25N - Día Internacional da eliminación da violencia contra a muller
Como centro educativo cremos que para loitar contra a violencia de xénero a nosa mellor ferramenta é a COEDUCACIÓN, un elemento fundamental para avanzar na igualdade real entre mulleres e homes e que ademais é un dos obxectivos da Axenda 2030:
En busca deste obxectivo, quixemos facer fincapé na ruptura de estereotipos comezando cunha choiva de ideas: que se lle atribúe ás nenas? e aos nenos? cal sería a opción correcta?
O rosa é de nenas e o azul de nenos?
Os homes conducen mellor que as mulleres?
As nenas levan o pelo longo e os nenos curto?
Os nenos teñen máis forza que as nenas?
...
Despois o alumnado de 5º e 6º de Primaira ilustrou as ideas principais desta choiva e con eses debuxos fixemos un mural no que literalmente rompemos os estereotipos.
Ademais para afianzar este concepto tamén traballamos co libro Que hacen las niñas? Que hacen los niños? escrito por Irene Biemmi, un libro que visibiliza perfectamente que as nenas e os nenos poden facer as mesmas cousas como podedes comprobar no seguinte vídeo que fixemos entre toda a comunidade educativa:
Aínda así, sabemos que a coeducación non é labor dun día polo que no colexio seguiremos traballando para que tanto os nenos como as nenas entendan a importacia de loitar para acadar unha ruptura real dos estereotipos de xénero e unha igualdade efectiva entre eles.
AS FAMILIAS CONTAN: FAMILIA DE EREA (24/11/2023)
Hoxe estreamos a actividade As familias contan deste curso 2023 - 2024 coa Familia de Erea.
Estando colgada daquela rama a Stelaluna pasoulle algo sorprendente: atopou a súa nai!
Desde ese momento comezou a vivir con ela e aprendeu como viven os morcegos de verdade.
De alí a uns días, Stelaluna foi buscar aos seus amigos paxariños para ensinarlles como é realmente a vida dos morcegos e con ese intercambio, todos aprenderon que é posible ser amigos a pesar das diferenzas.
Se vos quedastes con ganas de saber máis sobre a historia de Stelaluna, podedes escoitar todo o libro no seguinte podcast xa que Silvia e Erea estiveron en Radiuvín para gravalo.
MOITAS GRAZAS AS DÚAS POR VIR A LERNOS ESTA HISTORIA COA QUE APRENDEMOS TANTO SOBRE INTEGRACIÓN, DIVERSIDADE E RESPECTO!!
CLUB DE LECTURA (3 / 2023 - 2024)
Hoxe tivemos a segunda sesión do club de lectura dedicada ao libro Mitos e Lendas da Ribeira Sacra, escrito por Dani Viéitez e Iria Iglesias.
Nesta sesión cada membro do club fixo a exposición correspondente a lenda que tiña asignada para hoxe.
Unha posta en común moi interesante na que dos demos conta de que as lendas non son tan doadas de entender así que aproveitaremos a próxima sesión cos autores do libro para solucionar todas as dúbidas que nos quedan.
XI SEMANA DA MÚSICA: A PERCUSIÓN (22/11/2023)
Esta é a décimo primeira Semana da Música que celebramos no colexio con motivo de Santa Icía, patroa da música.
A actividade completouse cun concerto didáctico na biblioteca a cargo de Alba Varela Losada, ex-alumna do noso colexio e, na actualidade, alumna en prácticas. Ela, como percusionista, puido explicarlle a todo o alumnado os aspectos máis importantes dos instrumentos que forman esta familia: clasificación, tipos de sons que poden producir, técnica instrumental, tipos de baquetas, instrumentos de pequena percusión...
Despois Alba foi a encargada de facer entrega dos agasallos aos participantes no certame de investigación e os premios aos que mellor o fixeron.
DÍA INTERNACIONAL DA INFANCIA - DÍA DOS DEREITOS D@S NEN@S (20-11-2023)
O 20 de novembro conmemórase o Día Internacional da Infancia porque nesta data, en 1989, se firmou a Convención sobre os Dereitos dos nenos e das nenas; un texto no que se recollen os dereitos da infancia, as medidas de protección e os coidados que necesitan xs menores de 18 anos.
Para conmemoralo e dar a coñecer este día, decidimos centrarnos no decálogo que resume o texto da convención porque abarcala toda é moi difícil. Así que o que fixemos foi repartir estes dez dereitos principais a 10 grupos de nenos e nenas de xeito que cada grupo tiña que ilustrar nun vagón o dereito que lle correspondía.
Despois o alumnado de Infantil foi o encargado de decorar a locomotora que tirara por todos eses vagóns.
OBRADOIRO: INSTRUMENTOS DE PERCUSIÓN (19/11/2023)
Xa que estamos desenvolvendo un proxecto sobre a familia dos instrumentos de percusión, decidimos propoñerlle ao alumnado de Primaria uns obradoiros para que realizasen os seus propios instrumentos.
O reto era conseguir facelos seguindo uns titoriais moi sinxelos, serán capaces??
Comezamos cunhas maracas...
E seguimos cuns pratos que imitan o son das ondas do mar...
VISITA DO ALUMNADO DE 1º CURSO DO GRAO DE ED. INFANTIL
Por segundo ano alumnos e alumnas de 1º curso do Grao de Educación Infantil da Facultade de Ourense acompañados por varios mestres e mestras viñeron a coñecer a realidade do noso centro educativo.
Para un mellor desenvolvemento da actividade, xs universitarios dividíronse en 5 grupos para pasar por 5 puntos diferentes do noso colexio: a biblioteca, o espazo croma, a radio e as dúas aulas de Ed. Infantil.
Nas aulas de Ed. Infantil puideron coñecer ás nosas crianzas e a diferente metodoloxía de traballo que se leva a cabo entre Infantil A que é unha aula mixta (3 e 4 anos) e Infantil B (aula de 5 anos).
Na biblioteca biblioaxudantes de 5º e 6º de Primaria tiñan preparada unha intervención con información sobre a organización da mesma (Lectuvín, a CDU, espazo creativo...), as actividades que facemos, o seu labor como biblioaxudantes e todos os recursos e materiais que se poden atopar nela.
Nos estudos radiofónicos de Radiuvín, outro grupo de biblioaxudantes explicáronlles como se grava, como funciona o programa editor de audio e ata lles fixeron unha pequena entrevista.
No espazo audiovisual do croma, tres biblioaxudantes recibían aos futuros mestres e mestras para explicarlles como se utiliza esta técnica e as súas aplicacións didácticas: pero non só de forma teórica xa que puideron facerse varias fotografías e gravar algúns vídeos.
MOITAS GRAZAS POR VIR A COMPARTIR CON NÓS ESTA MAÑÁ,
ESPERAMOS QUE VOS GUSTARA A VISITA!!
CLUB DE LECTURA (1 / 2023 - 2024)
Comezamos as reunións do club de lectura VIAXANDO POLAS LETRAS do curso 2023 - 2024!
Unha aventura lectora que empeza con moita forza xa que se apuntou todo o alumnado de 5º e 6º de Primaria.
Nesta primeira reunión, os membros do club cubriron unhas enquisas iniciais para establecer o punto de partida: que esperan do club e das reunións, os seus gustos e hábitos lectores...
VÉMONOS NA SEGUINTE SESIÓN!!
CARTAS DENDE A RÍA (8/11/2023)
Esta semana xa nos chegaron as súas primeiras cartas e, como podedes ver, o noso alumnado está moi emocionado con elas e poñendo xa a mente a traballar para contestarlles canto antes!
MAGOSTO 2023 (3/11/2023)
Novembro é o mes dos magostos e das castañas e no cole fixemos o noso propio magosto!
Podedes ver máis imaxes deste día no seguinte enlace:
- « primeira
- ‹ anterior
- …
- 5
- 6
- 7
- 8
- 9
- 10
- 11
- 12
- 13
- …
- seguinte ›
- última »