2017-2018

Como funcionan un electroimán e un altofalante?, que relación hai entre a frecuencia e o período dunha onda sonora?, podo conseguir distintas notas "tecleando" sobre un compañeiro en lugar de facelo no piano?. Con pouco máis que unha pila, unhas moedas, un lapis, un clip e un altofalante de refugallo, Mateo Mena achegounos o martes a estes e outros conceptos a través da experimentación con sinxelas montaxes electrónicas sonoras.

Nunca antes nos pareceran tan divertidas a música e a electrónica!

O pasado luns 26 de febreiro visitou o noso Instituto Andrés Barceló, representante español dos empresarios no Comité Económico e Social Europeo (CESE), para dar unha charla sobre o pasado e o presente da UE, sobre o que lles ofrece a UE aos xóvenes e sobre o papel do CESE diante das principais institucións comunitarias.

O alumnado participante está inmerso en dous programas europeos, en concreto, o de Escolas Embaixadoras do Parlamento Europeo (3º ESO) e Your Europe, Your Say (4º ESO). Máis información en Que Pasa na Costa, Diario camariñán e El Correo Gallego.

Á volta do Entroido, o alumnado de 1º ESO visitou o Centro Arqueolóxico de Dombate para coñecer de primeira man unha das expresións máis senlleiras do Megalitismo en Galicia. Ao rematar, achegámonos a Buño onde tivemos a oportunidade de traballar o barro segundo a tradición oleira da zona no Ecomuseo Forno do Forte. Xa no camiño de volta, fixemos unha parada exprés no castro de Borneiro para realizar o recoñecemento das partes habituais dun asentamento castrexo…

Todo isto ata que a choiva lle puxo fin á actividade! Proba superada!