CEIP de Arzúa

É TEMPO DE ENTROIDO!

A semana do 5 ao 9 de febreiro estaremos ás ordes dos Mandados do Meco!

Animádevos e a desfrutar!

 MANDADOS DO MECO

Se a volta ao mundo queres dar,

disfrázate con nós

e vén desfrutar!

O luns, para comezar,

trae algo na cabeza

e a bailar!

O martes, para continuar,

unha volta ao pobo imos dar,

de países e turistas,

que ben o imos pasar!

O mércores, para desfrutar

trae algo no pescozo

e a gozar!

O xoves, para descansar

xa non quites o pixama

e a soñar!

O venres, para rematar,

vén disfrazado do que queiras,

e unhas risas imos botar!

O 30 de xaneiro conmemoramos o Día da Non Violencia e a Paz.

Escolleuse esta data en memoria de Mahatma Gandhi, líder pacifista da India.

A súa frase “Non hai camiño para a Paz, a Paz é o camiño” converteuse nun lema universal contra a violencia.

Estes son algúns dos traballos realizados polas diferentes titorías:

Xa temos o mural para o Día da Educación, no que expoñemos un pequeno "dicionario" con verbos e imaxes relacionados con esta conmemoración, lembrando o afortunados e afortunadas que somos por ter acceso á Educación, xa que ten un papel fundamental nas nosas vidas.

Podedes ver o interior do Dicionario mundial da educación que fixemos entre as distintas aulas neste formato revista AQUÍ

O alumnado de 6º de Educación Primaria do CEIP de Arzúa que o vindeiro curso 2024-25 vaia cursar os seus estudos no IES de Arzúa (centro ao que está adscrito o CEIP de Arzúa) deberá realizar a reserva de praza entre o: 

15 de xaneiro e o 5 de febreiro

(ambos incluídos)

Para tal efecto deberán cubrir o anexo correspondente e entregalo na Secretaría do NOSO CENTRO no horario de ATENCIÓN ÁS FAMILIAS ou envialo polo alumnado, que llo deberá entregar á súa titora.

DESCARGAR ANEXO GALEGO

DESCARGAR ANEXO CASTELÁN

Tamén se poderá solicitar a reserva de xeito telemático a través da aplicación admisionalumnado no menú:

Solicitudes>Reserva>Crear

Lexislación aplicable:

• DECRETO 13/2022, de 3 de febreiro, polo que se regula a admisión de alumnado en centros docentes sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato regulada na Lei Orgánica 2/2006, do 3 de maio, de Educación.
• ORDE do 21 de outubro de 2022 pola que se desenvolve o Decreto 13/2022, do 3 de febreiro, e se regula o procedemento de admisión do alumnado nos centros docentes sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato reguladas na Lei Orgánica 2/2006, do 3 de maio, de educación (códigos de procedemento ED550A, ED550B e ED550C).
• CORRECCIÓN DE ERROS. Orde do 21 de outubro de 2022 pola que se desenvolve o Decreto 13/2022, do 3 de febreiro, e se regula o procedemento de admisión do alumnado nos centros docentes sostidos con fondos públicos que imparten ensinanzas de segundo ciclo de educación infantil, de educación primaria, de educación secundaria obrigatoria e de bacharelato reguladas na Lei orgánica 2/2006, do 3 de maio, de educación (códigos de procedemento ED550A, ED550B e ED550C).

É TEMPO DE NADAL!

Desde o CEIP de Arzúa desexámosvos que este Nadal traia moito amor, paz e esperanza para todos e todas... e que os vosos mellores desexos se cumpran para o ano que se aproxima!

Postal de Nadal feita polo alumnado de 6º de Educación Infantil.

Videofelicitación de Nadal feita polo alumnado de 4º A e B de Educación Primaria con traballos de todos os nenos e nenas do colexio.

 Tivemos a visita do Apalpador, que visitou a todos os rapaces e rapazas polas súas aulas.

Grazas á ANPA O FORMENTO por facelo posible.

E tamén tivemos a visita dos Reis Magos, que recibiron aos máis cativos e cativas no salón de actos.

Grazas á ANPA XERMOLOS por facelo posible.

FELICES FESTAS A TODOS E TODAS!

Despois de chegar ao Museo e tomar un pequeno almorzo, comezamos a nosa aventura.

Repartímonos en dous grupos e, dentro de cada un, fixemos outros cinco grupos máis pequenos. Coa axuda das nosas guías, fomos percorrendo as distintas plantas. Como a temática escollida era a natureza, detivémonos diante das pinturas de Rubens e Luís Seoane, para ir completando un traballo que nos encomendaron. 

Estas son as nenas e nenos de 4ºB:

Estas son as nenas e os nenos de 4º A:

Este ano de novo contamos coa axuda do voluntariado da Biblioteca escolar para realizar un contacontos coa temática do nadal, neste caso para os nenos e nenas de Educación Infantil.

O conto escollido foi A familia de Basilia, unha historia na que falamos do que é verdadeiramente importante nestas festas: pasar tempo cos amigos e a familia.

Moitas grazas polo voso esforzo! Para finais de curso prepararemos outra divertida historia coa axuda dos voluntarios e voluntarias que non puideron participar neste.

Esta mañá, 20 de decembro, fixemos unha saída co alumnado de 4º, 5º e 6º de E. Primaria para visitar a Residencia San José de Arzúa. As nenas e nenos do noso colexio, prepararon unhas panxoliñas con moito agarimo, para cantárllelas aos anciáns desta Residencia.

Cando atravesamos a porta do centro, cada neno e cada nena foise sentando no chan, esperando a súa quenda para cantar. Ao sinal da profe Cristina foron intervindo e deleitando aos que estaban presentes coas súas cancións e coreografías. 

Estas fotos corresponden a distintos momentos da actuación.

Unha vez rematada a actuación, un grupo de residentes interpretou un par de panxoliñas e o noso alumnado transformouse, durante un intre, en espectador.

Foi marabilloso presenciar este encontro de dúas xeracións que compartiron emocións e sentimentos arredor destas festas tan entrañables e familiares.

Para finalizar este acto, fíxoselle entrega a cada residente dunha postal elaborada polo alumnado  do noso colexio e eles e elas entregáronnos unha manualidade.Tamén ao despedirnos, repartiron uns caramelos e piruletas que fixeron as ledicias de todos e todas.

Moitas grazas a Residencia San José por acollernos tan ben e permitirnos compartir un anaco do voso tempo! E, como non, moitas grazas tamén á nosa compañeira Cristina por preparar estas panxoliñas cos nenos e coas nenas de 4º, 5º e 6º!!

De volta no noso colexio, repetimos a actuación para que puidera vela o alumnado de E.Infantil, 1º, 2º e 3º de E.Primaria. Estas fotos foron sacadas no salón de actos do noso centro.

Achegándonos ás vacacións de Nadal, hai que buscar un intre para escribir a carta ás súas Maxestades, os Reis Magos de Oriente. Deixámosvos aquí un modelo de carta que podedes imprimir.

Preme aquí

Sabías que un de cada dez nenos é un neno con discapacidade?

As persoas con discapacidade foron historicamente marxinadas. Cómpre redobrar e acelerar os nosos esforzos para integralas na sociedade e axudarlles a conseguir as súas metas.

O noso mural colectivo, que leva por título, “A diversidade enriquece”, quere ser unha homenaxe a todos estes superheroes e a todas estas superheroínas que están aquí para regalarnos sorrisos, abrazos, agarimos… e cos que queremos compartir unha morea de retos e aventuras. Quixemos destacar todas esas cousas que elas e eles son capaces de facer, aínda que a súa discapacidade ás veces llo pon moi difícil.