Xa levamos unhas sesións do noso proxecto "Entendéndo-nos", dentro da liña CON-VIVE de Contrato Programa. Estamos reflexionando e aprendendo un montón de cuestións sobre a convivencia. A través do conto "A Lebre e a tartaruga", cocluímos que todos temos dferentes cualidades pero todas son necesarias e un grupo con diversidade de cualidades é máis enriquecedor. Con vídeos, imaxes ou mesmo xogos descubrimos moitos aspectos útiles para mellorar a convivencia. Por exemplo estivemos reflexionando a partires dun debuxo de dous burros atados de maneira que cada un miraba para o lugar oposto do outro. Diante de cada un, a certa distancia tiñan comida; como poder collela se ámbolos dous tiran para diante? Non hai maneira de poder comer, un tira polo outro e non poden avanzar. Hai que ceder, se ambos ceden ambos comen!

Hoxe, coincidindo coa celebración da Paz, tivo lugar no cole a segunda das charlas da Garda Civil, para o alumnado de 5º e 6º de Primaria, dentro do Plan Director para a Convivencia e a  mellora da Seguridade nos Centros. A través da interpretación con roles diversos, o alumnado puido achegarse aos sentimentos que pode experimentar alguén acosado. Estiveron reflexionando sobre varios aspectos das súas relacións e sobre o dano que poden causar cando non tratan axeitadamente a algún compañeiro/a. Foi moi interesante.

Hoxe estivemos falando na clase do Día da non violencia e da Paz, 30 de xaneiro; aniversario da morte de Mahatma Gandhi. Lembramos a unha das grandes traballadoras pola Paz, Teresa de Calcuta, á que se lle otorgou o  Premio Nobel de la Paz en 1979.

Hoxe botou a andar o noso proxecto "Entendéndo-nos" da psicóloga Montse Lata, experta en Mediación, dentro da liña do Contrato Programa Con-Vive. Leváronse a cabo dúas sesións co alumnado de 5º e 6º respectivamente, no salón de actos. Montse fíxonos saber que os conflictos non se poden evitar e debemos aprender a sacar o bo deles. 

Destas sesións tiñan que saír tres nomes de cada grupo, elixidos polos propios compañeiros/as. Estes serían os/as que asistirían ás sesións de formación para ser mediadores. Que características debían de cumprir? Pois entre todos apuntamos varias, queriamos alguén que nos escoitara con atención, que non nos xulgara, que empatizara con nós, que fose positivo, que tivese sentido do humor... 

O vindeiro MARTES, 21 DE XANEIRO, terá lugar no salón de actos do colexio unha charla para as familias, sobre ACOSO ESCOLAR. Será ás 18:00 horas e estará impartida por RAMÓN MOLINA GÓMEZ. Está promovida pola ANPA en colaboración co Centro Autonómico de formación do profesorado (CAFI).

A semana pasada 25 alumnos/as de 6º de Primaria participaron nos programas de inmersión lingüística de outono da Consellería de Educación "English Week". 

O domingo desprazámonos ata o Centro dos Peares, onde nos aloxamos e coñecemos a todos os compañeiros/as e monitores/as que nos acompañarían durante a semana. Esa mesma noite, trala cea, tivemos xogos de presentación.

Ao día seguinte comezaban as clases e os obradoiros divididos por grupos: Plastic Bags, Soda Cans, Glass Bottles, Paper Sheet, Carton of Milk, Thermometers, Old Monitors, Electronic Boards... A temática das actividades era o coidado do medio ambiente (a reciclaxe, as enerxías renovables...) e o Nadal.

O martes saímos de excursión pola contorna. Vimos onde se xuntan os ríos Miño e Sil e aprendemos un montón de cousas sobre as centrais hidroeléctricas. O mércores recibimos a visita de Carmen Pomar, Conselleira de Educación, que se interesou polo noso traballo. O xoves, entre outras actividades, gravamos un lipdub coa panxoliña All I Want for Christmas is You de Mariah Carey.

O venres, cada equipo presentou un proxecto sobre o traballado: obras de teatro, videos, calendarios de advento ecolóxicos, trineos mariños para recoller o plástico dos nosos mares... Ese mesmo día, intercambiamos agasallos co noso amigo invisible (Secret Santa presents), todos eles elaborados con material de refugallo.

O sábado, entre bágoas, tocou despedirse dos amigos/as e monitores. Ademais da equipaxe, as nosas mochilas viñan cheas de aprendizaxes, experiencias, aventuras e sobre todo... novas amizades!

Álbum: Curso 2019 - 2020 -> English Week

No CEIP Plurilingüe de Sigüeiro tamén conmemoramos o Día Internacional contra a Violencia de Xénero decorando unha árbore entre todos os grupos do centro. Podedes vela na entrada do cole!

Durante o día de hoxe, luns 25 de novembro, no colexio conmemoramos o Día Internacional contra a Violencia de Xénero asistindo á biblioteca para desfrutar dun vídeo onde participaron todos os alumnos e todas as alumnas do centro.

A canción escollida foi "Dramas e Comedias", do grupo Fangoria.

Aquí o tedes!

O venres 22 de novembro, tivo lugar no salón de actos do noso centro a primeira das catro charlas que nos ofrecerá a Garda Civil, para o alumnado de 5º e 6º, dentro do "Plan Director para a Convivencia e a mellora da seguridade nos centros educativos e os seus entornos". Neste caso, a temática xirou arredor da violencia de xénero. A educación é unha ferramenta fundamental para a eliminación da violencia contra as mulleres. Falouse de cuestións tan importantes como o respecto, a tolerancia, a confianza ... e comprendemos que mozos e mozas somos iguais e temos os mesmos dereitos.

O vindeiro luns, 25 de novembro, terá lugar no salón de actos do colexio unha charla para as familias, sobre Violencia de xénero. Será ás 17:00 horas. Está promovida pola ANPA en colaboración co Centro Autonómico de formación do profesorado (CAFI).