IES Maximino Romero de Lema

No patio do centro, a carón dos Power Letters, nunha bonita mañá soleada e algo venteada e coa música e animación do trío Abril.  Así foi como despedimos a Semana Cultural, e a gana de pasalo ben púxose de manifesto xa na segunda canción, coa que comezamos a bailar e troulear e non paramos ata rematar o concerto.

Foi un bonito e divertido peche ás actividades da Semana Cultural, no que tivemos a oportunidade de gozar da música nun espazo incomparable e no que Abril, coas súas melodías tradicionais arranxadas con sonoridades máis actualizadas, fixo espertar a gana de pasalo ben conseguindo que un cada vez máis numeroso grupo de alumnos e alumnas, xunto con algún profesor, se animara a bailar sen descanso ata o final.

Desta maneira, este trío vigués, formado por Claudia Abril á voz e pandeireta, Marina Carpente ao violín e Antón Lago á guitarra, demostrou por que cunha traxectoria que aínda non fixo máis que comezar xa ten unha candidatura aos premios Mestre Mateo 2023.  Pola nosa parte, manifestámoslles todo o noso apoio e desexámoslle moita sorte.

E con isto rematou a nosa Semana Cultural.  Nela aprendemos, experimentamos, practicamos novos deportes, gozamos da poesía, do teatro, da música …  Un gran número de variadas actividades que conformaron unha interesantísima paréntese na rutina académica e que nos servirá para afrontar con enerxía o final do curso.

Ata a próxima!!

Como non podía ser doutro xeito tamén tivemos teatro na Semana Cultural. O grupo ELAS do IES Maximino Romero de Lema, baixo a dirección de Ricardo Vigueret, representou O partido, adaptación da obra de Marta Buchaca.

O elenco, conformado por Andrea Pastoriza Lema, Marina García Camafreita, Jimena Moreno López, María Calvo Rojo, Alicia Martínez Vidal, Helena Vázquez Espasandín e Ainara Pose Pazos, interpreta de xeito magnífico a sete mulleres que reivindican a igualdade nun ámbito no que aínda se respira moito machismo: no fútbol.

A peza desenvólvese no vestiario dun equipo de fútbol feminino no día da final para entrar no campionato de España, e nela amósanse as diversas situacións que viven as mulleres a través das que quedan plasmados estereotipos que aínda imperan nunha sociedade moi machista en moitos ámbitos.

Moitos parabéns a ELAS, ao director e tamén a Hadrián Otero Nieto, encargado do son e das luces. Moitas grazas por facernos gozar co TEATRO.

O club de Ciencia Baiociencia organizou unha actividade máis para o derradeiro día da Semana Cultural: dende Arenaria viñeron impartir o obradoiro A Maxia da Ciencia no que a través de experimentos, xogos e probas de enxeño o alumnado participante (1º e 2º ESO) descubriu por que ocorren determinados fenómenos da súa contorna. Podo poñer lume na miña man sen queimarme? Podo sacar unha lata de refresco dunha taza sen tocala? Por que soben os globos aerostáticos ou voan os avións? Son algunhas das cuestións ás que se deu resposta durante o taller de divulgación científica.

No noso Centro desenvolvemos un proxecto educativo inclusivo coa diversidade afectivo-sexual e de xénero, e dentro das actuacións que desenvolvemos, enmárcase a visita de Cristina Palacios, presidenta de Arelas, unha asociación de familias de nenxs e adolescentes trans.

A traballadora social e docente desenvolveu ante o alumnado de 1º FPB e de 3º ESO o obradoiro Escolas se armarios. TRANSformando a educación, durante o cal compartiu reflexións sobre como se sente as persoas trans e homosexuais, deixando claro en todo momento que son opcións tan válidas como a heterosexual. 

A partir da experiencia da súa filla trans foi compartindo as dificultades deste colectivo no seu día a día: a discriminación que sofren, o acoso ao que se ven sometidxs (discriminación, insultos, agresións físicas e sexuais), o estrés e do medo que sofren ante a idea de saír do armario, e que nalgúns casos leva ao suicidio; falou da disforia de xénero ou angustia polo seu corpo e xenital asociada co rexeitamento social aos “corpos non normativos” Tamén fixo alusión a falta de apoio ou de acompañamento familiar en moitos casos e, aos prexuízos institucionais con leis e políticas que crean desigualdades e/ou non lles brindan protección contra as violencias LGTBIfóbicas. 

Agradecémoslle a Cristina o enorme esforzo que realiza por dar visibilidades aos  nenxs e adolescentes trans e homosexuais, que están transformando o mundo educativo e, polo tanto, é necesario falar deles, escoitalos e aforrarlles un sufrimento innecesario. A actividade foi valorada moi  positivamente e necesaria polo alumnado xa que recoñecen que teñen moi pouca información sobre o tema. 

O alumnado de 1º Ciclo Medio e de 1º de FPB puido vivir en directo un simulacro de accidente de tráfico con escarceración realizado polo GEA de Ponteceso. Puideron ver como actúan os servizos de emerxencia ante un sinistro vial. O corte do vehículo para poder extraer os presuntos feridos -dous dos nosos alumnos- foi unha das intervencións que máis chamou a atención. 

Ao mesmo tempo que realizaban o simulacro, o representante do GEA, que explicaba os pasos que estaban a seguir, proporcionáballes pílulas informativas sobre distintos aspectos para previr accidentes de tráfico que tantas vidas de mozos e mozas truncan. 

Unha actividade de sensibilización sobre os accidentes de tráfico para que rapaces e rapazas se conciencien da necesidade dunha condución responsable.

Na sociedade actual hai un importante incremento das enfermidades mentais e das taxas de suicidios ou intentos de suicidios que se producen na poboación durante a adolescencia. Por iso cremos que é importante previr e falar sobre esta lacra social nos centros educativos; por este motivo a enfermeira especialista en Saúde Mental, Sara García Garrido que traballa na Unidade de Prevención do Suicidio C.S. San José (A Coruña) e o psiquiatra Alberto Ramos Caneda da Unidade de Saúde Mental de Carballo achegáronse ao noso Centro para impartir ao alumnado de 1º Bacharelato a charla-coloquio Do latín sui cadere na que brindou a oportunidade a todos presentes de reflexionar sobre o tema, de coñecer ossinais de alarma tanto en un mesmo coma nos nosos achegados e de saber pedir axuda para evitar futuras traxedias.

Comentaron os factores de risco (enfermidade mental, dor, discapacidade, consumo de drogas, mala situación socioeconómica…), os factores precipitantes (acoso, desengano amoroso, non aceptación da identidade sexual, fracaso escolar…) e tamén sinalaron os factores protectores (autoestima, apoio da familia, participar en actividades, referentes positivos…)

Remataron a súa maxistral intervención lembrando os teléfonos de axuda antisuicida, desde o máis recente 024 atendido por profesionais e totalmente confidencial ata o 717003717 da Asociación Internacional do Teléfono da Esperanza e o 900 20 20 10 (con chat) da entidade Anar de axuda a nenos e adolescentes. Todos gratuítos e activos as 24 horas do día.

Moitas grazas a Sara e Alberto o por esta magnífica lección de vida!

A nutricionista Candela Martínez achegouse ao noso Centro para impartir unha charla sobre a importancia dunha alimentación óptima para ter o máximo rendemento académico. Destacou os nutrientes e as vitaminas que máis necesita o cerebro para mellorar a memoria e a concentración, e cales son os alimentos que os conteñen. Insistiu na importancia de realizar un bo almorzo - cada alumno/a describiu a súa primeira comida do día, despois os/as compañeiros/as tiñan que melloralo e finalmente a especialista fixo a súa proposta-.

En definitiva o alumnado participante (3º ESO) puido coñecer que hai que levar unha dieta saudable para dar o 100% do seu potencial á hora de render nos seus estudos!

Dores Tembrás guiou o alumnado de 2º ESO na realización dun autorretrato a través dos seus obxectos queridos.

A actividade comezou no fogar onde cada alumno/a tiña que pensar no obxecto ao que lle tiña especial apego. Unha vez na aula a poeta iniciou o obradoiro lembrando as características que debe ter un texto para ser considerado poesía -emoción, precisión, intensidade, beleza….; a continuación  cada neno/a comentou en alto que obxecto trouxera e por que: o caderno de tapas de coiro escrito polo bisavó, o libro que lle regalara a avoa, a bóla coa que xogaba o gato xa ausente, a camiseta do equipo favorito, a súa primeira boneca, o peluche que herdou do irmán, o reloxo de peto que herdou do pai e este do avó….. Coas súas explicacións, moi emotivas nalgúns casos, transmitiron parte da súa memoria, da súa historia.

Finalmente, seguindo as pautas marcadas por Dores Tembrás, realizaron cadanseu selfie poético no que os obxectos se revelaron como verdadeiros tesouros: son lembranza da familia, da súa xenealoxía, do momento no que foron regalados, da orixe dunha relación, da persoa que  o agasallou...