Os soños na Gaiola

23 DE ABRIL: DÍA MUNDIAL DO LIBRO

O 23 de abril,  é o Día Internacional do Libro. Celébrase en honor a Miguel de Cervantes e a William Shakespeare, dous dos mellores escritores do mundo. Os dous morreron un 23 de abril e ese día escolleuse para recoñecer a importancia dos libros na vida. 

Cervantes, foi o autor dun dos libros traducidos a máis idiomas: "El ingenioso hidalgo Don Quijote de La Mancha".

Para coñecer un pouquiño máis deste autor e da súa obra, só tes que picar nos seguintes enlaces:

http://www.omerique.net/twiki/bin/view/Recursos/ActividadesDidacticasQuijote

http://nea.educastur.princast.es/quixote/

2 DE ABRIL: DÍA INTERNACIONAL DO LIBRO INFANTIL

  Un ano máis, o Ibby(International board on books for        young people) chámanos a  conmemorar o Día Internacional do Libro Infantil o día 2 de abril, data de nacemento de Hans Christian Andersen. Este ano, o cartel e o díptico correspondéronlle a Letonia. O texto é da escritora letona Inese Zandere, poeta, editora e activista da promoción da lecturaquen titula a súa mensaxe: Os libros fan grande o máis pequeno.

 

  A imaxe do cartel é do ilustrador Reinis Petersons, recoñecido debuxante dese país. 

  Galix, Asociación Galega do Libro Infantil e Xuvenil, traduciu ao galego a mensaxe, que aquí deixamos para todos e todas vós.

 

OS LIBROS FAN GRANDE O MÁIS PEQUENO
"As persoas tenden ao ritmo e á regularidade, do mesmo xeito que a enerxía magnética organiza as lascas de metal nun experimento de física, do mesmo xeito que unha folerpa crea cristais a partir de auga.
Xa sexa nun conto de fadas ou nun poema, ás nenas e aos nenos gústalles a repetición, os refráns e os motivos universais porque poden recoñecerse unha e outra vez; danlle regularidade a un texto. O mundo adquire unha orde preciosa. Aínda me lembro cando de nena loitaba comigo mesma por defender a xustiza e a simetría, a igualdade de dereitos para a esquerda e a dereita: se tamborilaba cos dedos unha melodía sobre a mesa, contaba cantas veces debía golpear con cada dedo para que os demais non se sentisen ofendidos. Adoitaba aplaudir dando unha palmada coa man dereita sobre a esquerda, pero pensei que iso non era xusto e aprendín a facelo ao contrario, coa esquerda sobre a dereita. Por suposto, este afán instintivo de equilibrio resulta gracioso, pero o que mostra é a necesidade de evitar que o mundo chegase a ser asimétrico. Tiña a sensación de ser a única responsable de todo o seu equilibrio.
A inclinación das nenas e os nenos cara aos poemas e ás historias xorde, do mesmo modo, da súa necesidade de levar regularidade ao caos do mundo. Dende a indeterminación todo tende cara a unha orde. As cancións infantís, as cancións populares, os xogos, os contos de fadas, a poesía... son formas de existencia ritmicamente organizadas que axudan aos máis pequenos a estruturar a súa presenza no gran caos. Crean a conciencia instintiva de que a orde no mundo é posible e que todas as persoas teñen un sitio único nel. Todo flúe cara a este obxectivo: a organización rítmica do texto, as series de letras e o deseño da páxina, a impresión do libro como un todo ben estruturado. A grandeza revélase no máis pequeno e dámoslle forma nos libros infantís incluso cando non estamos pensando en Deus ou nos fractais.
Un libro infantil é unha forza milagrosa que promove o enorme desexo dos pequenos e a súa capacidade de ser. Promove a súa coraxe para vivir.
Nun libro, os pequenos sempre son grandes, de forma instantánea, e non só cando chegan a adultos. Un libro é un misterio no que se encontra algo que non se buscaba ou que non estaba ao alcance de ninguén. O que non poden comprender as lectoras e os lectores dunha certa idade permanece na súa conciencia como unha pegada e continúa actuando aínda cando non o entendan completamente. Un libro ilustrado pode funcionar como un cofre do tesouro de sabedoría e cultura incluso para os adultos, do mesmo xeito que as nenas e os nenos poden ler un libro destinado a adultos e atopar a súa propia histo ria, un indicio sobre as súas vidas incipientes. O contexto cultural modela as persoas, establecendo as bases para as impresións que chegarán no futuro, así como para as experiencias máis difíciles ás que terán que sobrevivir sen perder a súa integridade.
Un libro infantil representa o respecto pola grandeza do máis pequeno. Representa un mundo que se crea de novo unha e outra vez, unha seriedade lúdica e preciosa sen a que todo, incluída a literatura infan til, é simplemente un traballo moi pesado e baleiro."
                                                                                                                                                                     INESE ZANDERE

Traducción Ana Luna e Antía Marante

 

DÍA DA BIBLIOTECA

Para celebrar o DÍA DA BIBLIOTECA, o alumnado do colexio elaborou marcapáxinas que facían referencia aos contos tradicionais (que imos traballar este curso).

Eses marcapáxinas están expostos na entrada da nosa Biblioteca e polos corredores do Centro.

Grazas a todos e todas por participar e facer visible este día.

Como sabedes, tamén foi o día elixido para poñer a camiñar as "Mochilas Viaxeiras".

Boa andaina lectora!

    

 

FORMULARIO PARA AS FAMILIAS SOBRE A BIBLIOTECA

Estimadas familias: respondendo a este breve formulario e premendo en "enviar", poderemos coñecer a vosa opinión sobre a Biblioteca do Centro. Iso axudaranos a valorar o noso traballo, o seu funcionamento e intentar mellorar na medida do posible.

Agradecemos a vosa colaboración. A data límite para cubrilo é o día 5 de xuño.

Moitas grazas.

 

FORMULARIO PARA O ALUMNADO SOBRE A BIBLIOTECA

Este formulario é para que vós, alumnos e alumnas do noso Centro, expresedes as vosas opinións sobre a nosa Biblioteca. Así poderemos valorar o noso traballo e melloralo na medida do posible.

Só tedes que marcar a opción que consideredes en cada caso e ao rematar, darlle a "enviar".

A data límite para cubrilo é o día 5 de xuño.

Graciñas.

DÍA MUNDIAL DO LIBRO

Como cada ano, o 23 de abril celebraremos o Día Mundial do Libro. 

Para ter un recordo especial deste día, deixamos aquí o texto do pequeno marcapáxinas que, como cada ano, edita a Consellería de Cultura, Educación e Ordenación Universitaria.

É o agasallo sobre o libro e a lectura,  que Rosalía Fernández Rial, poeta galega, fai ás Bibliotecas Escolares de Galicia. Un pequeno texto, fermosísimo, cheo de sensibilidade, para disfrutar hoxe e sempre.

MARCAPÁXINAS COMPLETO

DÍA INTERNACIONAL DO LIBRO INFANTIL

Desde 1967, o 2 de abril, coincidindo coa data do nacemento do escritor danés Hans Christian Andersen, o IBBY (siglas en inglés da Organización Internacional para o Libro Xuvenil) promove a celebración do Día Internacional do Libro Infantil co fin de promocionar os bos libros infantís e xuvenís e a lectura entre os máis novos.

Cada ano unha Sección Nacional elixe un tema e selecciona a un autor ou autora importante  do país co fin de que escriba unha mensaxe para os nenos e nenas do mundo, e a un recoñecido ilustrador ou ilustradora para que deseñe un cartel que se difunde en colexios, bibliotecas, a través dos medios de comunicación, etc.

Aquí tedes o cartel e a mensaxe  deste ano; dúas obras moi fermosas, que nos falan da marabilla da lectura.

Feliz Día do Libro!

Feliz Mes dos Libros!

 

DIA INTERNACIONAL DO LIBRO INFANTIL 2017

MEDREMOS CO LIBRO!

 

"Cando era moi neno gustaba de construír casas con bloques e con xoguetes de todo tipo. No canto do tellado, decotío empregaba un libro infantil ilustrado. Nos meus soños, agatuñaba ao interior da casa, deitábame na cama feita cunha caixa de mistos e ollaba para as nubes ou o ceo estrelado. Dependía da ilustración que máis me gustase.

De maneira intuitiva, seguín a norma vital de cada neno, que procura crearse un medio cómodo e seguro; e un libro infantil de certo axudaba a conseguilo.

Logo medrei, aprendín a ler, e un libro na miña imaxinación comezou a parecer máis unha bolboreta, ou mesmo un paxaro, ca o tellado dunha casa. As páxinas do libro semellaban as ás e crepitaban. Parecía que o libro que xacía na repisa da ventá ía saír voando pola fiestra aberta cara a lugares descoñecidos. Collino e comecei a ler, e o libro comezou a acougar. Logo seguín o libro a outras terras e mundos, expandín así o espazo da miña imaxinación.

Que felicidade ter un libro novo nas mans! Ao principio non sabes de que vai. Resistes a tentación de abrir a última páxina. E que ben cheira! É imposible dividir o seu cheiro nos seus compoñentes: tinta de imprenta, cola... Non, non se pode. Un libro ten un cheiro particular, único e emocionante. As puntas dalgunhas páxinas péganse entre elas, coma se o libro aínda non estivese esperto. Esperta cando comezas a lelo.

Estás a medrar e o mundo ao teu redor está a facerse máis complicado. Estás enfrontándote a preguntas que ningún adulto está preparado para responder. Con todo, é tan importante que compartas as túas dúbidas e segredos con alguén! E velaquí que chega de novo un libro para te axudar. Moitos de nós nos temos sorprendido pensando “este libro vai sobre min!”. E, de súpeto, o personaxe favorito parécese a ti. Ten os mesmos problemas e enfróntase a eles con dignidade. E outro personaxe non se che parece en nada, pero queres que sexa o teu modelo a seguir, queres ser igual de valente ou ter o mesmo enxeño.

Cando un neno ou nena di “non me gusta ler!”, a min dáme a risa. Non lles creo. Seguro que comen xelados, xogan a xogos e ven películas interesantes. Noutras palabras: gústalles divertirse. E ler non é un traballo duro de cara a desenvolver os sentimentos e a personalidade, o que é, antes que nada, é un gran pracer.

E, para iso, especialmente, é para o que os autores escribimos libros infantís!"

Escrito por Sergey Makhotin
Traducido por Sabela González Panizo
Ilustrado por Mikhaïl Fedorov

Powered by Drupal - Design by artinet