O 18 de maio celebrouse a cerimonia de graduación do alumnado de 2º de Bacharelato no IES Fernando Blanco.

Cun salón de actos cheo de familiares do alumnado que se graduaba, ás 19:00 en punto comezou a cerimonia presentada por alumnas de 2º de bacharelato que foron dando paso a actuacións musicais, vídeos e discursos de alumnado que representaba a cada un dos tres cursos de 2º.

Houbo un recordatorio especial para o alumnado de 2º que forma parte do grupo de teatro Tuéjele desde a súa fundación e que este ano o abandonan. Esta pequena homenaxe foi organizada polos membros que continúan no grupo e que de seguro van seguir mantendo o nivel tan alto que deixan os que se van.

Tamén houbo unha intervención do pai dunha alumna que falou en nome das familias e da directora do IES Fernando Blanco. Ambos os dous salientaron a importancia que ten a educación para o desenvolvemento integral das persoas. Ademais de lembrar a importancia do legado de Fernando Blanco.

O acto continuou coa imposición das bandas aos graduados por parte dos titores e titoras.

Para rematar, o alumnado, familiares, profesorado e persoal non docente saíron aos xardíns do instituto onde había un photocall ademais de pinchos e refrescos.

Un grupo de alumnado dos CM de Mantemento Electromecánico e de Instalacións electrotécnicas do IES Fernando Blanco, acompañados polos seus profesores Carlos Pérez e Diego Azpitarte, visitaron as instalacións que STAC (empresa do Grupo Cortizo) ten en Padrón.

Na visita puideron ver as instalacións da empresa e os diferentes procesos industriais que se desenvolven na mesma como inxección, mecanizado, lacado, pulido, zincado, estampación, fundición, etc.

Foi unha visita guiada na que lles explicaron o funcionamento de diversas máquinas e o proceso de fabricación dos produtos.

O venres 13 de maio celebrouse no IES Fernando Blanco a Gran Final da VII Olimpíada Cultural O Saber Ten Premio. Na que participaron os tres equipos finalistas: Os Aforzunados, Triunfo e X.

Esta final constou de dúas partes:

A primeira parte, na que os tres equipos tiveron que contestar a 20 preguntas extraídas ao chou entre 970 preguntas elaboradas por todo o profesorado do centro, de todas as materias e de todas as ensinanzas que se imparten no IES Fernando Blanco, mediante un programa informático exclusivo do Fernando Blanco. Nesta primeira parte resultaron clasificados os equipos X con 15 puntos e Triunfo con 16.

A segunda parte consistiu nun debate sobre o tema “É necesario celebrar o día de…?”, na que os dous equipos defenderon posturas opostas. Esta parte foi xulgada por un xurado composto por tres profesores e profesoras do centro.

Despois destas dúas partes resultou gañador do 1º premio desta VII Olimpíada Cultural o equipo Triunfo, composto por: Lucía Senra Lado, Lucía Oca Vázquez, Tania Lema Arias, Lucía Canosa Pequeño e Ana Oca Vázquez.

En 2º lugar quedou o equipo X, composto por: Manuel Soto Domínguez, Cristina Paz Insua, Brais Castro Lago, Alberto Castro Conde e Lucas Verdía Couto.

O 3º clasificado foi o equipo Os Aforzunados, composto por: Luis Lojo Baliña, Adrián Garea Fernández, Iago Lado de Pazos, Samuel Pequeño Rodríguez e Héctor Becerra Monteagudo.   

A gala estivo conducida polo xornalista corcubionés Fran Hermida Abelleira, contou cunha nutrida presenza de familiares do alumnado participante que, ademais, puideron asistir a varias actuacións musicais do alumnado e a proxección de vídeos coas actividades extraescolares e complementarias realizadas durante o curso.

Tamén estivo presente a inspectora de educación dona Magdalena Duarte Blanco.

Nesta sétima edición participaron un total de 11 equipos que pasaron por varias eliminatorias ao longo do curso ata chegar tres equipos a esta Gran Final.

A alumna de 1º de bacharelato do IES Fernando Blanco, María Lijó Pequeño resultou gañadora da V Olimpíada Filosófica de Galicia na modalidade de Fotografía Filosófica.

Esta Olimpíada filosófica foise desenvolvendo ao longo de 4 etapas que comezaron o día 12 de xaneiro e culminou hoxe, día 23 de marzo, na Facultade de Filosofía de Santiago onde as persoas seleccionadas realizaron unha defensa de 5 minutos, explicando como naceu a idea, cal foi o seu proceso de realización, cal foi o nivel de participación do alumnado e a axuda recibida polo profesorado á hora de levala a cabo.

Este primeiro premio consiste nunha viaxe a Cáceres para participar na Olimpíada Estatal os días 4 e 5 de maio de 2018, cos gastos pagados. 

Parabéns María!

Un grupo de alumnado de 2º do CM de Xestión administrativa e de 2º de Bacharelato que cursa Economía da empresa, visitaron as instalacións da sede central de Inditex en Arteixo.

Aproveitando a viaxe, acercáronse ata A Coruña para ir ao Banco de España onde, ademais de ver as instalacións, lles deron unha charla sobre criptomoedas.

Por se volo estades preguntando: non, non lles deron ningunha mostra de diñeiro.