Complementarias

Máis imaxes da xornada neste álbum

O alumnado de 3º ESO visitou Ourense para achegarse a Galiciencia, unha feira que se celebra dende 2006 co obxectivo principal de achegar a ciencia á sociedade en xeral e aos estudantes en particular. Nesta saída, organizada polos Departamentos de Bioloxía, Tecnoloxía e Relixión, os rapaces e rapazas puideron visitar proxectos científicos de diferentes centros de Galicia, que nesta ocasión versaban sobre a economía circular. Ademais, asistiron a diferentes obradoiros como "Dálle a volta ao usar e tirar", con Manuel Vicente, e ao espectáculo "Falamos de economía circular" con David Ballesteros. Pero aínda houbo máis e pola mañá visitaron a capital ourensá, na que coñeceron a Catedral, As Burgas, a Praza Maior e outros lugares de interese do casco vello.

Máis imaxes dos roteiros neste álbum

Durante a segunda quincena de abril o alumnado de diferentes cursos participou en tres roteiros científicos enmarcados no poxecto Divulgaciencia, un programa do Concello de Soutomaior que pretende espertar a curiosidade pola ciencia e difundir contidos científico-tecnolóxicos entre o alumnado e a poboación en xeral e que culminou o pasado 5 de maio coa celebración da I Feira da Ciencia. Este programa municipal conta co financiamento da FECYT, a Federación Española de Ciencia e Tecnoloxía. 

O alumnado de 4º ESO de Bioloxía participou no percorrido "Soutomaior mira ao mar", roteiro orientado ao medio mariño para abordar cuestións ambientais relacionados co mar e a xeomorfoloxía do litoral. Pola súa banda, o alumnado de 1º ESO e de 1º BACH-Bioloxía implicouse na andaina "Mergúllate no monte", que ofreceu un percorrido polos camiños da Montesiña para aprender a recoñecer a fauna e a flora dos bosques. Finalmente, en colaboración co Dpto. de Física e Química, os rapaces e rapazas de 2º ESO sumáronse a unha "Aventura ecolóxica", que consistiu nunha visita á praia da Muxeira para realizar unha recollida de residuos e unha mostraxe de microplásticos, que foron enviados logo ao proxecto The Big Microplastics Survey.

As actividades do Programa Divulgaciencia 2022 comezaron antes das vacacións cos obradoiros desenvolvidos no centro para o alumnado de 1º e 3º ESO.

O alumnado de 1º de ESO acudiu ao FIC Andaina, o X Festival Internacional de curtametraxes e diversidade funcional, organizado pola asociación Andaina.

Tras unha poñencia e o visionado, puidemos votar a nosa favorita entre as 4 curtometraxes presentadas:

• "Adopción especial”, que narrou as conversas dunha parella sobre a adopción dun neno/a con necesidades especiais.
• “Orquesta Los Bengala”; onde o humor, a amizade e a familia xuntan forzas para axudar un dos protagonistas, que sofre demencia.
• “Mordisquitos”; a historia dunha parella, co trasfondo da saúde mental.
• “Intentando”; que xirou en torno ás conversas dun fillo co seu pai: a importancia de esforzarse, de non frustrarse e loitar por un mesmo, axudar os demais, respectar as diferenzas e non crerse superior a ninguén...

Hoxe cúmprese o 48º aniversario do 25 de Abril, o día no que o Movimento das Forças Armadas (MFA) e o pobo portugués saíron á rúa e protagonizaron a Revolução dos Cravos, que puxo fin ao Estado Novo, a ditadura de Antônio de Oliveira Salazar.

Na madrugada daquel día, ás 00.25, soou na Rádio Renascença o Grândola, vila morena, de José Alfonso, o Zeca. Era o sinal pactado para comezar a revolta democrática, que Celeste Caeiro, de ascendencia galega, simbolizou nun cravo, nun caravel. Zeca Fonso cantara o "Grândola" dous anos antes no histórico concerto do Burgo das Nacións de Santiago de Compostela.

Grazas á Associaçom José Afonso Galiza, contamos durante toda esta semana coa exposición "Os cartazes do 25 de abril".

Onte, martes 22 de abril, botou a andar o Clube de Lectura en Galego para Adultos do IES de Soutomaior con motivo da celebración da I Feira do Libro de Soutomaior e na véspera do Día do Libro. 

Máis imaxes do encontro aquí.

Para esta estrea, tivemos a sorte de contar coa presenza de María Rei Vilas, autora da primeira lectura escollida, Flores de ferro, coa que mantivemos unha agradable conversa sobre o proceso da escrita, sobre como se xestou a historia e aínda máis: o trasfondo histórico do golpe de estado franquista e a ditadura que abriron a porta de inferno da violencia e a represión, os silencios e os traumas que arrastramos sobre esa época nas familias e na sociedade, a evolución dun mundo rural en desaparición... e, sobre todo, dos personaxes nunha novela de marcado protagonismo feminino (Camila, Olga, Aurora, Helia, Lola, Matilde, Catarina, Esperanza, Nidia...) que nos arrastran cara á revelación dun segredo que vos convidamos a descubrir.

Horas antes, no acto de inauguración da I Feira do Libro de Soutomaior na Alameda Talo Río, algúns dos membros dos clubes de lectura do IES de Soutomaior improvisaron unha breve performance que incluíu unha solta de libros entre as persoas asistentes. Grazas Lucía, Sofía, Álvaro, Xiana e Clara por colaborar neste evento, no que tamén participaron tres alumnas do Colexio Santiago Apóstol que fixeron unha invitación á lectura a través dun texto de Xulio Verne e deron a coñecer o programa da feira acompañadas pola son excepcional do oboe.

A programación inclúe a presenza de dous profesores do centro, Irene Alonso, que estará presente cos libros A caca Cuca e As cicatrices do caranguexo, e Orlando Beares, con A historia do cómic en Galicia.