O século XXI debe ser o século da igualdade da muller. Contribuamos a que o sexa.   António Guterres

No noso centro levamos a cabo varias actividades para lembrar e reivindicar a igualdade entre homes e mulleres.

Coma cada curso, a ANPA organizou unha actividade na que participou todo o alumnado que quixo, escribindo o nome das mulleres da súa familia nunha folla, que despois formou parte dalgunha das tan necesarias árbores para a nosa vida, en relación co noso proxecto de centro do actual curso "Os bosques".  

Rematada a semana dos mandados, na que cumprimos fielmente co que o señor Antroido, este ano a señora Árbore, nos indicou; chegou o día grande!

E aló imos todos; caracois, paxaros, árbores, xoaniñas, píntegas, escornabois, raposos... Todo unha fraga do CEIP plurilingüe de Sigüeiro, a desfilar polo pobo e xuntarnos cos nosos compañeiros e compañeiras dos outros colexios do concello. 

De volta ao cole, a comer filloas, orellas...! E a xogar, que ben o pasamos!!!

GRAZAS a todos e todas os que nos axudaron para poder celebrar o antroido dunha maneira tan divertida: a papás e mamás que puxeron música en vivo coa gaita e pandeireta e que nos fixeron filloas alí mesmo no cole (todo un luxo), á ANPA que nos acompañou no desfile portándonos a pancarta, ao concello que nos brindou a súa axuda a través dos membros de protección civil... Sen a vosa axuda, todo iso non sería posible.

Os días 6 e 7 deste mes o alumnado do 1º ciclo de primaria fixo unha visita guiada ao Museo de Historia Natural da USC. Alí puideron coñecer máis sobre os animais e o seu hábitat así como algunha curiosidade que lles chamou a atención. Por exemplo, sabiades que a curuxa caza pola noite porque o seu voo é silencioso debido a que o vento non penetra entre as fibras das plumas? Ou que o cuco é un paxaro moi listo que pon os ovos no niño doutro para que llos coide? Ou que as píntegas, que viven en lugares húmidos, se andan pola zona é un bo indicador de que a auga está limpa?

Sen dúbida a visita foi do máis interesante porque, ademais, puideron ver diferentes minerais e ata observar varias pedras preciosas adentrándose nunha grande caixa forte!

Chegou o día! Pola nosa biblioteca pasou Gloria e Tomi "Mamá Cabra". Interpretaron temas do seu libro CD "A fraga do meu avó", ademais dalgún outro, como o tan coñecido "Glu glu glu plas plas plas navegando polo mar", do que nos contou que naceu nunha aula de Infantil do noso cole. Divertímonos un montón e soubemos que as fragas están cheas de vida e de moitas curiosidades. Falounos do peto, da pega marza, da píntega, das augas dos ríos ou das fontes, das prantas que curan... E para rematar agasallámolas cunha árbore autóctona para que levasen á súa fraga, unha faia. Queremos que medre moito e que cando a miren lembren ao CEIP de Sigüeiro. GRAZAS por visitarnos!

Xa temos nova data para a visita de MAMÁ CABRA ao noso cole. Será o vindeiro martes 28 de xaneiro a partir das 17.00 h na biblioteca. Presentarán "A fraga do meu avó", un libro CD con contos, lendas e cancións relacionadas cos bosques e co noso proxecto documental integrado.

Este martes e mércores, días 21 e 22 de xaneiro, visitaron o cole un grupo de bombeiros do Distrito Forestal de Ordes. Con eles puidemos ver o funcionamento de varios dos seus aparellos de traballo entre os que se atopaba o seu camión!

Tamén nos deron a coñecer moita información interesante sobre o coidado dos nosos montes.

Cada día imos coñecendo máis os nosos bosques, sobre todo os que temos máis preto. Grazas a este libro podemos identificar as árbores e animais que habitan nas nosas fragas, na devesa, na carballeira e no souto.

Todo se aprende mellor cunha exposición divertida e amena. Ademais aprendemos algo moi importante:

"Non se pode defender o que non se ama

e non se pode amar o que non se coñece"

NOVO AVISO:

Queda cancelado o concerto de Mamá Cabra na nosa biblioteca por indisposición dun  membro do grupo ata novo aviso. Disculpade polos trastornos que puideran ocasionar.

Temos una nova moi importante!: MAMÁ CABRA visitará a nosa escola o vindeiro martes 19 de novembro a partir das 17.00 h.

O noso alumnado está inmerso no proxecto de "Os bosques" e que mellor forma de aprender que facelo a través da música e da cultura galega.

Así, Tomi e Gloria, de Mamá Cabra, veñen presentar "A fraga do meu avó", un libro C. D. con contos, lendas e cancións relacionadas cos bosques.

Xa sabedes, anotade esta importante cita nas vosas axendas e vide disfrutar con nós á biblioteca da nosa escola. Que non falte ninguén!!

Unha de medo con moito feitizo!