"I eres a estrela que brila, i eres o vento que zoa. Si cantan, es ti que cantas..." Rosalía de Castro
blogue deNoelia
PROXECTO EDUCACIÓN INFANTIL: O PROTAGONISTA DA SEMANA
Enviado por Noelia o Dom, 25/02/2024 - 15:53Este curso escolar, a aula de Infantil está levando a cabo o proxecto "Protagonista da semana" que permite abordar os obxectivos e contidos
da educación infantil dunha maneira atractiva, dinámica e interesante. Ademais de incidir na formación dunha autoestima positiva, axústase
de maneira especial ás características individuais de cada nenx e facilita a implicación familiar.
Durante unha semana, todas as actividades realizadas na aula xiran ao redor do alumno ou alumna que lle corresponda ser protagonista e
realizamos un libro con documentos e imaxes delas: fáiselle unha pequena entrevista, amosa e explica fotos da súa vida, debuxámolx,
medímolx, pesámolx, contamos cousas sobre el/ela, etc; e recibimos na aula á súa familia.
Cada familia organiza a visita do xeito que prefira traendo á aula unha actividade preparada dende a casa.
Deixamos aquí algunhas imaxes das actividades realizadas ata o momento.
Moitas grazas familias pola vosa participación e implicación!
Sodes xeniais!!
Sesión de cancións e xogos coa familia de Valentina:
Sesión de maquillaxe coa familia de Miley
Coñecemos a "Limón" a chinchilla de Xila.
Contos coa familia de Theo.
Xogos de mesa coa familia de Dylan.
Obradoiro de arxila, contos e música coa familia de Maia.
E, neste curso, aínda quedan moitas semanas de protagonistas por diante cheas de sorpresas e ideas marabillosas que poñer en práctica.
Grazas as familias por axudarnos a crear unha comunidade educativa aberta e participativa!!
APRENDEMOS A RELAXARNOS E A ACTIVAR OS SENTIDOS EN INFANTIL.
Enviado por Noelia o Dom, 25/02/2024 - 11:19Continuamos coas sesións de Ioga na aula de Infantil.
Nesta ocasión, e como o mal tempo non nos permitía saír fóra, realizamos unha sesión de relaxación con pouca luz, música suave e incienso.
Experimentamos diferentes sensacións táctiles con bolas de xel e discos de masaxe.
Para rematar, escoitando música clásica, representamos libremente as sensacións experimentadas nun mural colectivo que pintamos no chan.
Pasámolo xenial aínda que a nosa roupa tamén quedou decorada coas pinturas (je,je).
SESIÓNS DE IOGA AO AIRE LIBRE CO ALUMNADO DE INFANTIL
Enviado por Noelia o Mér, 31/01/2024 - 20:33No programa de estimulación da linguaxe (PELO) que se leva a cabo os mércores na aula de infantil,dedicamos unha parte da sesión á relaxación e á toma de conciencia do noso corpo.
A nosa nova compañeira especialista en Audición e Linguaxe Noelia Soriano, estanos aprendendo exercicios de Ioga que nos encantan.
Hoxe, animad@s polo sol, decidimos facer estes exercicios ao aire libre conectando coas árbores, os paxariños e o río que se escoitaba por debaixo da escola.
Grazas Noe! Pasámolo xenial! Esperamos que siga o bo tempo para poder repetilo!
TEMOS NOVAS PITAS NO COLE. (28 - 09 - 2023).
Enviado por Noelia o Dom, 08/10/2023 - 12:37O xoves 28 de setembro, viñeron dúas novas pitas ao cole. Son dúas poliñas novas ás que aínda non lles puxemos nome.
A pesar de que o primeiro encontro coas outras pitas e o galo foi algo brusco, pouco a pouco estanse aclimatando e comezan a sentirse máis integradas no galiñeiro.
Moitas grazas a Yolanda, nai de Theo por este fermoso agasallo!
VISITA AO CONCELLO, XINCANA DE XOGOS E FESTA NO ÚLTIMO DÍA DE CURSO (21 - 06 - 2023).
Enviado por Noelia o Xov, 22/06/2023 - 11:32Rematou o curso 2022 - 2023 e neste último día tivemos unha xornada chea de actividades:
Comezamos realizando unha saída ata o Concello de Bóveda onde fomos recibidos polo alcalde e pola Concelleira de Cultura e Educación.
No salón de actos contestaron a todas as nosas preguntas e compartiron con nós unha fermosa presentación en vídeo do noso Concello. Antes de despedirnos regaláronnos un pin co escudo de Bóveda explicándonos a súa simboloxía: os tres ríos do Concello e as catorce parroquias.
Seguidamente fomos xogar ao parque da Filgueira e despois iniciamos o camiño de regreso polo fermoso paseo á beira do río.
No cole estaba esperando por nós a xincana de xogos organizada polo profesorado e as familias: unha hora e media de xogos en diferentes estacións con merenda de froita incluída.
E para rematar o día, despois da entrega de notas e materiais, fomos directos ao pavillón municipal a disfrutar da fantástica festa que tiña organizada a ANPA para o alumnado con demostracións das diferentes actividades extraescolares, música, baile e colchoneta incluída.
Un día emocionante onde despedimos aos nosos compañeiros e compañeiras de sexto que marchan do cole e ao profe Fran que non estará con nós para o vindeiro curso. A todos e todas vós desexámosvos moita sorte nesta nova etapa e un feliz verán!
Ata pronto!!
EXCURSIÓN AO PARQUE ZOOLÓXICO DE MARCELLE (20 - 06 - 2023).
Enviado por Noelia o Xov, 22/06/2023 - 10:52O pasado martes, todo o alumnado do centro realizou unha visita ao parque zoolóxico de Marcelle en Lugo. A actividade foi pagada pola ANPA do centro e o Concello fíxose cargo do trransporte.
Tivemos a sorte de que o tempo nos acompañase nunha xornada intensa e chea de emocións nesta última saída do curso antes do comezo das vacacións.
"O NOSO GALIÑEIRO" Proxecto finalista para a IX beca das fundacións María José Jove e INGADA. (20 - 06 - 2023).
Enviado por Noelia o Xov, 22/06/2023 - 10:27Este pasado 20 de xuño, tivo lugar o acto de entrega da IX beca da fundación María José Jove e INGADA (Instituto Galego do TDAH e trastornos asociados) resultado dos traballos presentados no Curso de Formación de Profesorado en relación co Alumnado con Trastorno por Déficit de Atención e Hiperactividade (TDAH) que foi impartido en toda Galicia co apoio da Consellería de Cultura, Educación, Formación Profesional e Universidades da Xunta de Galicia.
Un destes traballos foi presentado polo noso centro "O NOSO GALIÑEIRO. APRENDENDO A XESTIONAR A ECO-GRANXA ESCOLAR" e resultou un dos tres finalistas para optar á beca de 3.000 euros que ambas entidades ofrecían.
O noso proxecto non resultou gañador pero despertou moito interese na fundación INGADA polo que manifestaron o seu desexo de poñerse en contacto con nós para o vindeiro curso escolar coa idea de estudar o cofinanciamento do mesmo.
Esperamos con interese esta chamada mentres seguimos traballando por unha educación inclusiva en comunidade!
RECICLANDO PAPEL E FOMENTANDO A CONVIVENCIA NO DÍA MUNDIAL DO MEDIO AMBIENTE (05 - 06 - 2023).
Enviado por Noelia o Lun, 05/06/2023 - 20:12Este 5 de xuño, "Día mundial do medio ambiente", celebramos no noso centro un obradoiro de papel reciclado.
Despois dunha semana de preparación recollendo o papel usado, clasificando, picando e batendo para facer unha pasta base; por fin chegou o momento de elaborar as nosas láminas.
Quixemos facelo en comunidade, convidando ás familias a participar pero tamén aos nosos veciños e veciñas da residencia de persoas con discapacidade "Domus VI".
Un grupo de usuarios e usuarias xunto coa educadora e a animadora sociocultural achegáronse ata o noso centro e compartiron coa comunidade educativa do Rosalía de Castro unha mañá de traballo colaborativo e experiencias creativas.
Moitas grazas a todas as persoas que colaborastes para que este obradoiro saise adiante! Sodes xeniais!
O CEIP ROSALÍA DE CASTRO COLABORA CO MERCADIÑO SOLIDARIO DE "HOSPITALEIROS SEN FRONTEIRAS" EN SARRIA (sábado 3 de xuño).
Enviado por Noelia o Xov, 01/06/2023 - 21:54Esta pasada fin de semana, entregamos á ONG "Hospitaleiros sen fronteiras" a recadación que o alumnado xuntou coas "tomateiras solidarias".
Dende a organización transmitíronnos o seu agradecemento pola xenerosidade das familias de Bóveda e o bo traballo das nenas e dos nenos sementando e coidando as plantiñas que se venderon tan ben.
Pero a colaboración non queda aquí: o vindeiro sábado día 3 de xuño, a ONG celebra en Sarria o segundo mercadiño solidario en favor dos nenos Talibé do Senegal. Nesta ocasión o noso cole colabora con bisutería elaborada nos tempos de lecer no "recanto creativo" da nosa biblioteca escolar.
Haberá obradoiros, actividades e actuacións dende as 12:00 h. ata as 21:00 h. Animádevos a ir!