Este venres tivemos dúas celebracións no noso cole:

  Primeiro foi a festa de Samaín que se levou a cabo no ximnasio. Baixando as escaleiras adentrámonos no fabuloso túnel do terror e comezou a nosa sesión de xogos.

  Xogos con castañas, con globos e xogos de pistas ocuparon boa parte da mañá. Despois de moito correr e saltar subimos ao pavillón onde Martín (pai de Maia) e Carlos (pai de Dylan e Daniela) nos prepararon un rico magosto no tambor.

  Foi unha xornada estupenda chea de risas e diversión, lástima que a auga non nos permitiu repartir as nosas cabazas polos cruces de camiños de Bóveda nin levarllas ata a residencia Domus VI (seguro que algo se nos ocurrirá para solucionalo.)

  As tardes do 26 e 27 de outubro dedicáronse a crear un túnel do terror para a nosa celebración do Samaín. Ata contamos cun cadaleito de verdade!!

  Moitísimas grazas a todas as familias que nos mandastes decoración e ás que viñestes para montar todo!

  Sodes xeniais!!

  Ao longo desta semana, as familias do alumnado, mandaron ao cole cabazas e castañas para a nosa celebración do Magosto - Samaín.

  Moitas grazas pola vosa colaboración!

  Ademais, María e Luís (nai e pai de Xila) e Yolanda (nai de Theo), acompañáronnos  no obradoiro  para axudarnos a transformar as cabazas en caveiras arrepiantes coas que espantar os nosos medos!

  Quedaron estupendas!!

  Comeza nesta semana o reparto de ovos do noso gaiñeiro para as familias que manifestaron o seu desexo de levalos para a casa.

  Iremos en orde de lista, dende o alumnado máis pequeniño ata o alumnado de maior idade.

  Comeza Valentina, que marchou feliz coa súa maletiña para transportalos!

  Este luns, para conmemorar o "Día das bibliotecas" fomos convidados pola biblioteca municipal de Bóveda ao espectáculo de monicreques "Procúrase Pepa A Loba" de Cristina Collazo. Compartiron esta xornada con nós usuarios e usuarias da residencia "Domus VI".

  Foi un espectáculo moi divertido e pasámolo de medo!

  Moitas grazas por organizalo e convidarnos a asistir!!

  Como cada día, despois do xantar, Chichita e un par de nenos/as van levar comidiña ao galiñeiro.

  Hoxe tocoulles a Carlos e máis Aurora que se atoparon coa grata sorpresa de que as nosas pitas comezaron a poñer.

  Este é o noso primeiro ovo da escola e queremos compartir a noticia con toda a comunidade educativa.

  Hoxe recibimos a visita de Luís, o avó de María, que chegou cun novo galo para o galiñeiro.

  Luís viña preparado, ademais,cunhas tesoiras especiais para as plumas das ás das nosas pitas.

  O avó de María sabe moito sobre galiñas e explicounos que é preciso recortarlle un pouco as plumas da punta das ás para que non escapen voando. (Iso non lles doe nada, é coma ir á perruquería a cortar o pelo).

  Estivemos moi atentos e atentas a todo o proceso e agradecémoslle a Luís o seu traballo e as súas ensinanzas.

  Nesta semana vivíronse no noso cole momentos asombrosos! Dende a explosión dun ovo fétido ata a desaparición da parella da nosa galiña Rosalía. Comecemos dende o principio:

  A PASADA FIN DE SEMANA chegou a primeira pita habitante do noso galiñeiro, ela é Rosalía, unha pitiña negra que chegou de noite da man de Montse, Diego e Amable (nai, irmán e avoa de Álex) tapadiña nunha caixa e acompañada dos dous ovos que estaba rematando de incubar.

  Rosalía estaba destinada a ser a nai adoptiva dos ovos que tiñamos na incubadora. Lastimosamente, os ovos non foron adiante así que depositamos as nosas esperanzas neses outros dous que Rosalía traía consigo.

  O LUNS fomos correndo a ver a Rosalía e comprobar se naceran pero o ansiado momento non acababa de chegar.

  O MARTES apareceu o galo Manuel, pequeniño pero impetuoso e, dado que os ovos de Rosalía non naceran decidimos abrilos. Aquí é onde se produciu a EXPLOSIÓN INESPERADA que colleu de sorpresa aos alí presentes deixando un aroma indescriptible nos arredores do horto.

  Coa idea de que a natureza seguira o seu curso e nos regalara os tan ansiados pitiños, decidimos aumentar as posibilidades traendo ao cole dúas galiñas máis. Hoxe XOVES, Yolanda (nai de Theo), trouxo dúas pitiñas novas que fomos levar a primeira hora ao galiñeiro.

  Foi nese momento cando nos decatamos do sorprendente suceso: O GALO MANUEL NON ESTABA NO GALIÑEIRO! Deixamos ás dúas pitiñas dentro e rapidamente iniciamos unha procura que resultou infructuosa.

  Precisabamos axuda de todo o cole así que o alumnado de Infantil percorreu todas as aulas informando da desaparición e emprazando a todos e a todas a unha procura exhaustiva na hora do recreo.

  Todo o mundo participou e, grazas ás dotes detectivescas do noso alumnado, puidemos atopar as pistas en forma de plumas negras e varios buratos por onde poida que Manuel se fugase.

  Seguiremos investigando e informaremos de calquera avance nas nosas pesquisas.

  Esta é unha FOTO DE ARQUIVO do noso galo. Rogamos a quen o vexa que avise axiña ao colexio. Grazas pola vosa colaboración.

O alumnado de 3º e 4º de Primaria coa axuda do profe Félix realizou a colleita do millo do horto escolar e gardaron todos os tomates para que vaian madurando no interior.

Os habitantes do noso galiñeiro darán boa conta desta nosa produción!

  Antes de cada sesión de traballo no horto sentamos nos troncos da nosa asemblea para poder organizar as labores e tamén, ao remate, valorar a xornada.

  Para que estes "sentallós" poidan durar moito tempo decidimos protexelos e decoralos con pintura acrílica de cores.

  O alumnado de Infantil xunto co alumnado de 5º e 6º de Primaria, levaron a cabo este obradoiro cooperativo de traballo por parellas.

  A actividade foi todo un éxito: as nenas e nenos pequenos portáronse de marabilla e as nenas e nenos maiores fixeron un fantástico traballo de titorización, asesoramento e colaboración.

  Grazas rapazada! Sodes xeniais!!