Nuns días chega o verán. Chegan os paseos ata a noitiña, os xeados e gozar do sol e a calor. Tamén será tempo de vacacións, este ano máis ansiadas e merecidas que nunca. Para esta última semana recoméndovos varias actividades para traballar esta época do ano.
Realizar actividades de relaxaxión favorece a concentración, mellora a respiración e, algúns exercicios concretos como os da cara e o pescozo, melloran o ton dos órganos implicados na fonación. Aquí tedes algúns recursos para traballala:
1. Conto "Respira"
2. Vídeo de Eugenia Romero "Aprende a relajar cara y cuello"
3. Relaxación "Tranquilos y atentos como una rana"
Cando temos que crear contos ou relatar historias, ás veces resulta difícil pensar os personaxes, lugares ou as accións que van a protagonizar a nosa aventura. A continuación propóñovos uns xogos que de seguro vos servirán de axuda.
1. Ruletas dos contos máxicos.
Para xogar debedes descargalo. Poñede as ruletas en marcha picando tres veces no botón vermello que atoparedes abaixo á dereita. Para detelas debedes darlle dúas veces ao mesmo botón. Xa tedes o personaxe, o lugar e o obxecto que serán os protagonistas da vosa historia.
2. Story cubes.
Picade nos dados e listo! Fixádevos que enriba de cada un deles aparece o papel que terá cada dado na vosa historia.
Para esta semana recoméndovos dous xogos de Pasapalabra. O primeiro é para traballar o fonema RR. No segundo debedes picar a imaxe que comece con cada letra do abecedario.
A conciencia fonolóxica favorece a adquisición e desenvolvemento da lectoescritura xa que permite recoñecer e manipular os sons, as sílabas, as palabras e as frases que compoñen a nosa linguaxe.
A continuación axúntovos algunhas actividades para traballala:
Nas sesións de Audición e Linguaxe dedicamos un tempiño de cando en vez a traballar o sopro. Os beneficios que aporta son:
1. Mellorar a respiración para a fala.
2. Aprender a manexar e controlar o aire ao falar.
3. Adestrar os órganos bucofonatorios que participan na articulación.
4. Optimizar a pronunciación e axudar a consolidar os fonemas.
Para traballar o sopro podedes utilizar materiais como pompeiros, globos, “molinillos”, frauta, harmónica, chifres, “matasuegras”, etc.
Ademais propóñovos facer algunha das seguintes actividades que de seguro vos resultarán divertidas:
Circuítos con plastilina: creades un percorrido con plastilina e soprades unha pelota ata chegar á meta.
Pintar con témperas: diluíde as pinturas en auga ata que queden bastante líquidas. Se non tedes pintura podedes usar colorante alimentario. Soprades cunha palla para pintarlle ao pelo a un boneco, facer monstros... Botádelle imaxinación!
Reciclar unha oveira: podedes pintala de cores, escribirlle números ou palabras e ir saltando de unha a outra soprando, con ou sen a axuda dunha palla.
Nesta ocasión achégovos varios materiais para traballar a discriminación auditiva, unha habilidade que nos permite recoñecer e diferenciar uns sons de outros e que favorece a adquisición e desenvolvemento da linguaxe oral e da lectoescritura.
