Igualdade

Contidos sobre Igualdade

Webinar do alumnado de 4º ESO coa astronauta e investigadora do CNIO, Sara García

Mér, 18/01/2023 - 00:37 — IES de Valga

O martes 17 de xaneiro, na aula de Audiovisuais, o alumnado de 4º ESO asistiu, xunto con alumnado de diferentes centros escolares españois, a unha webinar coa astronauta e investigadora no grupo de Oncoloxía Experimental do Centro Nacional de Investigaciones Oncológicas (CNIO), a leonesa Sara García. Nunha conferencia web, a biotecnóloga e referente española en investigacións sobre o cancro explicou a súa labor como científica, dando a coñecer o día a día no CNIO. Tamén fixo referencia á preparación e ao proceso que a levou a ser seleccionada pola Axencia Espacial Europea (ESA), entre 22.500 candidaturas, como a primeira española en acceder ao posto de astronauta, converténdose co tamén leonés Pablo Álvarez, na primeira española en acceder a esa praza dende fai 30 anos, despois de Pedro Duque.

Conferencia da astrónoma Josefina F. Ling dentro do programa "NIN + NIN -, IGUAIS" para alumnado de 3º, 4º ESO e Bacharelato

Mér, 21/12/2022 - 20:30 — IES de Valga

No Auditorio Municipal de Cordeiro, o alumnado de 3º ESO, 4º ESO xunto co de 1º e 2º Bacharelato, asistiu na mañá do mércores 21 de decembro a unha conferencia de Josefina F. Ling. Esta científica é astrónoma, profesora e investigadora da Universidade de Santiago de Compostela (USC). A relatora centrou a súa charla arredor da Astronomía e mulleres. O acto, organizado polo Equipo de Igualdade, contou coa presenza da secretaria xeral de Igualdade, Susana López Abella xunto coa concelleira municipal de Educación, Carmen Gómez e a vicedirectora do noso centro, Ana Bueno.
Esta actividade, que complementa a Exposición Premios María Josefa Wonenburger Planells, xira arredor do proxecto NIN + NIN -, IGUAIS da Secretaría Xeral de Igualdade que ten como principal obxectivo favorecer o encontro con mulleres senlleiras líderes nos seus respectivos sectores, como a ciencia ou o rural, para que o alumnado de Educación Secundaria Obrigatoria tivese referentes femininos en sectores laborais onde a día de hoxe non existe paridade de xénero e promover a igualdade de xénero no ámbito educativo, concienciando ao alumnado que cada un pode ser o que queira ser, sen importar ser muller ou ser home.

Máis información picando nos seguintes enlaces: concello de Valga, Consellería de Emprego e Iguladade. Máis fotografías do acto picando aquí.

Exposición: Premios María Josefa Wonenburger Planells

Xov, 15/12/2022 - 00:57 — IES de Valga

Durante os últimas días lectivos, deste primeiro trimestre do curso, temos no corredor da planta baixa do noso centro a posibilidade de ollar a Exposición Premios María Josefa Wonenburger Planells dentro das actividades do Equipo de Igualdade. Esta exposición pretende visibilizar e facer chegar á sociedade as contribucións feitas polas mulleres galegas á ciencia e á tecnoloxía, todas elas foron galardoadas co Premio María Josefa Wonenburger Planells, que outorga anualmente dende o ano 2007 a Xunta de Galicia a través da Unidade de Muller e Ciencia. O Premio leva o nome da investigadora e matemática galega María Josefa Wonenburger, unha autentica pioneira e referente feminino internacional no ámbito das ciencias e que foi unha científica adiantada ao seu tempo.

A exposición está enmarcada no proxecto NIN + NIN -, IGUAIS da Secretaría Xeral de Igualdade que ten como principal obxectivo favorecer o encontro con mulleres senlleiras líderes nos seus respectivos sectores, como a ciencia ou o rural, para que o alumnado de Educación Secundaria Obrigatoria teña referentes femininos en sectores laborais onde a día de hoxe non existe paridade de xénero e promover a igualdade de xénero no ámbito educativo, concienciando ao alumnado que cada un pode ser o que queira ser, sen importar ser muller ou ser home.

Alumnado de 3º ESO e de 1º do CB de Agroxardinaría participou no obradoiro 'Seguridade violeta'

Mér, 23/11/2022 - 21:35 — IES de Valga

O alumnado de 3º ESO e de 1º do CB de Agroxardinaría participou no obradoiro "Seguridade violeta" que tivo lugar na mañá do martes 22 de novembro na Biblioteca da Cidade da Cultura en Santiago de Compostela. A actividade enmárcase dentro da reivindicación do Día Internacional da Eliminación da Violencia contra a Muller, que se celebra o 25 de novembro. Neste obradoiro os participantes reflexionaron sobre a maneira na que nos relacionamos con outras persoas, tomando conciencia sobre comportamentos, actitudes e expresións que en moitos casos agochan violencias ou posturas machistas non sempre fáciles de detectar, contribuíndo ademais, a través do debate e a participación activa, á construción de vínculos sans entre as e os adolescentes, desbotando condutas nocivas e prexuízos. Esta actividade foi organizada polo Equipo de Igualdade do noso centro e o alumnado foi acompañado polas profesoras Vanessa Fernández, Paula Otero, Mar Tejero e Sara González.

Alumnado de diferentes niveis participou nun Obradoiro de fomento da Igualdade

Mér, 16/11/2022 - 19:25 — IES de Valga

Entre o luns 14 e o mércores 16 de novembro tivo lugar un Obradoiro de fomento da Igualdade no que participou, en diferentes horas lectivas, alumnado de 1º ESO, 2º ESO, 1º e 2º CB de Fabricación Mecánica e 1º CB de Agroxardinería. Este obradoiro foi impartido por Antía Toimil de FADEMUR Galicia (Federación de Asociacións de Mulleres Rurais). A actividade foi organizada polo Equipo de Igualdade do noso centro.