FacebookSíguenos en YouTube

Concurso de microrrelatos

Este curso en colaboración co proxecto do contrato programa Feminino Plural, o EDL e o departamento de galego organizamos un concurso de microrrelatos entre o alumnado de 3º ESO. O obxectivo era que lle puxeran un título e a partir dunha frase inicial , elaboraran un relato dunhas 100 palabras . O tema do relato tiña que estar relacionado coa igualdade e os estereotipòs de xénero. A gañadora foi Sarai Rial Suárez, co seguinte microrrelato:

Mamá xa non facía todo..

A Xan, o meu irmán pequeno, o caldo saíalle cada vez mellor, mais era díficil conciencialo de que debía facer a comida, pasar o ferro e poñer a lavadora desde que mamá xa non estaba.

Resultáballe estraño e custoso ter que facer tres daquelas tantas tarefas que mamá facía a diario.Pero maís estraño lle parecía que papá levase toda a vida dicíndolle que non era traballo ningún manter a casa, criarnos, exercer o seu traballo e a maiores facerse cargo do pequeno que levaba dentro.

Igual esa era a razón pola que mamá non aparecía pola casa desde había varios meses.

Concurso de Haikus en 1º e 2º ESO

Dada a acollida que esta actividade tivo o curso pasado, o  EDL coa colaboración do departamento de galego, decidiu organizar, un ano máis, un concurso de haikus no que participou todo o alumnado de 1º e 2º da ESO. O haiku é un xénero poético de orixe xaponesa  e consta de tres versos sin rima, de 5, 7 e 5 sílabas e adoitan facer referencia a escenas da natureza ou da vida cotiá. O obxectivo era fomentar a creatividade e a poesía. O alumnado ademais de escribir o poema realizou un debuxo ou adxuntou unha foto relacionadas co tema do haiku. Finalmente, fixemos unha exposición sobre os mesmos.

Entregouse un premio por curso. O gañador en 1º da ESO foi Silver Lema Vázquez co seguinte haiku:

A tartaruga 

de auga doce,nada

como se nada

En 2º da ESO a gañadora foi Daniela González Moure

Caen bágoas

pantasmas na escuma

encadeada

Día de Rosalía no Centro

O venres 23 de febreiro, gustaríanos conmemorar o día de Rosalía no noso Centro coas seguintes actividades:

O profesorado que o desexe poderá recoller un cravo e un libro de Rosalía que estarán á súa disposición dende a primeira hora na Sala do Profesorado. Terán tamén á súa disposición unha copia do manifesto da AELG que será lido por alumnado do centro. Pretendemos adicarlle a hora de lectura da vindeira semana (mércores) a dita autora.

Xornada Enreguéifate para o fomento e aproveitamento educativo da improvisación oral

Imaxe de www.carballo.org

O IES Maximino Romero de Lema estivo presente  no Enreguéifate, que tivo lugar a pasada fin de semana en Carballo. O Director do noso Instituto o músico, mestre e regueifeiro, Manolo Maseda, foi o encargado de presentar proxecto Regueifesta, no que participa alumnado de Baio e de Vila de Cruces. O seu principal obxectivo é espallar a improvisación oral en verso no ámbito escolar, tendo en conta as múltiples potencialidades educativas que ten e valéndose dela como unha ferramenta de transformación social. 

Ao son delas: Sés e Benedicta

O vindeiro luns 19 de febreiro terá lugar a segunda xornada de Ao son delas. Desta volta visítanos Ses e Benedicta. Como na primeira xornada, estaremos no Auditorio de Baio. O faladoiro será ás 16.30h e o concerto ás 17.15h

Alumnado do Labarta Pose e do Maximino Romero de Lema, deséxanvos unha festa de Entroido CHEA DE VIDA!!!

Onte tivemos a visita do alumnado de sexto de primaria coa súa profe de Relixión e o seu profe de Música. O alumnado de Imaxe e Son de Segundo de Bacharelato ofreceuse a gravarlles un tema para o video-clip e ao final animáronse a cantar e todo. Imos seguir traballando conxuntamente para tecer un tránsito entre os dous colexios de Baio. 

Primeira premestura do traballo realizado: 

Admisión para o vindeiro curso 2018-2019

A solicitude de admisión pode presentarse a través da aplicación https://www.edu.xunta.es/admisionalumnado ou de forma presencial no centro docente indicado como primeira opción.

A solicitude de admisión será única e terá carácter vinculante. No caso de presentación de máis dunha solicitude para unha mesma persoa perderá os dereitos de prioridade que puidense corresponderlle. O que ten garantía de permanencia nun centro, se presenta solicitude de admisión noutro distinto deberá comunicalo, ao mesmo tempo, ao centro de orixe. O alumnado que ten reserva de praza nun centro, se presenta solicitude de admisión noutro distinto deberá comunicar a renuncia á reserva antes do inicio do prazo de presentación de solicitudes de admisión.

O centro ten servizo de transporte escolar.

Adxuntamos calendario e documento de reserva de praza.

Distribuir contido