O venres 19 de maio celebrouse no IES Fernando Blanco a Gran Final da VI Olimpíada Cultural O Saber Ten Premio. Na que participaron os tres equipos finalistas: A.P.N.O.R., Nunca choveu que non escampara e Os aforzunados.

Esta final constou de dúas partes:

A primeira parte, na que os tres equipos tiveron que contestar a 20 preguntas extraídas ao chou entre 976 preguntas elaboradas por todo o profesorado do centro e de todas as materias e de todas as ensinanzas que se imparten no IES Fernando Blanco, mediante un programa informático elaborado por Martín Pardiñas Fondo. Nesta primeira parte resultaron clasificados os equipos A.P.N.O.R. e  Nunca choveu que non escampara empatados a 14.

A segunda parte consistiu nun debate sobre o tema “É a adolescencia a mellor época da vida?”, na que os dous equipos defenderon posturas opostas. Esta parte foi xulgada por un xurado composto por tres profesores e profesoras do centro.

Despois destas dúas partes resultou gañador do 1º premio, dotado con 600 €, desta VI Olimpíada Cultural o equipo Nunca choveu que non escampara, composto por: Elisa Lema Gómez, Andrea Rodríguez Trillo, Daniel González Silva, Abraham Domínguez Vázquez e Rocío Caamaño Prieto.

En 2º lugar, cun premio de 400 €, quedou o equipo A.P.N.O.R., composto por: Alejandra Verdía Couto, Miguel Castro Conde, Yeray Ruíz Lourido, Nicolás Carballo Senra e Darío Lago Beiro.

O 3º clasificado, galardoado cun premio de 300 €, foi o equipo Os aforzunados, composto por Iván Ferreiro Santos, Adrián Garea Fernández, Iago Lado de Pazos, Jesús Ángel Vilela Domínguez e Martín Rey Trillo.

A gala estivo conducida por María Canosa Blanco, enxeñeira e escritora ceense. Contou cunha nutrida presenza de familiares do alumnado participante que, ademais, puideron asistir a varias actuacións musicais de profesorado do centro e de alumnado

Os premios desta Olimpíada Cultural contaron co patrocinio de FERROATLÁNTICA.

Tamén estivo presente a inspectora de educación dona Magdalena Duarte Blanco.

 Nesta sexta edición participaron un total de 9 equipos que pasaron por varias eliminatorias ao longo do curso ata chegar tres equipos a esta Gran Final.

O venres 28 de abril houbo un concerto de blues no Salón de Actos do IES Fernando Blanco de Cee a cargo do grupo formado por Javier Turnes, Alejandro Casquero e Darío Lago.

A este concerto asistiu o alumnado e o profesorado do centro que puideron escoitar diferentes temas de blues e rythm and blues clásicos e tamén algunha composición propia. 

Cómpre salientar que tanto Javier Turnes como Alejandro Casquero teñen unha ampla experiencia musical no blues, xa que tocaron con diversas formacións como por exemplo a Bakin’ Blues Band ou co trompetista Boney Fields e forman o dúo Turnes&Casquero. Teñen dous discos publicados: Jumpin’ in a deep blue sea e It’s always party time at home.

Foi un concerto que non deixou indiferente a ninguén e que tivo un gran éxito entre o público, tanto entre os que lles gusta o blues como os que non coñecían este estilo musical. 

Esperamos que poidamos ter o privilexio de volvelos oír no futuro.

Xa remataron as semifinais da VI Olimpíada Cultural "O Saber Ten Premio". Polo que xa temos os tres equipos clasificados, que participarán na Gran Final do vindeiro venres 19 de maio, son os seguintes:

NUNCA CHOVEU QUE NON ESCAMPARA:

Elisa Lema Gómez (1º bacharelato C)
Andrea Rodríguez Trillo (1º bacharelato A)
Daniel González Silva (1º CS administración e finanzas)
Abraham Domínguez Vázquez (2º CM electromecámica de vehículos automóbiles)
Rocío caamaño Prieto (3º ESO)

A.P.N.O.R.:

Alejandra Verdía Couto (1º bacharelato B)
Miguel Castro Conde (1º bacharelato A)
Yeray Ruíz Lourido (2º CM instalacións eléctricas e automáticas)
Nicolás Carballo Senra (2º CM instalacións eléctricas e automáticas)
Darío Lago Beiro (4º ESO)

OS AFORZUNADOS:

Iván Ferreiro Santos (2º bacharelato B)
Adrián Garea Fernández (1º bacharelato C)
Iago Lado de Pazos (1º CS administración e finanzas)
Jesús Ángel Vilela Domínguez (1º CM xestión administrativa)
Martín Rey Trillo (4º ESO)

Comezan os preparativos para o Nadal no IES Fernando Blanco!

Un grupo de alumnado de ciclos formativos, profesorado e persoal non docente, comezaron a adornar o instituto con vistas ás vindeiras festividades.

É un traballo colaborativo, cadaquen aportando os seus coñecementos e habilidades e cun obxectivo común, lograr que o Fernando Blanco luza como se merece.

Moitas grazas a todos e a todas!

Está chegando o tempo dos magostos, aínda que polo tempo que estamos tendo máis ben pareza que estamos na primavera!

De calquera forma, no IES Fernando Blanco quixemos facer un magosto, aproveitando as castañas dos castiñeiros do xardín do instituto, que este ano son especialmente grandes.

O venres 21 desde as 11,30 foron pasando pola zona cuberta do instituto, en previsión de posibles chuvias, diferentes grupos de alumnado acompañados polos seus profesores e profesoras para compartir uns momentos de lecer e degustar as castañas que foron asadas por alumnos e profesores.

En días anteriores os grupos de alumnado da ESO colaboraron recollendo as castañas e poñéndoas a secar, tamén fixeron os cucuruchos de papel para servilas e os alumnos do ciclo medio de Mantemento electromecánico, dirixidos polos seus profesores fabricaron o “dispositivo” para asalas. Foi un traballo en equipo desde o primeiro momento ata o momento de degustalas.

Ademais houbo música de gaita a cargo dos alumnos.