Viaxe de estudos á Universidade do Minho en Braga

Aproveitando o parón lectivo da Semana Santa, 34 alumnos e alumnas de 1º e 2º de Bacharelato do IES Fernando Blanco de Cee realizaron unha viaxe de estudos a Braga (Portugal) acompañados polos profesores Serxio Iglesias, Manuel Canosa e o profesor en prácticas Alexandre Nieves.

Este grupo de alumnado asiste voluntariamente e en horario extraescolar  a cursos de Portugués co profesor Serxio Iglesias e de AutoCAD co profesor Manuel Canosa.

En Braga asistiron a clases de Portugués Lingua Estranxeira no Instituto de Letras e Ciencias Humanas da Universidade do Minho e realizaron diversas visitas a facultades e institutos da Universidade, co obxectivo de coñecer unha realidade universitaria próxima e ao mesmo tempo achegarse a unha comunidade lingüística irmá.

Ademais, os estudantes tiveron tempo para visitar cidades próximas como Guimarães ou Porto e realizar unha ruta de sendeirismo polo Gerês.

Esta actividade está enmarcada dentro dos Contrato-Programa na procura da excelencia educativa, plan que vén de asinar este curso o IES Fernando Blanco coa Consellería de Educación.