Skip to Content

Visita ó Tribunal Superior de Xustiza de Galicia

O pasado martes 17 de xaneiro de 2023 o alumnado de 1º de bacharelato visitou o TSXG, nunha saída organizada polo departamento de Filosofía e encadrada no marco do programa "Educar en xustiza".

Á nosa chegada fixemos unha visita guiada polo Palacio de Xustiza, edificio proxectado polos arquitectos Ricardo Boán y Julio Galán que data do 1929. Os estudantes tiveron ocasión de coñecer os espazos máis emblemáticos do lugar, e algúns mesmo aproveitaron a sala de xuízos para resolver os seus asuntos pendentes.

A continuación asistimos a unha clase maxistral da man do presidente do tribunal José María Gómez y Díaz-Castroverde, quen tras explicarnos algúns aspectos básicos do funcionamento do sistema xudicial español, non escatimou tempo en responder a tódalas dúbidas dos nosos estudantes. Esta oportunidade permitiunos de falar sobre as diferenzas entre o Tribunal Constitucional e o Poder Xudicial, as vantaxes de optar polos estudos de Dereito, e mesmo de aclarar as controversias actuais respecto das leis máis recentes do noso país. 

Fase intercomarcal da competición de campo a través

O pasado sábado, 17 de xaneiro de 2023, o alumnado clasificado acudiu ao Parque Deportivo de Acea de Ama para participar na fase intercomarcal da competición de campo a través do programa Xogade, organizado pola Secretaría Xeral para o Deporte da Xunta de Galicia en colaboración coa Federación Galega de Atletismo.

Día da Paz e da Non Violencia

O EDLG convoca dous concursos para festexar o Día da Paz e da Non Violencia

 

1. Convócase un concurso de recitado do poema "Irmaus " De Celso Emilio Ferreiro. 

Consultar as bases

Poema

Premiados

2. Convócase un concurso de nubes de palabras, ou caligramas,  co poema "Irmaus" de Celso Emilio Ferreiro. Todos-as alumnos-as  poden entregar a súa creación no departamento do EDLG antes do  28 de  xaneiro. Todas serán expostas na entrada do centro.

Aquí tes unha aplicación onde é moi doado facer unha nube de palabras. Podes escoller todas as palabras do poema ou só aquelas que consideres máis interesantes (significativas, sonoras, ...) . Despois imprime a túa nube ou manda o teu arquivo  á conta edlg@iesdavidbuján. Se tes algún problema para usar a aplicación pasa polo departamento do EDLG nos recreos que che ensinan a usar a aplicación.

Coa nube de palabras gañadora imprimirase un adhesivo, indicando o nome do alumno ou alumna,  para distribuir  de balde no centro.

Anímate e participa. Haberá grandes e gorentosos premios (diplomas, bocatas, puntos do EDLG, libros, ...)

Concurso musical

 

O EDLG lanza un novo concurso para difundir a música en galego

 

Entra na ligazón, escoita as letras (Sés e Ezetaerre) e completa as letras. Ten en conta que as palabras que precisas para completar o texto van aparecer por orde alfabética.

Despois envía os teus datos (nome, apelidos e curso).

Entre todos e todas que participen sorteranse puntos, bocatas, pereretes e unha camiseta do Rei Zentolo, como a que se exhibe na cortiza do Equipo de Dinamización da lingua Galega.

PARTICIPA 

CONCURSO ABERTO ATA O 30 DE XANEIRO

 

Feirón solidario Nadal 2022

Mércores 21 de decembro  e xoves 22 de decembro esperámosvos no Feirón solidario de Nadal situado ao lado da porta principal do centro. Durante os períodos de lecer, o alumnado organizador de Economía - 4º ESO-B procederán a vender todos os artigos expostos. Non deixedes de visitarnos!

Inauguración da porta de Miguelanxo Prado

O noso instituto desenvolve un programa de salas dedicadas a persoeiros da cultura, da ciencia e da creación, polo que determinadas portas do centro son decoradas con imaxes alusivas a autores/as ou á súa obra. O pasado 11 de novembro de 2022 recibimos a visita do célebre creador de banda deseñada Miguelanxo Prado, que nos acompañou para a inauguración da súa porta, nunha actividade organizada polo EDLG en colaboración coa biblioteca e cos departamentos de Artes Plásticas e Lingua Galega, e co financiamento do programa de Actividades literarias en institutos do Ministerio de Cultura e Deporte.

Para comezar, os grupos de 3º ESO asistiron a unha charla en que o autor falou sobre o seu proceso creativo no mundo da banda deseñada. A continuación, celebrouse o acto de inauguración da porta, que no seu caso é a da cafetaría do instituto. Para finalizar, o autor visitou a nosa biblioteca e obsequiounos coa dedicatoria ilustrada de varias das súas obras.

Campo a través

O pasado venres, 16 de decembro de 2022, o departamento de Educación Física levou o alumnado de 1º, 2º e 3º de ESO ao Parque Deportivo de Acea de Ama para participar na competición de campo a través do programa Xogade, organizado pola Secretaría Xeral para o Deporte da Xunta de Galicia en colaboración coa Federación Galega de Atletismo.

Ao reunir alumnado de 1º e 3º de ESO, esta actividade tamén formou parte do Programa TEI (Titoría entre iguais), para establecer vínculos e fomentar a relación entre as parellas de estudantes. 

Campionato multideportivo

O pasado martes, 20 de decembro de 2022, o departamento de Educación Física do IES David Buján organizou un campionato multideportivo. Ao longo de toda a mañá, o alumnado de 1º de bacharelato do noso centro competiu en diversas modalidades deportivas co alumnado do IES Afonso X o Sabio.

Plan director 2022/2023

Nas últimas semanas, o IES David Buján recibiu en diversas ocasións a visita do persoal da Garda Civil encargado de impartir as palestras do Plan Director para a convicencia e a mellora da seguridade nos centros educativos e nos seus contornos deste curso 2022/2023. Trátase de sesións en que profesionais expertos tratan cuestións como o acoso escolar, as adiccións ou a violencia de xénero dunha maneira adecuada á realidade dos centros educativos.

Onte, 22 de decembro de 2022, levouse a cabo a sesión dirixida ao alumnado de 1º de ESO, en que se tratou o tema da ciberseguridade, cun foco moi especial no uso responsábel e consciente das redes sociais.

Visita de 2º de bacharelato a Santiago de Compostela

O luns, 19 de decembro de 2022 o alumnado de 2º de bacharelato visitou Santiago de Compostela, nunha saída organizada polos departamentos de Xeografía e Historia, Lingua Galega e Literatura, Música, Artes Plásticas e Relixión. Nesta ocasión, visitaron espazos tan emblemáticos como o Pórtico da Gloria da catedral ou o Museo do Pobo Galego.

Esta actividade foi subvencionada polo concello de Cambre.

 

Distribuir contido


by Dr. Radut