 — directora

Co obxectivo de visitar outras escolas e modelos educativos, o noso centro a través do departamento de tecnoloxía, puido viaxar a Turquía e participar nunha formación STEAM (ciencia, tecnoloxía enxeñería, arte e matemáticas). Podedes acceder a toda a información clicando aquí.

Día do Peón...

Sáb, 25/11/2023 - 13:14 — directora

Hai unhas semanas desfrutamos dunha xornada no que o protagonista foi sen dúbida O Peón, e na que a expresión "Polo San Martiño... peóns ao camiño" xa forma parte da nosa tirada conxunta. Clicade na imaxe para mergullarvos connosco nese día.

15 Anos de LÓVA. A ópera, un vehículo de aprendizaxe.

Mér, 22/11/2023 - 08:27 — directora

Compartimos ligazón do evento que se celebra en Madrid hoxe 22 de novembro de 2023, relacionado co proxecto LÓVA no que participan dúas alumnas das que iniciaron o proxecto no 2013.

https://youtube.com/live/QSKX6ofeo4E?feature=share

Información sobre a Implantación da Xornada Lectiva en sesión Única de Mañá.

Xov, 16/11/2023 - 19:40 — directora

Regulada pola ORDE do 29 de maio de 2008 pola que se establece o procedemento para a implantación da xornada lectiva en sesión única de mañá ou mixta nas escolas de educación infantil e primaria, colexios rurais agrupados, centros públicos integrados, centros de educación especial e centros privados concertados.
Para poder implantala, deben cumprirse os seguintes requisitos:

Acordo do claustro, por maioría dos 3/5 dos seus membros.
Acordo do consello escolar, por maioría dos 3/5 dos seus membros.
Informe favorable do Servizo de Transporte.
Acordo favorable do 58% do censo das familias. (Para os efectos de establecer o total do censo computarase a nai ou pai ou un dos titores legais do alumnado da etapa en que se pretende cambiar a xornada).
Plan específico de actividades extraescolares

Pasos a seguir para a súa implantación:

1º Votación do claustro e o consello, en sesións extraordinarias.

2º No caso de que as votacións de claustro e consello sexan favorables, solicitude de informe favorable ao Servizo de Transporte.

3º Información sobre o plan específico de actividades extraescolares cun mes de antelación ás votacións do sector das familias. Que previamente será aprobado en Consello Escolar.

4º No caso de que o informe de Transporte sexa favorable, realizarase a votación das familias.

5º Informe favorable de Inspección Educativa.

6º Envío da solicitude á Consellería.

Destacamos a importancia da asistencia das nais, pais ou titores e titoras legais á votación no caso de que esta poida levarse a cabo, e solicitamos a vosa colaboración.

Moitas grazas de antemán.

Deixámosvos a continuación no seguinte enlace o Plan de Actividades Extraescolares.

USO DE TELÉFONOS MÓBILES NO CENTRO

Mér, 15/11/2023 - 12:12 — directora

Ante o crecente uso dos teléfonos móbiles por parte do alumnado do centro, queremos recordar que, segundo o Decreto 8/2015, do 8 de xaneiro, polo que se desenvolve a Lei 4/2011, do 30 de xuño, de convivencia e participación da comunidade educativa en materia de convivencia escolar da Xunta de Galicia as Normas de Organización e Funcionamento de Centro establecen o seguinte:

• O decreto 8/2015 sobre convivencia escolar establece no artigo 19.4, a “prohibición do uso de teléfonos móbiles e outros dispositivos electrónicos como mecanismo de comunicación durante os períodos lectivos”. Polo tanto, non está permitido o uso de teléfonos móbiles e outros dispositivos electrónicos que se poidan empregar como mecanismos de comunicación en todo o recinto do centro, e en particular, non está permitida a tenencia no centro de reloxos intelixentes.

• Permitirase o uso destes dispositivos como ferramenta pedagóxica sempre baixo demanda, por escrito, do profesorado que o precise para as súas clases, o que implica que o profesorado debe informar, por escrito, ás familias de que días vai ser preciso o seu uso. Nestes casos o alumnado poderá facer uso dos dispositivos unicamente na clase correspondente e durante o tempo que estean acompañados do/a profesor/a responsable.

• Todo o profesorado ten a obriga de solicitar a entrega destes dispositivos, sempre apagados, se observan que algún/algunha alumno/a está facendo uso deles en calquera espazo do centro: aulas, corredores, baños, patios exteriores... Serán depositados, apagados, en Xefatura de Estudos ou Dirección, quedando a disposición da nai/pai/titor/a legal unha vez remate a xornada escolar. A falta terá consideración de falta leve e ao/a alumno/a impoñeráselle inmediatamente unha das medidas correctoras recollidas nos apartados c), d), e), g) ou h) do artigo 43 do Decreto 8/2015. Na gradación destas medidas terase en conta a reiteración na conduta.

• A resistencia ou negativa a entregar calquera dispositivo de este tipo será considerada unha falta grave, como se recolle na alínea j) do artigo 38 do Decreto 8/2015. Nestes casos deberase cubrir un documento de comunicación de posible conduta gravemente prexudicial para a convivencia e abrirase o procedemento corrector correspondente para aplicar a medida correctora que se acorde de entre as recollidas nos apartados b) ou e) do artigo 39 do Decreto 8/2015. Na gradación destas medidas terase en conta a reiteración na conduta.

Por todo isto, pregamos que lle insistan ás súas fillas e fillos a importancia de non empregar os teléfonos móbiles no centro. Se precisan poñerse en contacto de forma urxente coas familias, poden facelo a través do teléfono do centro.

Moitas grazas pola súa colaboración.

O equipo directivo.

O símbolo da paz no satélite

Dom, 12/11/2023 - 03:44 — depep

Xa hai un tempo, cando comezou a guerra de Ucrania, o alumnado de Educación Plástica pintou no patio do centro o símbolo da paz. Porque as guerras son todas inxustas e os que máis sofren e morren son os que menos culpa teñen.

Foi feito pensando en enviar unha mensaxe ao mundo aproveitando os satélites que nos están a observar cada día. E por iso fixémolo ao grande, de seis metros de diámetro.

Algúns satélites levan un tempo tomando nota do debuxo e o noso obxectivo está, en parte acadado.

Co tempo a pintura foise gastando e, máis que nunca, faise necesario repoñela. Farémolo ao longo deste curso.

SAMAÍN: CONTO DE CARABUÑAS, OBRADOIRO DE CABAZAS E EXPOSICIÓN

Ven, 10/11/2023 - 14:29 — EDLG

O martes 31 de outubro, dende o Equipo de dinamización da lingua galega (EDLG), coordinamos unha lectura dramatizada por parte de alumnado de 2º ESO e membros do EDLG do conto Carabuñas para alumnado de Primaria/Infantil.

Realizamos tamén un obradoiro de tallado de "caliveras de melón" e repasamos outros nomes que reciben por toda Galicia: caveiras de colondros, calabazotes, calacús, caiotas, abóboras...

Ademais, fixemos unha exposición das cabazas polo centro tentando reforzar e potenciar os recursos e accións propios da nosa tradición relacionada co día de defuntos.

Xuntamos imaxes das actividades