O pasado sábado 7 de setembro, tivo lugar no salón de actos do IES Fernando Blanco a cerimonia de entrega das Becas-Premio Fernando Blanco correspondentes ao curso académico 2012-2013. Estas becas foron creadas para premiar o esforzo nos estudos do alumnado do noso centro e están organizadas polo IES Fernando Blanco e pola Fundación Fernando Blanco de Lema, entidade que conta co patrocinio da empresa Ferroatlántica, do Concello de Cee e da Deputación da Coruña.
Estas Becas-Premio, tratan de recuperar a tradición que xa se iniciara no ano 1886 cando, ao remate do primeiro curso académico no colexio Fernando Blanco, se premiou aos estudantes cos mellores expedientes académicos.
A cerimonia, que foi conducida polo secretario da Fundación Darío Areas, iniciouse ás 12,00 horas e nela estiveron presentes o conselleiro de Cultura, Educación e Ordenación Universitaria Xesús Vázquez Abad, o xefe do servizo de inspección territorial da Coruña Fermín Álvarez Lata, a alcaldesa de Cee Zaira Rodríguez, membros do Padroado da Fundación Fernando Blanco de Lema, profesorado do I.E.S Fernando Blanco, representantes das casas colaboradoras, representación de Ferroatlántica e familiares dos alumnos premiados.
O conselleiro, Xesús Vázquez, reivindicou a figura de Fernando Blanco de Lema quen, como moitos outros “indianos” en Galicia, investiron parte da súa fortuna en dotar á súa localidade natal de medios para poder dar unha formación aos seus nenos e nenas, subliñando “o valor central que este home de prol lle daba á instrución na vida das persoas” e lembrando a “riqueza e amplitude do patrimonio escolar” que salvagarda e difunde a institución ceense.
A alcaldesa de Cee, Zaira Rodríguez, lembrou algúns dos fitos que foron posibles en Cee grazas á existencia do colexio Fernando Blanco, como a existencia dunha botica que distribuía medicamentos de xeito gratuíto entre os veciños que os necesitaban, o primeiro teléfono da vila ou a chegada da luz eléctrica a Cee en 1906. Tamén gabou o altruísmo de Fernando Blanco como “unha das cousas máis importantes que pode ter un persoa, pensar antes nos demais que en un mesmo”.
A directora do centro, Chelo Trillo, lembrou a Fernando Blanco ao dicir que “canta menos formación se teña máis difícil será decidir o rumbo da nosa vida”, polo que animou aos seus alumnos para que non perdan nunca “a ilusión por saber” e cualificou as bolsas como “o soño feito realidade” do mecenas da educación e a cultura ceense “máis alá dun fermoso edificio”.
Entregáronse un total de 5 becas aos mellores expedientes académicos que nesta edición lle corresponderon a:
Sergio Grandío Rodríguez, de 3º da ESO, cunha nota media de 9,58.
Maruxa Cernadas Leis, de 1º de Bacharelato, cunha nota media de 9.
Santiago Lafuente Calvo, de 1º de CM de Electromecánica de vehículos automóbiles, cunha nota media de 10.
Yohana Moreira Pose, de 1º de CS de Administración e Finanzas, cunha nota media de 9,14.
Ariane Lema Paz, de 1º PCPI de Instalacións electrotécnicas e de telecomunicacións, cunha nota media de 9,30.
A entrega das distintas Becas-Premio, consistentes nun cheque de 200 € en metálico e outros 312 € en vales de compra foi realizada por representantes das empresas patrocinadoras que foron: Ferroatlántica, Estación de Servizo Bazarra, Librería Trazos, Ler Librerías, Fersi Papelería, Aurora Sport, Cabo Sport, Grupo Santitel, Centro Comercial Finisterrae, Compucee, Hotel-Restaurante Praia de Quenxe y Roberto G. Rigaut.
