Actividades

Ao longo desta semana, tres xogadores do Club Voleibol Aldebarán desenvolveron unha actividade de promoción deste deporte co alumnado de Educación Primaria.

O resultado coidamos que é moi satisfactorio, e con esta iniciativa agardamos contribuír ao crecemento de practicantes deste fantástico deporte.

Facendo clic na seguinte imaxe accederedes a un vídeo-resumo desta iniciativa:

O noso centro, facéndose eco da iniciativa de Ponte ... nas Ondas!sumarase á iniciativa dirixida a conmemorar o Día Mundial da Radio.

O tema escollido polo noso centro é o Xogo Tradicional. O alumnado participante (en Primaria, 3º, 4º e 6º e en Secundaria 1º da ESO) realizarán entrevistas e tratarán diversos temas.

As entrevistas serán as seguintes:

• Manolo Varela. Concelleiro en San Sadurniño, impulsor dunha Campa de Xogos Tradicionais que en breve comezará a funcionar.
• David Guiñazu: monitor da actividade extraescolar "Xogos Tradicionais" que este curso é ofertada polo Concello de San Sadurniño.
• Antón Cortizas: escritor en activo e mestre xubilado, autor de dúas das mellores obras galegas sobre o xogo tradicional.
• Xose Manuel Barreiro. Presidente de Brinquedia Rede Galega do Xogo Tradicional.
• Almudena Vega. Presidenta da AVV O Castelo de Narahío, falará sobre a presenza do xogo tradicional no Festival do Río Castro.
• Xaime Iglesias. Membro da Asociación Amigos da Chave de Ferrolterra.

Por outra banda, os temas a tratar serán os seguintes:

• Actividades que facemos no noso centro relacionadas co xogo tradicional.
• Xogo tradicional e música.
• Entroido e xogos tradicionais.

Agardamos que nos queden uns programas ben feitiños!

Non emitiremos en directo, senón que os programas serán gravados e posteriormente publicados na internet en forma de "programa radiofónico dispoñible para descarga" (máis coñecidos como "podcast").

Unha das actividades que organiza a Biblioteca de Infantil e Primaria para celebrar o Samaín son as lecturas de medo. Neste curso os protagonistas das lecturas foron as pantasmas.

Os corredores, as portas e os taboleiros apareceron cheos de fantasmas.

No Castelo das Fantasmas, os rapaces tiñan que abrir as ventás e atopar a correspondente ao seu curso. Alí estaba agochada a silueta da fantasma que aparecía na portada do libro que lles correspondía ler ese día.

Con esa silueta na man tiñan que atopar o seu libro e... a tremer de medo todos xuntos coas historias de fantasmas.

Premendo na imaxe tedes un pequeno vídeo co resumo da actividade.

Ao longo desta semana o noso centro participou no programa "Rompe cos estereotipos de xénero", en colaboración con Brío Danza e Rítmica e o Concello de San Sadurniño.

Así, o alumnado de 1º a 3º de Educación Primaria tivo a oportunidade tomar contacto coa Ximnasia Rítmica, e o de 5º a 6º de participar nunha sesión de Hip-hop.

 Na vindeira semana será o turno do alumnado de 5º e 6º de Educación Infantil, que participará nunha actividade de pre-danza. Así mesmo, o alumnado de 3º a 6º de Educación Primaria participará na Casa da Cultura nunha charla-coloquio.

Para quen quera seguir máis a fondo este programa, pode consultar a páxina de Facebook de Brío Danza e Rítmica.

Así mesmo, e por non repetirnos con outras publicacións na rede, o programa está moi ben descrito na páxina web do Concello de San Sadurniño.

O domingo 11 de xuño celebrouse no Teatro Real de Madrid a Gala da Educación 10 anos de LÓVA. O noso centro foi invitado a participar nela. As compañías "Cazasoños" e "Bombiglobo" interviron cunha pequena mostra das súas producións.

No seguinte enlace tedes acceso á entrada do Blogue LÓVASANSA onde atoparedes máis información.

Nestoutro enlace hai un vídeo resumo da Gala, con aportacións do alumnado e profesorado. UN FEIXE DE EMOCIÓNS!!!! (Se non tes conta de Facebook, fai clic en "Ahora no" cando solicite os datos de acceso).