Igualdade

Contidos sobre Igualdade

A poeta Rosalía Fernández Rial é a próxima convidada do Clube de Lectura do IES de Valga: xoves 14 marzo ás 16:30 horas

Mér, 13/03/2019 - 12:25 — IES de Valga

A poeta Rosalía Fernández Rial é a próxima convidada do Clube de Lectura do IES de Valga A poeta carballesa Rosalía Fernández Rial vai participar este xoves 14 de marzo, às 16:30h., nunha nova sesión do Clube de Lectura do IES de Valga, onde se vai falar do seu libro Ningún amante sabe conducir. Trátase dunha actividade aberta a calquera persoa con interese na lectura.

Rosalía Fernández Rial (Carballo,1988) é licenciada en Filoloxía e Doutora en didáctica das linguas e expresión dramática pola Universidade de Santiago de Compostela. Estudou e toca o acordeón, fai teatro e, sobre todo, escribe. A súa tese de doutoramento presentada na USC é Expresión dramática e teatral para a clase de linguas no ensino secundario.

Para alén de Ningún amante sabe conducir, publicou os libros de poesía En clave de sol, Átonos, Vinte en escena, Contra-acción e Sacar a bailar.Tamén cultivou a narrativa en Bonus Track e o ensaio en Aulas sen paredes.

Ningún amante sabe conducir

Esta obra foi publicada pola Edicións Positivas em 2014. En palabras do crítico Xosé Manuel Eyré, “a riqueza simbólica trascende o poemario e áchase tamén inoculada na prosa poética e na teatralización, mais o poemario en si responde a unha concepción como road movie, que á súa vez é un subxénero que sempre se asimila á narrativa”.

O Clube de Lectura

O Clube de lectura quere facer un convite especial a todas as persoas da zona interesadas nas súas actividades –mesmo sen teren relación directa co centro- para formaren parte del. A única condición é ter interese e gusto pola lectura. Para este fin poden contactar co responsábel da Biblioteca, Miguel Fernández.

Concentración no IES Valga contra o crime machista acaecido no noso concello

Lun, 11/03/2019 - 18:15 — IES de Valga

Alumnado e profesorado do IES Valga xunto ao alcalde, concelleiras de Igualdade e Educación e outros membros da Corporación municipal, concentrámonos no recinto de entrada ao noso centro para dar lectura a un texto de condena e a un poema. O acto rematou gardando un minuto de silencio en memoria de María José Aboy, veciña do concello de Valga vítima de violencia machista. Máis información nestes enlaces:

https://www.facebook.com/vozarousa/videos/1019849874885038/

https://www.facebook.com/ConcellodeValga/

Exposición "As mulleres filósofas" no IES Valga

Xov, 07/03/2019 - 10:53 — IES de Valga

Nesta semana na que se celebra o venres 8 o "Día Internacional da Muller" temos unha exposición organizada polo departamento de Filosofía co título de "As mulleres filósofas". Completamos esta nova cunha referencia a esta exposición escrita polo profesor de Filosofía do noso centro, Víctor González:

"Dende hai xa varios días paseánse polas aulas, corredores e salóns, non xa no IES de Valga, que tamén, senón pola Historia, as mulleres filósofas. Son facilmente recoñecibles, como Simone de Beauvoir, a existencialista, que leva consigo ese aire de muller ceibe e nos beizos o discurso incendiario: non ten perda. As pitagóricas corren pola pasarela poñendo nas cabezas dos paseantes grilandas de frores, danzando e bailando: da gusto velas. María Zambrano, discípula de Ortega, é aquela sentada no fondo da biblioteca, falando soa, e alí tamén está Eloísa, e ademais a Chatelet... coidado con ela!, o seu discurso, cheo da vida, apaixoado, é tan convincente que ata a Voltaire, o ilustrado, deulle que pensar, e Lou Andreas Salomé, o amor platónico de Nietzsche, quen poidera escoitala!... en fin, hai tantas, Aspasia, compañeira de Pericles e amiga de Sócrates, Hipatia...

Que falta facían!!!"

Alumnado de 4º ESO e 1º Bacharelato de HMC asiste a unha charla da escritora e xornalista Montse Fajardo

Mér, 27/02/2019 - 19:04 — IES de Valga

Na Biblioteca do noso Centro co título “A represión sobre as mulleres tras o golpe de estado do 36”, tivo lugar unha interesante charla a cargo da escritora e xornalista vilagarciá Montse Fajardo. A autora de “Matriarcas”, “Un cesto de mazás” ou "Invisibles" deu a coñecer, ao alumnado de 4º ESO e 1º Bacharelato de Historia do Mundo Contemporáneo, a través das historias dalgunhas mulleres de distintos concellos pontevedreses, a situación da muller neste período histórico e como viron as súas vidas truncadas ou condicionadas a raíz deste tráxico suceso da historia de España; ademais a relatora fixo fincapé na historia do último alcalde republicano do concello de Valga. Por último, suliñou a importancia das mulleres como parte fundamental para coñecermos o acontecido durante a Guerra Civil e a posguerra, por seren “as transmisoras da memoria”.

Silvia Pérez de 2º Bacharelato segunda na X Olimpíada de Xeoloxía, fase galega

Mér, 13/02/2019 - 21:07 — IES de Valga

a O IES de Valga vén de participar con éxito, hoxe mércores, 13 de febreiro, na X Olimpiada de Xeoloxía, organizada pola AEPECT de Galicia. As probas tiveron lugar na Facultade de Bioloxía. Temos que felicitar a nosa alumna de 2° de Bacharelato Silvia Pérez Vidal por acadar o 2 ° premio individual, pasando deste xeito, á fase nacional, probas que se celebrarán en Cáceres o vindeiro 6 de abril. Parabéns!!! ao alumnado do noso centro participante nesta proba e de xeito moi especial a Silvia e tamén, por suposto, a súa profesora Ana Bueno.