Skip to Content

Blogue de admin

Charla sobre o conflicto de Palestina no IES de Soutomaior

Xov, 06/06/2024 - 11:59 — admin

O xoves 30 de maio, a asociación Araguaney veu ao IES de Soutomaior a falar do conflicto entre Palestina e Israel. Esta foi unha charla organizada pola ANPA "Facendo Camiño" e levouse a cabo coa colaboración do Departamento de Filosofía.

Para poder explicar ben a situación na actualidade contamos con Sara Ashour, galega de orixe palestino que ten información de primeira man do día a día da xente que vive nestes momentos neste país de oriente medio. Por outra banda, Ana Rodrígues trouxo un breve documental que nos amosou imaxes da crudeza da guerra e de como os conflictos armados deixan as cidades completamente arrasadas e moitas víctimas e feridos.

Dende o centro queremos agradecer á ANPA por ofrecer unha actividade tan interesante que promove a reflexión e o pensamento crítico. Sempre cómpre animar á rapazada que busquen información contrastada para poder ter unha opinión independente e libre.

IV Campionato de Xadrez de Redondela Intercentros

Mar, 28/05/2024 - 13:38 — admin

O venres 24 de maio, unha selección de alumnado de 1º e 2º da ESO, pasou a mañá na alameda de Castelao de Redondela nunha saída organizada pola Biblioteca do IES de Soutomaior. A visita tivo como fin a participación no IV Campionato Intercentros de Redondela.

A xa tradicional competición favorece a competitividade nun deporte tan sano coma educativo así como a interacción con rapaces doutros centros.

O centro quere agradecer a Orlando Molareas e a Alicia Pazos a implicación na excursión.

O resto das imaxes pódense consultar premendo na seguinte ligazón: galería

O IES de soutomaior participa no Correlinguas

Mar, 28/05/2024 - 13:21 — admin

No contexto do Día das Letras Galegas, os tres grupos de 3º da ESO do IES de Soutomaior participaron nunha actividade Intercentros organizada pola OMIX do Concello de Soutomaior que tivo lugar o martes 21 de maio.

Os obxectivos principais da actividade foron, por uha banda, a celebración das letras Galegas defendendo a utilización da nosa lingua e, por outro lado, a participación conxunta de alumnado do IES de Soutomaior, o CPR Santiago Apóstolo e alumnado de infantil do EEI de Romariz favorecendo a cohexión entre a rapazada do Concello.

A actividade contou coa participación de Policía e Protección Civil que cortaron o tráfico para a realización da correlinguas/caminata ata o Pavillón da Montesiña. Xa alí o alumnado participou en varias actividades, recibiu un almorzo por parte da organización e puido disfrutar da actuación dun ilusionista.

Para ver o resto das imaxes da actividade hai que premer na seguinte ligazón: galería

III Feira da Ciencia de Soutomaior

Xov, 23/05/2024 - 13:01 — admin

 

Como colofón a todo o programa de Divulgaciencia organizado polo Concello de Soutomaior, o 13 de maio tivo lugar a III Feira da Ciencia na alameda de Talo Río.

O alumnado do centro que estivo interesado en participar na feira contou coa axuda dos departamentos de ciencias do instituto. Como froito do traballo realizado, o alumnado estivo en 6 postos explicando con paixón as características do seu proxecto a todo aquel que se achegaba amosando interese.

Durante a mañá, o alumnado de 1º da ESO achegouse á feira a ver os postos. Para facer a visita máis didáctica o Concello organizou de novo as visitas guiadas cunha recepción e unha pequena actividade. Dende o centro esperamos que esta visita favoreza a participación da rapazada en futuras feiras que se organicen.

Finalmente, o xurado puido valorar o gran traballo feito por tódolos grupos e tivo a dificil tarefa de escoller aos máis destacados para darlles os premios.

Dende o centro queremos dar a noraboa aos agraciados e agradecer a todo o alumnado e profesorado participante. Esperamos poder contar convosco a vindeira edición.

Para visualizar as imaxes do evento pódese acceder á galería  premendo nesta ligazón.

Semana das Letras Galegas no IES de Soutomaior

Mér, 15/05/2024 - 15:09 — admin

O Equipo de Dinamización da Lingua Galega organizou para o luns 13 e martes 14 de maio varias actividades no contexto das Letras Galegas, que este ano conmemora a vida e obra de Luisa Villalta.

O alumnado de 4ºESO e 1º de Bacharelato puido asistir a actuación de Paz Fernández  que consistiu nunha declamación poético-musical coa que o alumnado puido disfrutar dunha sesión de poesía en galego en directo.

Por outra banda, o martes tivo lugar un concerto onde houbo varias actuacións:

  • Participou o grupo Calimontxo no que a voz foi interpretada polo profesor de inglés Antonio Ricón.
  • Participaron varios alumnos e alumnas que interpretaron cancións tradicionais na nosa lingua.
  • Por último, o alumnado puido disfrutar da actuación de Myriam Cortizo Pires e Ariel García Tagliani.

O IES de Soutomaior agradece o gran traballo do EDLG con Antonio Ricón á cabeza e sobretodo, ao alumnado participante que co seu esforzo e gañas fan que estas actividades consigan ter a pegada que busca un centro educativo.

 

 

Bolsas NEAE (Necesidade Específica de Apoio Educativo)

Mér, 15/05/2024 - 11:30 — admin

O Ministerio de Educación abre o prazo para solicitar as bolsas para o alumnado con NEAE.

Solicitude: aberto o prazo, ata o 13 de setembro de 2024.

Poderedes ler a convocatoria  e, de cumprir os requisitos, tramitala online e entregar a documentación no centro.

Poderá ser beneficiario, de cumprir os requisitos (renta e patrimonio, necesidade de atención específica), o alumnado que:

  • Presente necesidades educativas especiais derivadas de Discapacidade (33% ou mais), Trastorno Grave de Conduta, ou Trastorno grave da comunicación e da linguaxe asociado a NEE.
  • Trastorno do espectro autista.
  • Altas Capacidades.

Atendendo ás bases, o alumnado que non teña ningún dos citados diagnósticos precisará certificar Discapacidade para ser candidato á beca NEAE. A discapacidade debe estar acreditada polo equipo de valoracións da Consellería de Política Social. Se non se dispón de tal acreditación, o Departamento de Orientación non poderá informar favorablemente.

Para estas e outras axudas, recoméndase ás familias de alumnado con especiais dificultades solicitar o recoñemento de discapacidade.

Solicitedes a bolsa ou non, aprovéitase para recomendar que acheguedes, en calquera momento do curso escolar, aquela documentación relacionada (cerficado de discapacidade, informes do SERGAS...) xa que nos axuda a facer un óptimo seguimento do alumnado.

 

Expedición do título de Bacharelato e prematrícula ABAU do 16 ao 20 de maio

Mar, 14/05/2024 - 10:05 — admin

O proceso de expedición do título de Bacharelato e a prematrícula nas ABAU 2024 debe facerse en dous pasos:

  1. Solicitar o título de Bacharelato.
  2. Prematricularse na ABAU.

PASO 1: EXPEDICIÓN DO TÍTULO DE BACHARELATO

  • Instrucións sobre a documentación que se debe presentar, taxas e códigos para a expedición do Título de Bacharelato 2024.
  • Modelo de taxas.

PASO 2: PREMATRÍCULA NAS ABAU

  • Calendario: as probas terán lugar entre o martes 4 e o xoves 6 de xuño na Comisión Delegada 10 B, con sede na Escola de Enxeñería Forestal do Campus de Pontevedra da UVigo para o alumnado do IES de Soutomaior. 

 

Visita do IES Soutomaior á APAMP

Lun, 06/05/2024 - 12:26 — admin

O pasado día 29 de abril, un grupo de alumnos de tecnoloxía de 4ºESO e TIC de 1ºBAC, visitaron o centro de día de APAMP, Asociación de Familias de Persoas con Parálise Cerebral, situado no barrio de Navia en Vigo.

Nesta actividade, os alumnos e alumnas puideron ver os distintos obradoiros nos que traballan esas persoas, entre os que destacan os de cerámica e pintura, un de radio na que elaboran un podcast semanal e tamén outros de informática e cestería. O centro conta ademais cun edificio residencial, con 46 prazas para aquelas persoas que por distintos motivos non poden permanecer no seu medio familiar.

A visita está enmarcada dentro do proxecto Talentos Inclusivos, no que participa o Departamento de Tecnoloxía e que pretende despertar no alumnado as vocacións STEM, así como dar a coñecer a realidade da persoas con discapacidade cerebral.

 

Podemos ver máis imaxes na Galería da páxina web do centro.

Obradoiros Divulgaciencia: Departamento de EPVA

Ven, 03/05/2024 - 13:34 — admin

Dentro do programa de Divulgaciencia e en colaboración co Departamento de EPVA, o Concello preparou dous obradoiros levados a cabo os dous na aula de Debuxo do IES de Soutomaior. Tamén foron preparados e presentados polo Divulgador científico David Ballesteros, sinónimo de garantía neste tipo de actividades.

O 19 de abril, o alumnado de 4º da ESO de Expresión artística puideron participar no obradoiro de "Arte, polímeros e NFC". Nel o alumnado puido ver e particiar en varias actividades nas que o arte e a ciencia van da man.

 

O martes 23 e mércores 24 de abril, o alumnado de 3º da ESO traballou no obradoiro de "Arte UV". Neste puideron coñecer un pouco máis en profundidade as características da luz así como as posibilidades artísticas dunha parte do espectro electromagnético: a luz ultravioleta.

Dende o centro agradecemos de novo á OMIX do Concello de Soutomaior a súa colaboración e ao Departamento de EPVA por promover e facilitar que este tipo de actividades poidan chegar ás aulas.

Obradoiros Divulgaciencia: Departamento de Tecnoloxía

Ven, 03/05/2024 - 13:20 — admin

O Concello de Soutomaior organizou dous Obradoiros solicitados polo Departamento de Tecnoloxía. Os dous foron deseñados e impartidos polo divulgador científico David Ballesteros que procurou en todo momento manter ao alumnado conectado con propostas moi interesantes e de actualidade.

O Obradoiro "Intelixencia artificial" levouse a cabo no Taller do IES de Soutomaior o martes 16 de abril e asistiu o alumnado de TIC de 1º de Bach e o alumnado de Dixitalización de 4º da ESO. Nel o alumnado puido utilizar programas de IA de actualidade vendo as súas posibilidades e descubrindo que o seu uso non é complicado.

 

O Obradoiro "Deseño de APPs" levouse a cabo no Taller o mércores 24 de abril.  Participaron nel o alumnado de 3º ESO B e 3º ESO C que imparten a materia de Educación Dixital.

Dende o centro non deixamos de agradecer ao Concello a colaboración á hora de presentar actividades moi enriquecedoras e atractivas para o alumnado. Tamén agradecemos ao Departamento de Tecnoloxía o seu entusiasmo por apoiar estas iniciativas.

 

Distribuir contido


by Dr. Radut