O pasado luns 24 de outubro, o alumnado de 2º de EP rematou a súa aprendizaxe sobre a nutrición do xeito máis saboroso posible, elaborando unha tarta da avóa para degustar no comedor por todo o alumnado de infantil e primaria. 

O resultado? Chupamos os dedos!! 

Sen a colaboración do persoal de cociña, non podería terse elaborado, así que, grazas, Pilar e María. 

Con data de hoxe a Xunta Electoral do CPI de San Vicente publica as convocatorias de eleccións de representantes no Consello Escolar dos distintos sectores (responsables, alumnado, profesorado e persoal non docente).

As convocatorias para responsables (pais, nais ou titores/as legais) e alumnado poden consultarse no taboleiro do centro e tamén nos arquivos anexos a esta publicación.

O prazo de presentación de candidaturas dura ata o día 17 de novembro ás 14:30 horas. Os modelos están dispoñibles na secretaría do centro e tamén anexos máis abaixo.

O alumnado de 2º, 3º e 4º de EP aprenderon esta semana a valorar, coñecer e investigar sobre o noso patrimonio inmaterial da man de Xandobela. 

Unha fermosa actividade da que desfrutamos grandes e pequenos no acolledor entorno da nosa biblioteca escolar.  

Trinta estudantes de Medicina da USC achegáronse esta semana ao noso cole para poñer en marcha o hospital de osiños co noso alumnado de Infantil e 1º ciclo de Primaria. 

Pequenos e pequenas aprenderon con eles hábitos de vida saudable e tamén a perderlle o medo aos profesionais da saúde. 

Neste Samaín pasamos moito medo co marabilloso conto creado polo alumnado do CPI da Baña, dende os máis cativos e cativas até as nosas mozas e mozos da ESO participaron na súa elaboración. O resultado foi tan aterrador coma fermoso.

A Xunta Electoral do centro reuniuse hoxe para admitir, proclamar e publicar as candidaturas dos distintos sectores ás eleccións a representantes no Consello Escolar, que foron publicadas no taboleiro do centro.

Tamén se celebrou o sorteo para determinar a constitución das mesas electorais de responsables e mais de alumnado: as persoas designadas vogais recibirán a citación entre hoxe e mañá.