Xa contamos no noso centro cun punto laranxa contra o acoso e o ciberacoso escolar, tanto físico nas propias instalacións como virtual a través da nosa web (barra lateral dereita).
Este punto, que ten en todos os centros unha imaxe común e uniforme para que sexa perfectamente identificado e accesible, funcionará como unha caixa do correo a través da cal o alumnado poderá comunicar ou denunciar, desde unha posición totalmente anónima, posibles situacións de acoso ou ciberacoso que sufran ou perciban en terceiros.
Para xestionar esta caixa do correo, en cada centro educativo constituíuse un equipo de actuación contra o acoso escolar, que está integrado, entre outros, polo coordinador de benestar emocional e convivencia e orientador do centro. Deste xeito, o alumnado vai contar cun equipo de referencia ao cal dirixirse en caso de que o precise. Ademais, no Protocolo de acoso e ciberacoso, que se vai actualizar, establecerase un procedemento de intervención ante os posibles casos que se coñezan por esta vía.
