O 20 de decembro, os nenos/as do noso cole disfrutaron das actuacións de teatro, contos e panxoliñas que tiñan preparadas os seus compañeiros de 4º, 5º e 6º.

Abriuse o telón coa representación teatral "Isto non é un conto" por parte do alumnado de 6º. Despois interpretarían a coñecida panxoliña "Vive le Vent" ou "Jingle Bells" nas dúas linguas estranxeiras que estudan este curso. 

A continuación, os compañeiros de 5ºB representaron "O misterio de Papá Noel" e relatáronnos o conto "Qué bonito é o Nadal!".

De seguido, un grupo de alumnas de 4º que acude os venres a Let's Sing A Song cantaron "We wish you a Merry Christmas"

O broche final puxérono os músicos do cole dirixidos pola profe Begoña con "Adestes Fideles".

Foi un gran día! Moi bo traballo rapazas e rapaces!

Hoxe martes, os alumnos e alumnas de 3º ciclo de Primaria amenizaron o recreo contando historias de nadal que eles mesmos crearon a todo aquel que se achegou á biblioteca. Ademais, houbo unha deliciosa sorpresa. Ummm!

  Perdíchelo? Pois mañá repetimos! Esperámoste de 12:30 a 13:00 na biblioteca.

O pasado mércores tivo lugar no Salón de actos do noso centro unha charla, dentro do Programa de accións formativas que desenvolven a Garda Civil e Voz Natura, sobre a prevención de incendios forestais.

O alumnado de 5º e 6º de Primaria, coa axuda de Óscar, o axente da Garda Civil, concienciouse sobre o grave dano que estes lumes ocasionan nos nosos ecosistemas.

O pasado mércores 28 de novembro o alumnado de 5º visitou o Parlamento de Galicia.

Álbum: Curso 2018 - 2019 -> 5º visita o Parlamento

Especialistas do Colexio Profesional de Enxeñería en Informática de Galicia (CPEIG) achegaranse nos próximos días ao noso centro para impartir un curso de introdución ao pensamento computacional e á linguaxe de programación Scratch. Esta actividade, de carácter voluntario, está dirixida ao alumnado de 6º de Primaria e terá unha duración de 10 horas repartidas en varias xornadas fóra do horario lectivo. Con ela preténdese que o alumnado adquira as habilidades que lle permitan incorporar a programación a aspectos como a creatividade ou a resolución de problemas. 

O alumnado de 5º e 6º desprazouse este martes ata Santiago para asistir á representación teatral "Dos Contos ás Contas" no auditorio da Fundación A Banca. Alí coñecemos a María, unha nena inqueda e soñadora, á que lle encanta ler. Tamén ao seu aventureiro tío e ao seu pai, máis preocupado polos estudos e responsabilidades da súa filla. 

Hoxe os rapaces de 6º compartiron as súas historias de medo cos compañeiros e compañeiras de 1º, 2º e 4º de Primaria na biblioteca. Ata Nica estaba asustada. 

Mañá máis contos de Samaín. O terror está servido, veremos se es atrevido!

O pasado xoves, tivemos dous pandereteiros de luxo en "Botamos un baile?", Lucía e Uxío de 6º.

E como non todo é bailar, houbo tempo para riscar as pandeiretas e botar unhas coplas. Lucía deleitounos cos seus toques de pandeireta e Uxío deixounos abraiados coa súa voz cantando unhas estrofas de Xabier Díaz (o seu artista preferido).

Colgamos o video na nosa conta de twitter e cal foi a nosa sorpresa, que o primeiro "like" foi do  mesmo Xabier Díaz que tamén deixou un comentario para Uxío. 

O pasado venres, 19 de outubro, o alumnado de 5º e 6º de Primaria desprazouse, xunto cos seus mestres, ata o Teatro Principal en Santiago de Compostela. Alí asistiron ao espectáculo Réquiem por un monicreque, representación do crime que sucedeu no teatro Scala de Milán ao finalizar o V acto da ópera Romeo e Xulieta. O traballo escénico amosa a dobre visión dunha mesma escena: dende o punto de vista do público e dende o backstage. Ao finalizar a mesma, o mestre Kukas e o seu equipo explicáronlles aos alí presentes o funcionamento das marionetas e o traballo e esforzo que supón levar a cabo unha representación coma esa. Tamén contestaron a todas as preguntas do noso alumnado.

Tras unha paradiña para merendar na Praza da Quintana e un pequeno paseo polas rúas da zona monumental compostelá, volveriamos ao colexio.

Álbum: Curso 2018 - 2019 -> Monicreques Kukas

A educación non pode quedar á marxe dos avances que se están producindo nas Tecnoloxías da Información e a Comunicación (TIC). Estamos na era da dixitalización e dende o CEIP Plurilingüe de Sigüeiro esforzámonos por mellorar a Competencia Dixital do noso alumnado con diversas accións:

e-Dixgal: o alumnado de 5º de Primaria utiliza a diario cadanseu portátil convertible para acceder aos contidos curriculares de todas as áreas.

Snappet: o alumnado de 6º de Primaria emprega as tablets e contidos da editorial dixital Snappet.

Programación e robótica: O alumnado de 4º e 6º de primaria realiza talleres mensuais de programación e robótica na aula STEAM. 

Álbum: Curso 2018 - 2019 -> edudixital