Debido a unha reestruturación da biblioteca esta permanecerá pechada durante un tempo, pero non renunciamos ás nosas xuntanzas do club e decidimos reunirnos no recibidor, diante da biblioteca.
Aínda que non nos resultou moi cómodo, o lugar era o de menos, o interesante está nos libros, neste caso no novo manga que nos convocaba: The promised neverland.
O que máis destacou a rapazada do volume foi o cambio de sentido da trama: comezaba desenvolvéndose nun lugar idílico, unha típica historia feliz e, de súpeto e por un descoido, descóbrese o que se agocha detrás desa fachada. A intriga, o misterio e o descoñecido atrapounos ata o remate da obra e deixounos con ganas de máis pois quedaron no aire moitas incógnitas por despexar.
O argumento do manga deu pé a tratar temas como o machismo, o valor do material, o egoísmo fronte á solidariedade, as prioridades de cada un e, en definitiva, a cuestionarnos que estamos dispostos a facer para manternos con vida: A custa de que? Todo vale? Salvámonos se nos salvamos nós sos?
Para a próxima reunión, xa en decembro, continúa a acción co manga Jojo's bizarre adventure, de Hirohiko Araki.
