Complementarias

Acto na Biblioteca para conmemorar o "Día Escolar da Non Violencia e a Paz" 2024: "Música pola Paz"

Mar, 30/01/2024 - 22:08 — IES de Valga

O martes 30 de xaneiro, durante o segundo recreo conmemoramos o "Día Escolar da Non Violencia e a Paz", fundado en 1964 polo poeta e pacifista mallorquín Llorenç Vidal en homenaxe a Mahatma Gandhi no aniversario da súa morte ocorrida o 30 de xaneiro de 1948. Este curso os departamentos de Filosofía, Relixión e Música co seu alumnado e en colaboración coa Vicedirección realizaron un emotivo acto na Biblioteca: "Música pola Paz".

A actividade comezou coa lectura dun manifesto lido polas alumnas de 1º Bacharelato Ana Sanmiguel e Carla Herrero en prol da Paz. O acto continuou coa lectura de dous poemas a cargo do profesor Avel Turnes, a interpretación de dúas pezas musicais por parte do alumnado de Música de 4º ESO e 1º Bacharelato: "Hey Brother" de Avicii e "La salvación" de Arde Bogotá; finalizando este acto coa proxección dun vídeo elaborado polo alumnado de Filosofía de 1º Bacharelato. Tamén destacamos a pancarta alusiva a esta conmemoración realizada polo alumnado de Relixión e a exposición, que se pode ollar no corredor da planta baixa, de pombiñas-compromisos pola Paz realizadas polo alumnado.

Actividades fin do primeiro trimestre

Sáb, 23/12/2023 - 21:18 — IES de Valga

O xoves 21 de decembro tiveron lugar no noso centro diferentes actividades como limiar das vacacións do Nadal e remate do primeiro trimestre. A mañá comezou cun Torneo de Xadrez na Biblioteca, no que participaron 30 alumnas e alumnos de diferentes niveis. O gañador foi Siro Castro de 3º ESO, seguido de Xián Bouzón de 2º Bacharelato e Jesús M. Lafuente de 4º ESO. Os premios aos gañadores foron entregados polo profesorado Laura Souto e Víctor González.
No patio cuberto tiveron lugar o resto das actividades, comezando coa actuación do alumnado de Música que interpretaron “Músicas do mundo”, dirixidos polo seu profesor Ismael Cabaleiro. Ao final da actuación houbo un momento para a despedida por xubilación do noso compañeiro, profesor de Filosofía e coordinador dos clubs de lectura, Víctor González Zuñiga.
A continuación, repartíronse uvas entre os asistentes para celebrar o “fin de trimestre”, coméndoas a ritmo das tradicionais doce badaladas. Este acto precedeu a un disputado encontro de baloncesto entre o equipo do alumnado e o profesorado, con vitoria do profesorado.
Despois tocou a hora de repoñer forzas cunha chocolatada, xentileza da ANPA. E tras ese paréntese, finalizamos cun karaoke por parte de alumnado de Lingua Galega de 3º e 4º ESO, aínda que o momento máis emotivo foi a despedida ofrecida ao profesor Víctor González por parte do resto do claustro interpretándolle unha versión moi particular da canción de Alaska e Dinarama: “El Rey del Glam”. Foi o colofón para esta maratoniana mañá de actividades. Bo Nadal!!! a toda a comunidade educativa do noso centro.

O alumnado dos Ciclos Básicos de Soldadura e Agroxardinería dan a benvida ao Nadal 2023

Xov, 21/12/2023 - 01:47 — IES de Valga

O alumnado de 1º Ciclo Básico de Soldadura e Caldeiraría e de 2º de Agroxardinaría e Composicións Florais prepararon estes días unha decoración de Nadal para a Biblioteca e a entrada ao corredor da planta baixa do noso Centro, asesorados polo profesorado Iria Villar e Luciano Rodríguez. Parabéns!!! polo traballado realizado a alumnado e profesorado.

Exposición : "Cambio Climático. O noso mundo, o noso futuro, a nosa opción"

Mar, 05/12/2023 - 22:01 — IES de Valga

Durante os últimas días lectivos, deste primeiro trimestre do curso, temos no corredor da planta baixa a posibilidade de ollar a Exposición: "Cambio Climático. O noso mundo, o noso futuro, a nosa opción". A exposición consta de 19 paneis e está baseada no proxecto CLARITY - Acción Educativa polo Clima- que pretende contribuír ao coñecemento do fenómeno do cambio climático, as súas causas e as respostas que se están propoñendo para facerlle fronte.

Ademais preténdese dar a coñecer o problema ambiental do cambio climático, informando sobre as súas causas e consecuencias a nivel global e tamén en Galicia. A exposición tamén intenta estimular a participación e reflexión, propoñendo novos comportamentos comprometidos e accións positivas co clima que loiten contra o cambio climático e fomenten un desenvolvemento máis equilibrado, social e ambientalmente.

Esta producida polo CEIDA e INEGA coa colaboración da Consellería de Innovación e Industria, a Dirección Xeral de Desenvolvemento Sostible da Consellería de Medio Ambiente e Desenvolvemento Sostible, o Ministerio de Medio Ambiente, a Alianza del Clima e a Dirección Xeral de Medio Ambiente da Comisión Europea.

Día Internacional da Eliminación da Violencia contra a Muller no IES Plurilingüe de Valga

Lun, 27/11/2023 - 00:59 — IES de Valga

Con motivo do “Día Internacional contra a Violencia Machista”, 25 de novembro, a comunidade educativa do IES Plurilingüe Valga celebrou, o venres 24 de novembro, un acto para manifestar o seu rexeitamento en contra de calquera violencia exercida sobre as mulleres e sensibilizar ao alumnado contra esta lacra social. O patio cuberto foi o escenario da actividade programada, centrada na representación da escaleira de violencia a cargo de alumnado de 2º e 4º de ESO, 1º e 2º do Ciclo Básico de Agroxardinaría, 1º de Bacharelato, así como alumnas do Ciclo Básico de Fabricación e Montaxe. Ademais, en representación do alumnado e profesorado, a alumna Carla Herrero e o profesor Fran Godón recitaron varios poemas relacionados con esta celebración. O acto foi conducido pola profesora Maruxa Barca e, contou co acompañamento musical do alumnado de Música de 4º ESO e 1º Bacharelato, dirixidos polo profesor Ismael Cabaleiro, que versionaron as cancións "Que nadie" de Manuel Carrasco e "A porta violeta" de Rozalén. A actividade foi organizada polo Equipo de Igualdade xunto a Vicedirección.