Visita cultural e roteiro literario de Padrón a Compostela

O pasado xoves 26 de abril o alumnado de 3º e 4º de ESO participou nunha visita cultural á Casa Museo de Rosalía de Castro en Padrón, así como  á catedral e ao centro histórico de Santiago de Compostela. Esta actividade foi organizada polos departamentos de Xeografía e Historia e Lingua Galega e Literatura e contou co apoio da Biblioteca e o EDLG que deseñaron un roteiro literario para a visita.

 

Información sobre a V Carreira Popular

O domingo 27 de maio desenvolverase esta actividade, que xa comeza a ser un clásico.

Facendo clic nas seguintes imaxes poderedes acceder a:

A páxina con toda a información da carreira, a normativa da proba e outra información importante:

 

 

Día do Libro: Agasalla unha suxestión

O pasado mércores 25 de abril alumnas e alumnos de secundaria participaron nunha actividade para conmemorar o Día do Libro que chamamos "Agasalla unha suxestión". Consistía en regalar unha suxestión de lectura dun libro a outro compañeiro ou compañeira cuxo nome sacaban ao chou dunha bolsa.

 

Grazas ao alumnado participante!

Resumo do Día da Educación Física na Rúa

O día comezou con chuvia, e ata un momento límite non se puido tomar a decisión de levar a cabo a actividade ou adiala.

Pese a algún erro organizativo "de xuventude", coidamos que a actividade saíu bastante ben e que se cumpriron os obxectivos establecidos para a mesma.

Facendo clic na seguinte imaxe teredes acceso ao vídeo resumo do evento.

E para o ano ... Máis e mellor!

DÍA DA EDUCACIÓN FÍSICA NA RÚA

DÍA DA EDUCACIÓN FÍSICA NA RÚA

Onte mércores 25 de abril festexamos o Día da Educación Física na Rúa saíndo ao exterior para gozar dunha horiña de movemento e diversión. Desde os máis pequenos de 3 anos ata os maiores de 4ºESO correron, bailaron muiñeira e hip-hop, practicaron Voleibol, saltaron á corda, atrevéronse co parkour, camiñaron con zancos...en definitiva, amosaron que a Educación Física é unha excelente escusa para integrarnos co entorno. Nos tempos que corren nunca está de máis aparcar as tablets e os móviles para respirar, suar e sentir que estamos vivos.

Grazas ao Concello por cortar a rúa para nós durante unha horiña e noraboa a todos aqueles que participaron e organizaron a sesión, principalmente aos profesores de Educación Física, Iván en Primaria e Infantil e Alberto en Secundaria e tamén a "Meteoro" o Deus da chuvia, que parecía que quería estar presente pero que ao final foi dar unha volta mentras durou a actividade, ;-)

 

VISITA Á CIDADE DE LUGO-RUTAS LITERARIAS

VISITA Á CIDADE DE LUGO-RUTAS LITERARIAS

O pasado 20 de Abril os rapaces de 2ºESO achegáronse á cidade de Lugo para visitar a cidade e facer unha ruta literaria no museo provincial. Nas fotos que se xuntan tedes algunhas instantáneas do día.

 

CONCURSO DE CONTOS E POESÍAS

Queda aberto o plazo para que participedes todos no concurso de contos e poesías que organiza o Equipo de Dinamización da Lingua Galega. Lembrade que remata o 14 de maio. Tedes as bases no documento que se xunta.

Día do Libro: Exposición de fondos sobre Cervantes e Shakespeare

Lembrámosvos que ao longo desta semana e da próxima podedes visitar a nosa exposición de fondos sobre Cervantes e Shakespeare na sala de secundaria. Aproveitamos para facer unha pequena presentación con textos destes dous grandes escritores que anexamos nesta entrada.

 

Mércores 25 de abril: Día da Educación Física na Rúa

Promocionado polo COLEF-CAFDG (Colexio Oficial de Licenciados en Educación Física e en Ciencias da Actividade Física e do Deporte de Galicia), o noso centro celebrará o Día da Educación Física na Rúa.

Os obxectivos desta actividade son moi variados (poden consultarse facendo clic na imaxe anterior), pero a principal finalidade que nos move ao profesorado de Educación Física deste centro é visibilizar unha parte do traballo que desenvolvemos nas nosas sesións. E só unha parte porque, cunha duración dunha hora, resulta imposible mostrar todo o traballo dun curso nas clases de Educación Física (que non "ximnasia").

Así mesmo, queremos destacar que non é unha actividade dirixida só ao alumnado. As familias, o profesorado e a veciñanza poden tomar parte libremente nas diferentes actividades propostas. Para elo só hai que vir equipado adecuadamente (roupa e calzado deportivo).

As actividades darán comezo ás 12:30 e rematarán ás 13:30. Estarán ubicadas na Campa de Xogos Tradicionais (situada nos Xardíns do Concello), na Praza do Convento e no tramo da avenida Marqués de Figueroa comprendido entre a Casa da Cultura e o CPI.

Na seguinte imaxe pódese consultar as diferentes actividades e os cursos que participarán nelas, así coma a súa ubicación (de haber modificacións a imaxe será actualizada):

As actividades a realizar por 3º e 4º de Educación Primaria (a chave, o brilé e o aro) realizaranse na Campa de Xogos Tradicionais.

Xa para rematar, só nos queda agradecer a súa colaboración ao Concello de San Sadurniño, a Brío Danza e Rítmica, ao Club Voleibol Aldebarán, á Asociación de Amigos da Chave de Ferrolterra e á Escola de Atletismo Paula Mayobre. Sen eles non teriamos sido capaces de organizar un evento destas características.

 

VACANTES ACTUALIZADAS

No arquivo que se xunta podedes ver as vacantes de alumnado que temos no centro para o curso que vén. Están actualizadas a día 16 de abril.

Distribuir contido