Actividades Dinamización |
Un total de 29 alumnos e alumnas responderon á convocatoria dos clubs de lectura que realizou a Biblioteca do centro ao longo deste mes de outubro, que foi reforzada polo profesorado implicado nas aulas e tamén a través da cartelaría nos corredores e na cafetería. O martes 25 reunímonos para coñecérmonos mellor, intercambiar as nosas inquedanzas lectoras e as expectativas ante esta actividade, así como as primeiras impresións sobre os títulos escollidos para iniciar a nosa andaina no curso 2022-2023.
|
||||||||||
O día 29 de novembro participamos na xornada de homenaxe a Olimpio Arca, mestre, escritor e impulsor do teatro na Estrada. O grupo de teatro do noso IES realizou esta magnífica interpretación a partir do texto creado pola profesora de teatro, Cristina, que partiu de varios textos do propio Olimpio para elaborar o guión. A xustiza (ou inxustiza), o apego (ou desapego) polo idioma, o respecto á paisaxe e á diversidade son algúns dos temas sobre os que a xuíza tivo que ditar "Sentenza", que é o título da obra. Parabéns a todo o elenco (alumnas, alumnos e profesoras) polo voso labor.
|
|||
O día 25 de novembro participamos en varias actividades no IES que procuraban a concienciación e a sensibilización de alumnado e profesorado ante este grave problema social: a violencia que se exerce contra as mulleres. O alumnado de 3º e 4º participou na "Estación da Igualdade", unha proposta do CIM da Estrada para os centros educativos da nosa localidade. No IES tivemos actividades nas aulas e na biblioteca para todo o alumnado, que foi participando en pequenos grupos. E, xa para rematar, o alumnado de Proxecto competencial estivo a traballar este tema na aula, e de aí saíron tres interesantes propostas, que poderedes visualizar en breve. O IES Nº1 CONTRA A VIOLENCIA... PORQUE NON É NON!
|
|||
O próximo martes 15 de novembro o alumnado de 4º ESO manterá un encontro con Tamara Andrés, autora de irmá paxaro, poemario editado por Cuarto de Inverno e ilustrado fermosamente por María Montes, polo que mereceu o Premio ao Mellor Libro Ilustrado na Gala do Libro Galego 2020. Ademais, o libro foi finalista do I Premio María Victoria Moreno de Literatura Xuvenil. Como se sinala na presentación editorial da obra, "irmá paxaro é o relato da perda da complicidade entre dúas irmás descoñecedoras de que o golpe máis duro é o paso do tempo". Esta actividade desenvólvese no marco do Programa Encontros Literarios que convoca a Dirección Xeral do Libro e Fomento da Lectura do Ministerio de Cultura e Deporte e é organizada polo Departamento de Lingua Galega e a Biblioteca. |
|||
O martes 25 pola tarde os alumnos e alumas de 1º ESO, para celebraren o Día das Bibliotecas, gozaron da actividade lúdica e cultural A Ruleta das Letras. Dirixidos pola Asociación Anacos, o alumnado dividiuse en diferentes grupos que, para poderen xirar a Ruleta (que ofrecía diversas posibilidades: gañar un comodín, perder quenda, conseguir puntos...) debían contestar axeitadamente a unhas cuestións sobre a lingua e a literatura. Deste xeito ían conseguindo vogais e consoantes coas que encher os paneis, que agochaban o nome de autoras e títulos de obras como As malas mulleres de Marilar Aleixandre, recentemente galardoada co Premio Nacional de Literatura.
|
|||
Esta semana conmemoramos o Día das Bibliotecas Escolares cos alumnos e alumnas de 2º de ESO. Para iso, no IES Nº1 desenvolveuse un taller a cargo de 4 Elefantes, titulado “Eu vou comigo”. Tomando como punto de partida a lectura de dous breves libros da autora e ilustradora Raquel Díaz Reguera (Eu vou comigo e Eu son), o alumnado reflexionou sobre aspectos relacionados coa autoestima, as súas expectativas (e as dos demais), a aceptación de si mesmos, a etiquetaxe social, o sentido de pertenza a un grupo etc. Logo de traballar a comprensión lectora, a imaxinación e creatividade, a capacidade de empatizar cos demais, as actitudes positivas para previr conflitos... chegou o momento de elaborar o traballo grupal, entre todo o alumnado de 2º ESO: a creación dun Mural Collage. |
|||
Hoxe no IES Nº1 vivimos unha xornada especial, ao sermos visitados por un grupo de maiores dunha residencia de Cuntis, que se achegaron ao noso centro para ollar a exposición sobre García Barros. Ao chegaren, foron recibidos polo Equipo directivo, polo comisario da exposición, o profesor Carlos Loureiro, e por un grupo de alumnos e alumnas de 2º de ESO. Estes, coa inestimable axuda do profesor, fóronlles explicando os contidos de cada un dos paneis. Agardamos que servise para acadar un maior coñecemento do escritor Manuel García Barros, un home honesto coas súas ideas (mesmo en tempos ben difíciles) que sempre loitou por mellorar a vida dos seus veciños. Ao rematar, levaron un lote de libros para a Biblioteca da residencia e un folleto explicativo da exposición, elaborado polo Equipo de Dinamización e da Biblioteca do noso IES, así que poderán seguir profundizando na vida e obra deste insigne autor estradense. O IES Nº1 agradece a súa visita, e agardamos que a experiencia resultase enriquecedora para todos eles. Para nós si o foi, sen dúbida. Neste enlace, poderán ler a noticia no xornal: Manuel García Barros encandila aos usuarios da residencia de Cuntis no IES Número 1. |
|||
O pasado 4 de outubro o alumnado de 2º de ESO realizou unha saída para coñecer o Parque Arqueolóxico da Cultura Castrexa de San Cibrao de Las e realizar unha ruta de senderismo polas beiras do río Barbantiño en Punxín. No Castro de San Cibrao, grazas á atención e ao saber facer dos monitores do propio Parque, coñeceron algo máis sobre a forma de vida, os costumes e outras peculiaridades da cultura castrexa. Tamén fixeron os seus piniños na arqueoloxía cun pequeno obradoiro onde aprenderon a desenterrar e catalogar restos arqueolóxicos. Despois da visita ao Parque, realizaron unha ruta de senderismo de 7 km. polas beiras do río Barbantiño, en Punxín, ata a Fervenza do Río Barbantiño Foi unha xornada moi agradable de cultura, educación e lecer, tanto para o alumnado como para o profesorado acompañante. Estas 2 actividades foron realizadas polos departamentos de Dinamización Lingüística, Educación Física, Educación Plástica, Paisaxe e Sustentabilidade e Xeografía e Historia dentro da programación interdisciplinar do PROXECTOTERRA no que participa o IES Nº 1 un ano mais. |
|||
Este venres ás 20.30h, no Teatro Principal, tivo lugar unha nova edición do Parladoiro das Letras coa presenza da escritora Ledicia Costas. O acto contou coa colaboración de alumnos e alumnas dos distintos centros educativos do municipio, entre eles o noso, o IES Nº1. Uxía Seoane e Jéssica Afonso participaron na entrevista á autora, cunha interesante pregunta sobre o libro Infamia, que foi o libro máis lido nos clubs de lectura de Galicia na ESO durante o curso 2019-2020. |
|||
A mostra “Manuel García Barros. Vida, obra e pensamento”, que estivo exposta na Casa das Letras da Estrada, continúa o seu periplo polos centros escolares do municipio, e desta volta chegou ao noso IES, ao Nº1. E así, todo o alumnado e profesorado do Nº1 poderá contemplar os paneis sobre o autor estradense, situados no corredor da última planta. O comisario da exposición, o profesor Carlos Loureiro, será o encargado de presentárllela proximamente aos nosos alumnos e alumnas, e logo emprenderá viaxe cara aos demais centros educativos da localidade. |
|||
O pasado mércores tivo lugar a inauguración da Biblioteca para o novo alumnado de 1º ESO. De maneira simbólica, un alumno cortou a cinta que nos permitiu entrar neste espazo de encontro coa lectura. Logo de atender ás explicacións de como se organizan os libros e de facer algún exercicio de busca, o alumnado foi agasallado cunha pequena festa, na que non faltou o tradicional chocolate con churros. O equipo da Biblio só desexa que, a partir de agora, os alumnos e alumnas veñan con frecuencia para desfrutar de todo o material que ofrece. ÁLBUM COAS IMAXES DO ACTO |
|||
O club de lectura retomou neste curso unha actividade xa tradicional no noso centro: a festa no Recreo Cultural! Todos os que participastes, ao longo do curso, desas lecturas que nos fan nómades, que nos permiten viaxar por lugares e tempos... sen saírmos da casa, puidestes desfrutar dun día extraordinario grazas a Catro elefantes, grazas a Andrea e Julio, que desde o primeiro momento souberon atraparvos cunha volta aos libros deste ano, e foron tecendo e destecendo actividades, xogos para todos e todas vós. O día foi intenso: andaina, xogos de preguntas e respostas, xogos de pistas, sopas de letras... e a procura do acougo coas acuarelas. E despois, mergullarse nas piscinas, o xantar cos amigos e amigas, e os agasallos que as coordinadoras do club escolleron para cada un e cada unha de vós. Agora toca descansar, encherse da enerxía do sol e do verán... e vir con forzas renovadas para enfrontar o novo curso. Vémonos pronto... que as profes xa andan argallando novas lecturas para o próximo ano!
|
|||
O pasado sábado a alumna de 4º de ESO Hiba Lajouad Dyani veu de gañar con este vídeo o concurso de videopoemas organizado pola Casa-Museo Manuel María, que vai xa pola V edición. O xurado seleccionou o seu traballo para a fase finalista de entre máis de 80 presentados, que representaban a alumnado de ESO, bacharelato e ciclos de centros de toda Galiza.
A xornada final, que se celebrou este sábado, comezou ás 11 horas co visionado dos videopoemas finalistas e finalizou coa entrega dos premios aos dous traballos gañadores, entre o que se atopaba o da nosa alumna Hiba. O acto foi moi emocionante, e para nós rematou do mellor xeito posible. Ademais, as persoas asistentes a esta actividade tivemos a posibilidade de facer unha visita guiada á Casa-Museo e descubrir a figura de Manuel María e o seu acervo.
Así que o IES Nº1 agradece, unha vez máis, o traballo do noso alumnado e anima a todos e todas a seguir potenciando o seu talento. E neste enlace podedes ver tamén o outro traballo gañador, dunha alumna do CPI de Xanceda: (40) Parte miña - YouTube
|
|||
O 28 e 29 de abril o alumnado de 2º de ESO participou no INTERCAMBIO COUREL-CAÑÓN DO SIL dentro das actividades complementarias da materia de Paisaxe e Sustentabilidade, grazas ao patrocinio do PROXECTO TERRA, co que colaboramos. O xoves 28 visitamos o Museo Xeolóxico e o Museo Etnográfico de Quiroga, e xa á tardiña fixemos o roteiro cara á Lagoa de Lucenza - Fervenza de Vieiros. O venres 29 disfrutamos dunha visita guiada ao Mirador de Campodola e á Alvariza da Granxa en Santa Eufemia e achegámonos ata a falla de Santa Eufemia, singular punto de interese do Xeoparque. Pola tarde, dirixímonos á Ribeira Sacra, ao embarcadoiro de Doade, para percorrer o Canón do Sil en catamarán. Unha excursión estupenda que o alumnado disfrutou!!! Agradecemos especialmente o labor de Guillermo e Iván, os dous magníficos guías de COUROLEANDO. Con eles aprendimos as singularidades do noso territorio, disfrutamos desa contorna con magníficas paisaxes e pasamos uns agradables momentos, combinando o lecer coa aprendizaxe.
|
|||
Este martes tocou saída para o alumnado de 1º de ESO. As aulas trasladáronse á cidade de Santiago de Compostela, e alí, con guías especializados, fixeron un curso intensivo de ciencias naturais, de historia e de galego. Comezaron no Museo de Historia Natural, onde aprenderon a valorar a biodiversidade, a entender os perigos do cambio climático e a recoñecer o xénero e a especie dos distintos animais. Foron dúas horas que pasaron rapidamente, porque as actividades eran moi didácticas e o museo preséntao todo dunha maneira tan visual, que as explicacións entraban "polos ollos". E o comportamento do alumnado... fantástico!
De aí marchamos a pé cara ao Museo do Pobo Galego (algo de chuvia, camiñata cos amigos e un tempiño para o descanso e recobrar forzas). No Museo puidemos aprender algo da súa historia e ver as magníficas salas que amosan os modos de vida da sociedade galega; é importante coñecer o pasado para entender o presente... Alí, organizados en grupos, resolvemos un xogo de pistas e... camiñata de novo. Xa case eran as tres cando chegamos para xantar. Comida, tempiño de lecer... e volta ao IES.
|
|||
|
|||
O martes á tardiña, o alumnado de 1º de ESO puido coñecer de primeira man os espazos vitais máis importantes para un escritor de noso: Xosé Luna. O propio autor nos acompañou nesta andaina, adobiada cos seus versos, na voz das profesoras e alumnos e alumnas do IES. Foi unha fermosa maneira de adiantarnos ao Día da Poesía, que se conmemora o próximo 21 de marzo.
|
|||
O día 8 de marzo foi o Día da Muller. O IES N1 súmase á celebración, con diversas actividades que tratan de inculcar no alumnado os valores da igualdade, a equidade, a xustiza, en que participan os departamentos de Biblioteca, Extraescolares e Dinamización.
Pero tamén, desde a sensibilidade artística, poñemos de manifesto o empoderamento da muller, con este fantástico traballo do departamento de Plástica, que parte da ollada sensible cara ás mulleres que nos rodean. Son as nosas nais, avoas, irmás ou veciñas. Son mans e rostros que arrastran historias pasadas para facelas presente. Son mans e rostros de luz, para a celebración da Muller.
|
|||
O IES Nº 1 da Estrada deséxalles unhas Boas Festas e un Feliz Ano Novo. Ademais, queremos agradecer o labor da alumna Uxía Seoane, que aínda quita tempo para agasallarnos con este vídeo de felicitación, cheo de esperanza e de bos desexos para estes tempos de incertezas. Moitas grazas e parabéns, Uxía. Voltamos o 10 de xaneiro! |
|||
O IES Nº 1 foi galardoado co 1º Premio na Categoría de Centros e con dous premios individuais no concurso organizado pola Deputación de Pontevedra para homenaxear a figura de Xela Arias.
A nivel individual, concedéronnos un 1º premio para a alumna Helena Castaño e un accésit para Hiba Lajouad.
Parabéns a estas magníficas rapazas e tamén a todos os mozos e mozas que participastes no concurso coas vosas creacións, dunha calidade excelente, merecedora tamén de premio.
A poesía de Xela Arias late nestas novas voces que entrelazaron maxicamente a palabra e a imaxe, como xa fixera noutrora a ousada poeta no seu libro máis transgresor Tigres coma cabalos.
Se picades aquí, poderedes ler a noticia do xornal Faro de Vigo, que recolle a entrega do galardón.
E moito máis importante, aquí tedes a montaxe que recolle todas as vosas creacións.
Desfrutade delas!
|
|||
|
|||
|
|||
Debido ás restricións sanitarias por mor da pandemia que estamos a sufrir, a conmemoración do Día de Rosalía trasladámola ás redes sociais, mantendo o mesmo fin de lembrar a nosa poeta e todos os valores de rebeldía, amor á Terra, compromiso coas emancipacións e celebración da vida que ela representa. E moitas cousas máis das que nos gustaría que nos falases ti para encher un minuto co tema que desexes sobre esta escritora que tanto nos di cos seus versos.
|
|||
Quen dixo medo? Nestes tempos de pandemia, as actividades do IES Nº 1 van collendo rumbo, amodiño pero con paso firme. E o noso alumnado, coma sempre, responde ás nosas propostas con orixinalidade e creatividade. Este vídeo recolle os vosos traballos. De seguro que vos vai encantar!
Parabéns a todos e graciñas por colaborar!
|
|||
Dende o Equipo de Dinamización da Lingua Galega do IES Nº1 da Estrada estamos a facer unha actualización da realidade sociolingüística do noso centro, e para iso precisamos da túa colaboración cumprimentando unha breve enquisa. Grazas pola colaboración!
|
|||
