Na actualidade estase realizando a restauración das pinturas murais da nave da igrexa de San Xiao de Lobios. Esta restauración inclúe o muro norte, o muro sur e o arco triunfal.

  Esta igrexa do século XIII é un dos exemplos máis importantes da arquitectura tardorrománica da Ribeira Sacra pero as policromías datan do século XVI.

  Para coñecer o proceso de restauración, o alumnado de 5º e 6º de Primaria acudiu hoxe a igrexa onde Dolores Lago Arce, encargada da restauración, lles explicou todo o relacionado con este proceso. 

  Primeiro o desencalado que consiste en raspar con moito coidado as capas de cal que cobren as pinturas e que non nos deixan ver nada máis que unha parede branca.

   Despois explicounos que estas pinturas son frescos, é dicir, que se pintaban con pigmentos cando a cal aínda estaba fresca e directamente sobre o morteiro (capa de cal e area que cobre os muros); por iso, hai zonas máis delicadas onde o morteiro xa se desprendeu ou está a punto de facelo o que intentan evitar inxectando resina ou morteiro.

 

   Ensinounos tamén algunhas das ferramentas que utilizan: bisturís para raspar a cal, xiringas para encher ocos nos morteiros, pinceis para o po, espátulas para dar morteiro... 

   Unha vez que coñecemos algunhas nocións básicas do traballo de restauración, centrámonos nas dúas grandes escenas descubertas ata o de agora: a resurrección de Cristo e o xuízo final no que se observan os condenados ao inferno e os salvados conducidos por San Pedro que leva a chave para abrirlles a porta do ceo.

 

    Tamén se intúe un posible nacemento nunha zona delimitada por un arco debaixo da escena da resurrección xa que se pode ver a cabeza dunha mula e un par de persoas difuminadas que levan a pensar nesta escena da vida de Xesús.

   A outra zona que se está restaurando é a do arco triunfal na que se poden ver debuxos xeométricos, redondeis, flores...  e restos de pinturas máis actuais.

   Se comparamos o que vimos hoxe coas imaxes da última excursión que fixeramos a Lobios podemos ver un gran cambio xa que onde agora hai andamios e comezan a verse as pinturas, antes había unha parede totalmente branca.

Imaxe: abril 2019

    Así que despois desta visita, temos moitas gañas de volver cando remate a restauración e retiren os andamios aínda que Dolores xa nos explicou que só reintegrarán cor puntualmente en zonas moi específicas e non van a pintar nada a maiores do que atopen.

MOITAS  GRAZAS  A  DOLORES  LAGO  POLA  VISITA  GUIADA  

E  AO  CONCELLO  POLA  ORGANIZACIÓN  DA  MESMA!

O alumnado de 3º e 4º de Primaria asistiu a unha charla didáctica ofertada pola Xunta de Galicia, en colaboración con Axega (Axencia Galega de Emerxencias) sobre o 112. 

Visitóunos un dos irmáns bolechas, Braulio e o seu axudante Docento para explicarnos a importancia do 112, o número europeo de asistencia a cidadanía ante calquera tipo de emerxencia (sanitaria, extinción de lumes e salvamento ou seguridade cidadana).

Primeiro, ilustrounos cun vídeo no que o propio Braulio visitaba as instalacións do 112 en Galicia, no que puidemos ver a importancia de non realizar nunca chamadas falsas xa que podemos por en perigro a vida doutras persoas.

Pasámolo xenial e ata bailamos co rap do 112 que comeza tal que así:

   "Estou nunha emerxencia e teño que chamar, pero antes que nada inténtome calmar..."

Para rematar Braulio e Docento, regálaronnos a cada un de nós un conto e un cadernillo de actividades para aprender máis cousas sobre o 112.

Recorda sempre, SÓ CHAMAR ANTE UNHA EMERXENCIA!

    Se recordades, no mes de setembro, grazas a invitación de Noelia e Diego, pais do noso alumno Darío e do noso ex-alumno Héctor; o alumnado do cole participou nunha excursión á Gandería da Casa Escola de Gundivós.

  Nesta visita puidemos coñecer parte do seu traballo dedicado ás ovellas: desde ceibalas ata prepararlles a corte para cando volven do prado; e participar na gravación do programa Cos pés na terra.

  Pois ben, hoxe emitiuse o programa pero se non puidestes velo non vos preocupedes que aquí deixamos algunhas imaxes e o enlace á páxina da TVG.

   En 1948, celebrouse a Primeira Asamblea Munidal da Saúde que estableceu o Día Mundial da Saúde o 7 de abril.

  No colexio, tivemos ao Doctor Manuel Chaos, médico e coordinador do Centro de Saúde de Sober quen estivo falándolle ao noso alumnado do seu traballo e da importancia de coidar a nosa saúde e de previr mellor que curar.

  Deulles consellos sobre a hixiene en xeral e sobre a hixiene bucal, a importancia de lavar as mans, os hábitos saudables de alimentación, a necesidade de facer deporte e o valor das vacinas para manter erradicadas enfermidades das que xa non teriamos que preocuparnos na actualidade.

  Ademais explicoulles as diferentes causas de contaxio dalgunhas patoloxías e a diferenza entre bacterias, virus e fungos.

DESDE  O  CENTRO  QUEREMOS  AGRADERCELLE  A SÚA VISITA  E  OS  SEUS  CONSELLOS,

ESPERAMOS  QUE  OS  NENOS  E NENAS  TOMARAN  BOA  NOTA  DELES!!

 

 

  E repartiunos un boteciño de mel para cada un, un dossier informativo e un globo para os cativos.

 

 

 

   Se vos queredes saber todas estas cousas e máis, podedes esocitar a entrevista que Mara e Gisela lle fixeron nos nosos estudos de radio.

    Hoxe participamos na III ANDAINA ESCOLAR polo CAMIÑO DE INVERNO organizada pola Asociación Camiño de Inverno pola Ribeira Sacra para divulgar este camiño entre os escolares.

    Nesta andaina eramos uns 1000 alumnos da nosa comarca e outras comarcas veciñas pertencentes a 20 centros escolares :

CEIP de Quiroga, Colegio Escolapios, CPR Plurilingüe Fed Torre de Lemos, Colegio Ferroviario, Colexio Novo, CEIP A Gándara, IES Daviña Rey, IES Río Cabe, Escola Oficial de Idiomas de Monforte de Lemos, CEIP de Bóveda, CEIP A Pobra Do Brollón, CEIP Currelos, CEIP Eloisa Rivadulla, CEIP Xoan de Requeixo, IES Val do Asma e, por suposto, o noso!!

   A saída foi en San Paio de Diomondi en O Saviñao, onde comezamos a andar aínda coa néboa da mañá sobre nós.

     A partir de ahí percorremos un tramo costa abaixo que discurre por unha calzada romana con vistas aos codos de Belesar entre bancais e viñedos.

     Cruzando o río Miño por Belesar atopámonos cunha pendente ascendente bastante acusada de 1,5 km ata que chegamos a Adega Vía Romana onde fixemos unha parada tomar un aire e un refrigerio aportado pola organización. Na Adega estaba unha unidade de Onda Cero facendo o seu programa en directo e tamén Televinte gravando un programa especial.

     Cun último esforzo, tamén costa arriba, chegaos ao destino final: San Pedro de Líncora!

    Desde o centro queremos rematar este resumo da actividade de hoxe FELICITANDO  A  TODO  O  NOSO  ALUMNADO  que foi quen de rematar os 6 km de percorrido sen importar as súas duras características!

ESTAMOS  MOI  ORGULLOSAS  DE  VÓS!!

PARABÉNS  POLO  VOSO  ESFORZO  E  POLO  VOSO  EXEMPLAR  COMPORTAMENTO!!

 MÁIS  IMAXES

    Dúas representantes da Fundación Amigos de Galicia, estiveron hoxe na biblioteca falándonos da importancia do voluntariado e da solidariedade para axudar a cubrir as necesidades básicas das persoas carentes de recursos económicos e para acadar a súa integración social.

   Explicáronnos a importancia de campañas solidarias como as que se levan a cabo para recoller material escolar que se reparte a principio de curso ou a recollida de xoguetes polo Nadal. 

    E explicáronnos tamén que os tapóns que recollemos no colexio serven para axudar a nenos e nenas galegos que, por distintas problemáticas, necesitan atención diaria para poder mellorar a súa saúde e cuxas familias contan con escasos recursos.

    Sabedes que para xuntar 12.537 €  que custan 5 traxes de superheroes para nenos con transtornos neuromotores, se necesitan 47.782.453 tapóns?? Pois xa sabedes, se queredes colaborar, seguide traendo os tapóns das vosas casas!!

MÁIS  INFORMACIÓN