Informática

Durante as últimas semanas, alumnos do Ciclo Medio de Sistemas Microinformáticos e Redes desenvolveron unha máquina recreativa arcade para que todos os membros do instituto poidan xogar durante os recreos a algúns dos videoxogos máis populares e tradicionais das máquinas recreativas.

Os alumnos desenvolveron a máquina desde cero, empregando compoñentes de ordenadores do noso taller. Aplicaron os coñecementos adquiridos nos diferentes módulos do ciclo para montar os compoñentes, instalar o software necesario e deseñar a apariencia da máquina. Tamén aprenderon a conectar a máquina por rede para poder controlala de forma remota.

Faise público o calendario de exames para FPB e Ciclo Medio do curso 2021/2022, con datas de exames, entrega de boletíns e datas de reclamación.

Do 13 ao 19 de outubro tivo lugar no IES de Monterroso, nos grupos de 1º de Ciclo Medio de Sistemas Microinformáticos e Redes e 2º de FP Básica de Informática de Oficina, a actividade Codeweek.

Actividade integrada na iniciativa europea #CodeWeek (9 a 24 outubro de 2021) a semana europea da programación, na que tentamos achegar o pensamento computacional para a resolución de problemas mediante a realización dun proxecto de robótica básico e aplicación práctica da impresión 3D.

As/Os estudantes realizaron un proxecto paso a paso (desde a lóxica ata a implementación) para construir unha barreira activada mediante sensores de presenza empregando ARDUINO, actuadores e sensores.

A impresión de certos elementos coa impresora 3D permitu aos estudantes coñecer esta tecnoloxía e o seu emprego práctico.

https://codeweek.eu/view/375212/iniciacion-a-la-robotica-y-3d
https://codeweek.eu/

Con motivo do Día das Letras Galegas realizouse unha exposición con marcapáxinas elaborados polo alumnado de FP Básica e 1º de CM nos módulos “Ofimática e Arquivamento de documentos”, “Operacións auxiliares para a configuración e a explotación” e  “Aplicacións Ofimáticas”.

Este alumnado participou no 11º Concurso Europeo de Marcapáxinas, o cal está enmarcado dentro do proxecto eTwinning “Letras Galegas 2021- Xela Arias”. O obxectivo deste proxecto é difundir a lingua e literatura galega traballando nun proxecto colaborativo a nivel europeo e nesta edición participaron centros de España e Portugal.

O xurado do concurso concedeu un accésit ao marcapáxinas da alumna de 1º FP Básica, Érica Fernández García.

Publicada a Orde do 22 de xaneiro de 2021 pola que se convocan probas de acceso aos ciclos formativos de grao medio e de grao superior de formación profesional do sistema educativo para o ano 2021.

   1- CICLOS MEDIOS 

•  PRAZO DE INSCRICIÓN: Entre o 15 e o 26 de marzo de 2021, ambos os dous incluídos   

• REALIZACIÓN DA PROBA: 27 de Maio

   2- CICLOS SUPERIORES

• PRAZO DE INSCRICIÓN:  Entre o 18 de febreiro  e o 03 de marzo de 2021, ambos os dous incluídos.

• REALIZACIÓN DA PROBA: 15 de Abril

Máis información: 

• Probas de acceso a ciclos formativos de grao medio

• Probas de acceso a ciclos formativos de grao superior

 Christmas Card Exchange 2020

Os alumnos de 1º de Ciclo Medio e 2º de FP Básica participan  nos módulos de “Aplicacións Ofimáticas” e “Operacións auxiliares para a configuración e a explotación”  nun proxecto eTwinning chamado  "Christmas Card Exchange 2020"

Neste proxecto eTwinning, os alumnos realizaron felicitacións de nadal que intercambian coas realizadas por outros centros europeos. Participan outros centros de España e doutros países como: Albania, Croacia, Eslovaquia, Finlandia, Francia, Grecia, Italia, Lituania, Malta, Polonia, Portugal, Reino Unido, República Checa, Rumanía, Serbia, Turquía e Ucrania.

Este ano debido as circunstancias que estamos a vivir en todo o mundo, faremos o intercambio sen enviar as felicitacións. Creamos unha páxina no Twinspace para dar a coñecer o noso centro e publicar as felicitacións de nadal realizadas polos alumnos.

Este mércores 18 de novembro tivo lugar ás 9:00 unha charla dirixida a Ciclo Medio e Formación Profesional Básica sobre o emprendemento. O poñente, Simón Cabarcos, da empresa Blindaxe Sport S.L. [https://www.blindaxe.com] explicou como emprendeu dende os inicios ata hoxe.

Simón Cabarcos, foi futbolista e actualmente é emprendedor. Fundou a súa empresa adicada á fabricación de proteccións de fibra de carbono hai máis de 10 anos. A idea era innovadora: Facer proteccións cómodas de fibra de carbono que ata ese momento non facía ningunha empresa.

Coñecendo o mundo do deporte e o proceso de fabricación con fibra de carbono, logrou posicionarse no sector de xeito notable. Tanto é así, que a súa pequena empresa situada en As Pontes, surte a futbolistas de primeira división e deportistas ao redor de todo o mundo sendo unha referencia galega a nivel mundial.

Os estudantes tiveron oportunidade de preguntar, a través de videochamada co poñente, as súas inquedanzas tanto sobre a empresa, o funcionamento, fabricación e cuestións relacionadas co emprendemento.

A través de este caso de éxito, os estudantes puideron coñecer de primeira man aspectos importantes a ter en conta de cara a montar unha empresa.

A actividade foi organizada a través de eduemprende [http://www.edu.xunta.gal/fp/eduemprende].

A realización de actividades por videochamada ven a tratar de suplir as dificultades de organización das mesmas neste curso no contexto da pandemia do COVID19.

Aos alumnos e á profesora de 1º de Ciclo Medio e 1º de FP Básica concedéronlles o Selo de Calidade de eTwinning polo proxecto «Letras Galegas 2020 - Ricardo Carvalho Calero».

Este premio supón un recoñecemento do traballo realizado nos módulos de Aplicacións Ofimáticas e Ofimática e Arquivamento de Documentos durante o curso 2019-2020.