Concurso AULA MÁIS SOSTIBLE 2009-2010
 |
 |
CONCURSO AULA MÁIS SOSTIBLE 09-10
Que é unha aula “sostible”?
É unha forma de considerar a aula como un espazo para:
• Procurar un ambiente acolledor e propicio para o noso traballo diario.
• Facer un uso racional dos recursos ao noso dispor.
• Usar as enerxías con responsabilidade.
• Fomentar a orde e a limpeza.
• Cooperar co obxectivo do benestar colectivo.
Data de Inicio: XA Data de Remate: Finais de Maio
BASES
1. O xurado valorará :
• Limpeza de mesas e cadeiras.
• Uso eficiente da luz eléctrica.
• Evitar fugas de calor cando usamos a calefacción.
• Uso das bandexas e colectores de papel.
• Taboleiros de anuncios ordenados .
• Outras iniciativas propias de cada grupo en busca da sostibilidade e de aulas máis acolledoras.
2. Periódicamente e sen previo aviso, o xurado revisará as aulas e publicará os resultados.
PREMIO
Excursión para toda a clase a un lugar de interese medioambiental en Xuño
NOTA: quedarán excluidos aqueles alumnos que boicoteen o desenvolvemento do concurso.
|
 |
|
Distintos colectores para recoller os distintos tipos de residuos no IES |
|
 |
 |
| Fotos da visita ás Illas Cíes do alumnado da aula mais sostible do curso pasado | |
Certame Poético 2010
CONCURSO DE POESÍA
O Departamento de Lingua Galega e Literatura e o Equipo de Normalización Lingüística do IES de Fene convocan un concurso de POESÍA no que poderá participar todo o alumnado do Centro e que se rexerá polas seguintes BASES:
1ª- Cada participante pode presentar un máximo de tres poemas escritos en lingua galega.
2º- As composicións han de ser BREVES: a extensión máxima é de 14 versos.
3ª- Cada un dos poemas introducirase nun sobre no que conste un pseudónimo. Ademais incluirase unha plica cos datos d@ autor/a.
4º- As poesías deberán ser presentadas antes do día 9 de abril de 2010. Poderán entregarse a calquera membro do Departamento de Lingua Galega ou do Equipo de Normalización.
5º- Concederanse dous premios: material cultural, audiovisual, deportivo por un importe total de 30 euros no caso do primeiro premio, e por un total de 15 no caso do segundo.
6ª- O xurado será designado polo Equipo de Normalización Lingüística e o seu fallo será inapelable.
Carreira Solidaria por Haití: 1027.50 €, 1027.50 grazas
Grazas a Mar, Vanesa, Aitor, Antía, David (aos dous), Raúl, Javier (o que máis correo de todos) e a Andrea de 1º de ESO.
Grazas a Jorge, Xavier, Tamara, Beatriz, Rocío, Darío, Isabel e Marta de 2º de ESO.
Grazas a Rafa, Adrián, Roi (o que máis cartos xuntou), Sara, David, Leonardo e Ángela de 3º ESO.
Grazas a David, Félix, Rocío, Álvaro, Tania, Noelia e Tamara de 4º de ESO.
Grazas a Lara, Joel, Adrián, Miguel, Fran, Ana, Alberto, Carme, Tamara, Alejandro, Jorge e Inés de 1º de bacharelato.
Grazas a Beatriz, Jorge, Andrés, Jacobo, Henrique e Adrián de 2º de bacharelato.
Grazas a Ricardo, Miguel e ás gatas negras por conseguir un premio en Entroido e renunciar a el.
Grazas ás mozas que participaron nos debuxos dos marcapáxinas solidarios.
Grazas aos que traballan no IES de Fene e ás familias que confían en nós.
|
 |
 |
|
 |
Carreira solidaria por Haití. Entrevista a Félix Freire
Gústame correr, e se é para recadar diñeiro para unha acción solidaria, ilusióname máis aínda.
A comisión que forma a Axenda Escolar 21 organiza unha carreira solidaria para recadar fondos de axuda a Haití o venres 26 de febreiro. Nesta carreira participan alumnos e alumnas deste instituto. Un dos participantes, Félix Freire Pedreiras, alumno de 4º de ESO responde ás preguntas que lle fai o equpo web acerca desta carreira. O primeiro que tivo que facer foi buscar patrocinadores, que son os que van aportar 50 céntimos cada un por cada volta que Félix percorra na pista de atletismo de uns 250 metros. Conta con 4 patrocinadores entre o profesorado do instituto.
Equipo web: Practicas habitualmente atletismo?
Félix: Si, practícoo pola miña conta, non estou federado, pero eso non me impide que cada fin de semana cruce a ponte das Pías correndo.
E.w.: Canto cres que podes recadar nesta carreira?
Félix: Bueno... non sei.... Pero coido que nunha hora podo percorrer 13 ou 14 km, o que supón dar unhas 50 voltas á pista. Iso en diñeiro, equivaldría a 100 euros, o que non está nada mal...
E.w.: Quere iso dicir que te conformas dando 50 voltas?
Félix: Un sempre trata de conseguir o máximo, pero tamén depende de como me atope físicamente ao longo da carreira. Ás veces a fatiga chega antes.
E.w. Estás ilusionado coa participación na carreira?
Félix: Gústame correr, e se é para recadar diñeiro para unha acción solidaria, ilusióname máis aínda.
Orgullos@s do Galego
A Coordenadora galega de Equipos de Normalización e Dinamización Lingüistica achéganos este espazo onde amosar o orgullo que temos os galegos e as galegas pola nosa lingua. Sexa cal sexa a cor da nosa pel, onde naceramos, de quen veñamos sendo, ou se nos gusta máis a lúa ou o sol, somos moitos e moitas os que estamos orgullosos de termos unha lingua propia. Aquí encontrarás videos, materiais para imprimir e distribuír como queiras, cando queiras e con quen queiras, e moitas, moitas persoas coma ti que presumen da nosa lingua, do galego.
Orgullos@s do noso, orgullos@s do galego
BENVID@S
Desde o martes 9 de febreiro ata o 16, estiveron connosco un grupo de alumnos e profesores italianos. A visita enmarcase nun intercambio co “Istituto Carlo Scarpa” de San Doná di Piave. Durante unha semana houbo tempo para visitar as nosas instalacións, visitar Ferrol, Coruña, Santiago e Lugo, participar nos actos do entroido e disfrazarse no noso instituto e tamén foron recibidos polo alcalde no Concello. O luns e martes de entroido fixeron un pequeno tramo de 5 km do Camiño Francés nas proximidades do Cebreiro acompañados de profesorado e algúns pais nais e estudantes do centro. Foi unha semana de aventuras na que novos e menos novos aproveitaron para facer amizades.
Falando de Física de Partículas no IES de FENE
O pasado venres 5 de febreiro de 2010 estivo no IES de FENE Xabier García Feal , Licenciado en Físicas pola Universidade de Santiago de Compostela e vencellado ao departamento de Física de Partículas, pronunciando unha conferencia . O título da conferencia foi “A Física na USC”. Na súa intervención, e no coloquio posterior á mesma, deu a coñecer as liñas de investigación en Física Teórica e Física Aplicada dos distintos departamentos da USC. O percorrido pola construcción desta ciencia ao longo da historia, desde Newton(1643-1727) ata Feynman (1918-1988), pasando por Maxwell, Einstein, Bohr, Schrödinger ou Heisenberg foi o fío conductor da disertación. A conferencia arrancou coa fotografía con máis sona da historia da ciencia moderna, a dos participantes na conferencia Solvay de 1927 (ver película gravada por o premio novel Irving Langmuir ) na que están todas aquelas persoas contribuíron de forma decisiva ao desenvolvemento da ciencia actual, e como consecuencia ao avance tecnolóxico que hoxe temos. Pero a ciencia é unha construcción social, para que haxa científicos coma os que aparecen na conferencia Solvay ten que haber fondos económicos, necesarios para avanzar nas investigacións, e eso só é posible se a sociedade o demanda e é consciente da importancia da ciencia para o seu desenvolvemento. Cando no coloquio un asistente preguntou polo custe do acelerador de partículas do CERN (Centre Européen pour la Recherche Nucléaire ) o LHC (Large Hadron Collider), Xabier García non dubidou en sinalar que o CERN precisa de moitos fondos que aportan os estados membros da UE, pero que en todo caso é un centro de referencia en Física de Partículas a nivel mundial e moito mas rendíbel e menos custoso do que foi e segue a ser burbulla da construcción especulativa. Como centro que recibe os aportes científicos dos países membros fixo notar que a Facultade de Físicas da USC contribúe ao proxecto participando en unha parte importante do cálculo e na construcción dos detectores de partículas que se producen no LCH, precisamente o catedrático Carlos Pajares da Universidade de Santiago é o representante español no CERN. Ao remate da súa intervención fixo unha mención á situación actual da Física de Partículas, ás teorías Gauge, e á supersimetría, sin esquecer a partícula estrela: o bosón de Higgs, do que se prevé confirmar ou rexeitar a súa existencia no LHC a finais de este ano, dicindo tamén que de que se confirme ou non a súa existencia vai depender de que unhas teorías físicas ou outras pasasen a mellor vida. Querémoslle agradecer a Xabier García a súa exposición da que tanto alumnos como profesores disfrutamos
Algunhas notas sobre o galego e o galés no ensino
Ditame do Consello da Cultura Galega sobre as Bases do decreto do plurilingüismo.
Carta ao Secretario Xeral de Política Lingüística . Asinado polos Premios á Innovación Educativa en Normalización Lingüística 2009-2010: Equipos de Normalización e Dinamización Lingüística do CEIP Aguiño (Ribeira), CEIP A Gándara (Carballo), CEIP A Pedra (Bueu), CEIP Bergantiños (Carballo), CEIP Quintela (Moaña) IES Menéndez Pidal (A Coruña), IES Sardiñeira (A Coruña), IES Félix Muriel (Rianxo), IES Perdouro (Burela), IES Rodeira (Cangas) e IES Porto do Son (Porto do Son)".
O bilingüismo en Gales O impulso lingüístico salva ao galés da extinción, que se daba por segura
COMUNICADO DO DEPARTAMENTO DE LINGUA E LITERATURA GALEGA DO IES DE FENE
O Departamento de Lingua Galega e Literatura do IES de Fene acordou por unanimidade manifestar o seu apoio ao documento feito público onte, luns día 18 de xaneiro de 2010, pola Real Academia Galega co título de Análise das Bases para o Decreto de Plurilingüismo no ensino non universitario de Galicia no que se rexeitan as Bases propostas polo Goberno Galego remitidas a esta Institución o pasado30 decembro de 2009.
O Departamento desexa facer fincapé nalgunhas das ideas desenvolvidas pola RAG, argumentos que substentan o desbotamento das citadas Bases.
1- As Bases propostas polo actual Gobeno galego NON se substentan na mellor organización do proceso pedagóxico, e poderían supoñer un marcado retroceso no proceso de normalización infrinxindo así a lexislación vixente.
2. A base legal de calquera política lingüística que vele pola convivencia pasa pola necesidade de corrixir positivamente unha situación histórica de desigualdade desfavorable ao galego. Son lícitas na actualidade as políticas que pretenden facer normal o uso da lingua desfavorecida para garantir o dereito constitucional de coñecela e usala.
3- Tamén se fai constar un principio básico da xurisprudencia, a denominada discriminación positiva para corrixir desigualdades históricas. En base a isto establécense procesos de normalización progresivos. O galego pode ser legalmente centro de gravidade no ensino sempre e cando se garanta a aprendizaxe e uso do castelán no sistema escolar; ese é o límite do marco legal vixente.
4- Critícase o tratamento neutro que as Bases propostas polo Goberno galego dan as linguas: Galego. castelán e inglés, ao 33,33%?, dando por feito o equilibrio e a igualdade nun claro acto de desigualdade, mesmo incluindo unha língua que non é oficial que se iguala ás duas oficiais.
5. Denuncia que a enquisa vinculante dirixida aos pais polo Goberno galego a fins do curso anterior non é legal. O Tribunal Constitucional nega o dereito a que os pais elixan a lingua do ensino. Esta é unha tarefa dos poderes públicos obrigados a corrixir o desequilibrio e a desigualdade. Ademais, unha enquisa oficial e legal nunca debe formular preguntas de resposta condicionada. Este requsito non se cumpriu tampouco en dita enquisa.
Fene, 19 de xaneiro de 2010
A Xefa do departamento
Asdo. Mª Pilar Sanmartín Alonso
Texto do borrador do decreto e varias análises do mesmo
O pasado 30 de decembro de 2009 foron presentadas pola consellería de Educación as Bases para a elaboracion do decreto o plurilingüismo no ensino non universitario de Galicia.
A Coordenadora Galega de Equipos de Normalización e Dinamización Lingüistica fai unha primeira análise do borrador, no que subliña que:
# O borrador do Decreto do Plurilingüismo para o ensino non universitario non garante que o alumnado acade a competencia lingüística en lingua galega, tal e como fixa a lexislación educativa, acentuando o desequilibrio social existente entre as dúas linguas oficiais.
# A proposta traslada aos centros escolares e ás familias un conflito creado por intereses políticos ao presentar un modelo que non se fundamenta en criterios estritamente pedagóxicos e demostra o descoñecemento da realidade dos centros.
# A introdución dun idioma estranxeiro como lingua vehicular do ensino establécese sobre bases erradas e distorsiona u
nha planificación lingüística rigorosa e eficiente que redunde na formación do noso alumnado.... (ler máis).
Outros documentos:
Novo! Análise das 'bases para o decreto do plurilingüísmo" da RAG (Real Academia Galega), 18-1-10, en .pdf
A pedagoxía da trapallada. Manuel Rivas, escritor. El País, 15-1-10
Un comezo de curso "sen problemas" por Nova Escola Galega. Outubro de 2009
Sobre o decreto do galego
Miguel Anxo Romero
Somos moitos os homes a quen se nos enche a boca dicindo que homes e mulleres deben gozar dos mesmos dereitos e deberes. Porén, sabemos que en cada un dos nosos fogares, o labor da muller é sempre moito maior có dos homes. É algo que sabemos que é así, que está mal, pero así está socialmente aceptado mentres non se vaian dando pasos cara á igualdade real.
Permítaseme este limiar fatal para tentar explicar o que ocurría co decreto do galego da era Fraga: había, en teoría, igualdade paritaria para as dúas linguas (castelán e galego) e había unha paz social porque era un decreto que non se estaba facendo cumprir, non molestaba aos sectores máis reaccionaros da nosa sociedade e os sectores máis liberais seguían inmersos na nosa tradicional resignación.
Coa chegada do denominado goberno bipartito comezou por parte dalgúns sectores socias, o invento dunha guerra inexistente causada polo empeño deste goberno de facer cumprir as normas que foran aprobadas no seu día por todos os grupos políticos. E, inexplicablemente para os que defendemos o ensino de cantas máis linguas mellor, calaron na sociedade palabras tan fortes como imposición, liberdade, bilingüismo, etc., referidas despectivamente aos que defendemos a lingua galega.
A realidade constatable por calquera, é que a lingua galega perde falantes a pasos axigantados dende que existe un Goberno Galego. O primeiro paso efectivo que se deu para poder frear este desastre, foi a implantación das denominadas Galescolas, nas que, por fin, o alumnado de menor idade utilizaba a lingua galega, axudando así a que a escola, como entidade, deixara de ser un factor fundamental na desgaleguización dos galegos. Somos moitos os pais que mandamos aos nosos fillos á escola por primeira vez falando galego e devolvéronnolos falando castelán.
Calquera que teña uns mínimos coñecementos de sociolingüística sabe que a implantación das Galescolas non ía afectar para nada á lingua A, ou de prestixio, que neste caso é o castelán. Está aquí na base un axioma falaz: ou é que realmente corre perigo o castelán de ser erradicado polo galego? Por favor!!
E viñeron as eleccións. E o actual presidente do Goberno Galego meteuse nun sarillo para tentar recadar uns cantos votos. E dese lío sacou como un mago dun sombreiro un novo decreto que non é máis que un despropósito. Un novo decreto chamado a ser incumprido dende o primeiro momento porque o noso país non está preparado para cumprilo.
E agora (viva a liberdade!) disque incluso o alumnado poderá elixir en que idioma contesta ao profesorado. Na clase de Matemáticas disque tamén poderemos contestar en base 2 ou en base 10...
País!!
O galego é o idioma propio dos galegos
Alexandre Chao Viso, alumno de 3º ESO A
O galego é o idioma propio dos galegos, coa súa historia propia e o seu orgullo. Pero aínda así o galego hoxe en día está pasando por unha situación de discriminación lingüística. Seguro que a tódolos galego-falantes alguén lles dixo algunha vez: "¿y tu por qué hablas gallego?", "el gallego es cosa de paletos", "deberías hablar castellano". E todo iso acontece no 2009, non na época franquista. Suponse que vivimos nunha sociedade democrática!!.
Xa son moitas as manifestacións que se levan feito e moitos os seus participantes, pero os políticos parece que non se queren decatar de que a nós nos importa o noso idioma e que non nos vamos a deixar arredar por unhas enquisas ou que imos a crer iso do "Bilingüismo". Porque iso é outra, xa teñen algunha xente convencida de que o bilingüismo é posible, pero a maioría sabemos que sempre vas pensar e falar máis nun idioma que noutro, que non é posible o 50%. E, ao contrario do que algúns pensan, o que están a pretender é o monolingüismo en español, é dicir, o favorecemento da lingua castelá.
Todo o que queremos é unha convivencia de idiomas, que se nos deixe falar o que queiramos e que non se nos discrimine polo idioma. Amais diso, se se consegue incrementar o número de falantes de galego, o idioma de Galicia, pois mellor que mellor.
Por culpa desta discriminación, os galegos empezamos a ter un sentimento de que cando alguén nos fala galego, se é castelán-falante, nos sentimos extraños, cando tería que ser todo o contrario. E agora, contrariamente ao que se cre, hai máis xente, incluso castelán-falantes, que se uniron á causa, por culpa dos últimos ataques á lingua galega.
Isto reflectiuse na última manifestación a prol do galego, o día 18 de outubro, con máis de 50.000 manifestantes.
Con isto pretendeuse, ademais da normalización e oficialidade do galego, o reintegro do galego-portugués, porque o galego, ou é galego-portugués ou é galego-castelá.
Visita a Santiago
O luns 9 de novembro o departamento de Lingua e literatura castelá organizou unha visita a Santiago co alumnado de 3º PDC, 4º de ESO e 1º de bacharelato.
No teatro principal asistiron á representación da obra “Generación del 27”, de Guillermo Frazer, que lles pareceu espectacular.
Visitaron a catedral e os arredores, fixeron tamén un percorrido guiado ao pazo de Fonseca e viron ademais unha exposición de cunchas.
E sen embargo móvese
Enviado por admin o Mar, 27/10/2009 - 20:01Antonio Orozco, outubro de 2009
E sen embargo móvese. Negar o movemento da Terra ao redor do Sol non cambiou a realidade, decretou un sistema solar ficticio. Se a realidade publicada se utiliza para agochar a realidade real estamos diante dun proceso de creación de realidade ficticia e se o proceso é subvencionado, diante dun sarcasmo. Nos manuais das facultades de xornalismo de maior prestixio debería impartirse un curso de ética periodística no que figurase o epígrafe “ Mass media galegos, bilingüismo e realidade en torno á manifestación Queremos Galego do 18 de outubro de 2009” .
O bilingüismo, como concepto, está fabricando con eficacia a idea seguinte: na Galiza hai dúas linguas oficiais, temos competencia lingüística en ámbalas dúas linguas e énos igual falar en galego ca en español. Por se non quedase claro, ao termo bilingüismo engádenlle os cualificativos amable ou harmónico e xa temos o instrumento sutil de imposición da diglosia . Exemplo de amabilidade bilingüe é a pretensión de que o nome de A Coruña se cambie por “A Coruña/ La Coruña”, quedando ben as claras de que lado sopra o vento da amabilidade. Postos a ser amables no canto de dicir Praza de María Pita habería que dicir “Praza de María Pita/ Plaza de María Gallina”.
O bilingüismo amable considera que os galegofalantes seremos tanto máis amables canto maior facilidade teñamos para cambiar de idioma fronte a aos interlocutores que se expresen en español. Os defensores desta amabilidade deberían crear unha entrada no diccionario da RAE “amable: se dice también de la persona que, aún siendo gallego hablante, se expresa en español cuando su interlocutor también lo hace . Persona que se disculpa por expresarse en gallego”.
¿Hai un proxecto para que a única lingua A sexa o español, quedando para o galego o papel de lingua B?
Queremos galego
Marga Suárez, outubro de 2009
Estamos a vivir uns días de defensa do noso idioma, unha morea de galegos e galegas que senten un gran amor polo noso idioma xuntouse en Santiago o pasado 18 de outubro para manifestar que "Queremos galego", para demandar poder vivir en galego en Galicia, para que nas aulas se aprenda en galego, para que a Administración nos fale en galego9.
E aínda hai quen se pregunta Para que serve o galego
- « primeira
- ‹ anterior
- …
- 27
- 28
- 29
- 30
- 31
- 32
- 33
- 34
- 35
- seguinte ›
- última »
