Día contra a violencia de xénero

DÍA CONTRA A VIOLENCIA DE XÉNERO: UNIDOS SOMOS MÁIS FORTES (25/11/2018)

    Ademais das actividades que fixemos no colexio para loitar contra a violencia de xénero, este ano participamos nunha iniciativa que partiu de tres colexios de Galicia para unirnos nunha actividade de sensibiliazación a nivel autonómico.

    A proposta consistía en facer un mural en formato twitter co hashtag #Equaliter (igualdade) poñendo as mans dos nosos alumnos e alumnas cunha voz en off dicindo que no noso colexio rexeitamos a violencia.

   Tamén os alumnos de 5º e 6º debían formar unha fila da que saíran primeiro as nenas dicindo "Loitaremos por vivir sen medo" e a continuación os nenos co lema "Nos loitaremos ao voso carón".

    A iniciativa foi un éxito e no seguinte vídeo podedes ver os máis de 65 centros galegos que participamos na proposta (o noso sae no minuto 10); esperemos que esta actividade axude na educación do noso alumnado e que os patróns de violencia de xénero se rexeiten xa desde a infancia.

 

   

DÍA CONTRA A VIOLENCIA DE XÉNERO: TRABALLANDO A IGUALDADE (23/11/2018)

    Para traballar a loita cotra a violencia de xénero, desde a biblioteca puxemos o noso gran de area a través do conto Maruxa de Eva Mejuto contado por tres dos nosos biblioaxudantes.
 
 
   Nesta historia basada na canción tradicional polaca "Maryna gotuj pierogi" Maruxa que está farta de facer todas as tarefas da casa soa, é dicir, SEN AXUDA DE NINGUÉN,  decide dar unha lección ao seu marido para ver se cambia de actitude porque aínda encima de lavar, planchar, recoller, tender a roupa, cociñar, sacar a pasear ao can... aínda encima... Pepiño quere que lle amase pan!!
 

    Pouco a pouco, Maruxa irá conseguindo que Pepiño se de conta do inxusto da situación e de que, tanto o traballo como o lecer, deben ser cousa de dous.

   

Además de escoitalo, tamén vimos a curtametraxe baseada neste libro.

 

    E despois de velo e escoitalo, por que credes que escollimos esta historia?

    Pois porque a loita contra a violencia de xénero comeza por entender que homes e mulleres somos iguais e por tanto, ámbolos dous podemos facer as mesmas cousas e colaborar xuntos para calquera tarefa!!

   Podedes escoitar de novo o conto en Radiuvín nas voces dos biblioaxudantes Laura Gómez, Laura Rodríguez e Pablo.

 

DÍA CONTRA A VIOLENCIA DE XÉNERO (25 - 11 - 2017)

     Desde a biblioteca non podemos deixar pasar o Día contra a violencia de xénero sen tentar loitar contra esta lacra da sociedade.

    Para iso, os biblioaxudantes de hoxe, léronnos o libro Rosa Caramelo de Adela Turin.
   Unha historia na que todas as elefantas da manada desde o seu nacemento só poden comer flores que lles dan unha pel rosada e suave, viven nun xardín pechado xogando entre elas e vestindo zapatiños cor rosa, roupa de cor rosa e grandes lazos rosa nos seus rabos. Mentres, os elefantes machos poden xogar libres, comer herba, revolcarse no lodo e ducharse no río.
   Nesa manada, un día naceu unha elefanta chamada Margarita que non quixo ser de cor rosa, nin comer flores rosas nin levar roupa rosa; e escapou do xardín para xogar coma os elefantes machos. Pouco a pouco, as outras elefantiñas seguiron o camiño de Margarita e hoxe en día, se ves unha manada de elefantes xa non saberás cales son machos e cales son femias porque todos son de cor gris e xogan en liberdade. 

 

   Este conto, serviunos para abrir un debate sobre a igualdade de xénero e os comportamentos que como debemos adoptar: podemos os nenos e as nenas xogar as mesmas cousas? Pode unha nena xogar ao fútbol? Pode un neno xogar ás bonecas?
 
   Preguntas que deberían estar xa obsoletas pero nas que aínda hoxe é necesario incidir.

   Tamén grabamos un vídeo coa canción de Andaluna y Samir, no que rexeitamos todo tipo de violencia e propoñemos o diálogo e a intelixencia como vía de solución de problemas.

DÍA INTERNACIONAL CONTRA A VIOLENCIA DE XÉNERO (25/11/2016)

  Desde o Equipo de Biblioteca, cremos que a nosa biblioteca non pode ignorar esta problemática; por iso quixemos loitar contra ela implicando ao alumnado nun desafío moi actual.

 
   Baixo o título: Pelexa ou aperta? os nosos alumnos aceptaron o reto do "maniquí" (mannequinchallenge) para que o que se paralice sexa a violencia de xénero.
 
 
 
    Ademais do visionado do vídeo, hoxe tamén os alumnos de 5º e 6º compartiron co resto do alumnado un par de contos que fixeron reflexionar aos máis cativos:
 
Preparando as lecturas:  
 
 
Parella guai (Mon Daporta) é un texto sobre a igualdade entre os membros da parella e no reparto das tarefas do fogar
 
 
Nin un biquiño á forza (Marion Mebes) falanos da cantidade de bicos diferentes que hai,
pero que nunca debemos aceptar nada pola forza; nin sequera os bicos.
 
Podes escoitar o conto, no seguinte vídeo

- OBRADOIROS: CARTAS DE AMOR (17 - 11 - 2015)

    Hoxe no centro desenvolvéronse os obradoiros CARTAS DE AMOR impartidos por Dona Gloria Isabel Serrato Azat e promovidos pola Secretaría Xeral de Igualdade a través do Concello de Sober.

 

    Nestes obradoiros traballouse na educación pola igualdade efectiva entre homes e mulleres realizanto actividades co alumnado que lles fixeron reflexionar sobre os roles de cada quen: oficios, xogos, ditos...

 

 

   Os alumnos de Educación Infantil, traballaron a partir do conto "A princesa diferente"

    Hai non moito tempo, e nun lugar non tan afastado, vivía unha princesa que se chamaba Alba Aurora, a cal tiña unha fermosa cabeleira negra a media melena, o suficientemente longa como para que non se lle enredase nas ramas das árbores ás que lle gustaba subir polas mañás para ver o amencer antes que ninguén.

    Alba Aurora era moi delicada e amable; pero tamén moi áxil e deportista e encantáballe ir a escalar todos os sábados montañas ou ir a acampar na praia.

    Un día escoitou un ruído na súa ventá.

    - Quen será? -  preguntouse.

    Era nada máis nin nada menos que o Príncipe Azul que viña a rescatala; segundo lle explicou.

    - Pero a rescatarme de que? - preguntou Alba Aurora

    - Non sei - dixo algo desorientado o Príncipe Azul - quizais dun bruxo malvado ou dun dragón malhumorado ou dun ogro enorme?

    - Pero se non coñezo ningún bruxo malvado, ningún ogro enorme e, peor aínda, ningún dragón malhumorado! Ademais se así fose, seguro que xa houbese encontrado eu mesma a forma de liberarme" - dixo Ala Aurora.

    O Príncipe moi triste ao decatarse de que non tiña que facer nada, dispúxose a baixar pola ventá por onde subira pero Alba Aurora preguntou:

    - Coñeces a muralla chinesa?

    - A muralla chinesa? Pois non! - exclamou o Príncipe.

   E nin ben rematou de dicir que non, ela colleuno do brazo, baixaron xuntos pola ventá, subiron na moto e fóronse xuntos a coñecela.  Así foi como a princesa diferente e o Príncipe Azulforon a percorrer o mundo e se fixeron amigos.

   E colorín colorado, este conto ten comezado...

(Educando en Igualdade. Guía para Educación Infantil

Realizado por FETE - UGT en colaboración co Instituto da Muller e o Ministerio de Igualdade)

 

  Para ver máis imaxes desta actividades preme no seguinte enlace:

GALERÍA  DE   FOTOS

25 - novembro: DÍA CONTRA A VIOLENCIA DE XÉNERO (25/11/2014)

   Para concienciar ao noso alumnado sobre a importancia deste día, cremos que o máis importante a esta idade é empezar por traballar a igualdade entre sexos como base para o respecto aos demais.

   Nestas actividades de fomento de igualdade contamos no centro cun taller organizado desde o noso Concello no que os alumnos visionaron películas que os fixeron reflexionar moito, elaboraron un mural e participaron nunha xincana.

 

  

   Aquí tedes os vídeos que traballamos para que non se vos esquezan. O primeiro sobre a violencia de xénero e a autoestima e o segundo sobre a igualdade.

 

 

 

25 NOVEMBRO: DÍA INTERNACIONAL CONTRA A VIOLENCIA DE XÉNERO

     A violencia contra a muller é un feito recoñecido como un problema social. A ONU en 1993 ratificou a Declaración sobre a eliminación da violencia contra a muller, onde se afirma que esta violencia é un atentado moi grave contra as mulleres e as nenas.

   A data do 25 de novembro como Día Internacional contra a violencia de xénero foi aprobada a proposta da República Dominicana en honor das irmáns Mirabal vítimas deste maltrato.

  

     Desde o centro intentamos concienciar aos nosos alumnos e alumnas sobre a importancia deste tema, e para iso intentamos que adquiran coñecementos básicos sobre a igualdade de xénero que se reflictan no seu comportamento.

    Un modo de achegarnos a este tema foi a través da  oca da igualdade do CIM (Centro de Información á Muller), un xogo da oca adaptado a estes contidos co que os nenos  e nenas aprenderon moitas cousas sobre a historia das mulleres, as súas dificultades ao longo de diversas épocas, os seus logros...

A oca da igualdade  A oca da igualdade

Distribuir contido