2008-09, Extraescolares e complementarias, Propostas por niveis

VISITA AO INSTITUO DE INVESTIGACIÓNS MARIÑAS-VIGO

Alumnos/as de 2º D de bacharelato realizaron unha visita ao Instituto de Investigacións Mariñas de Vigo . Amosoúselles, primeiramente, nunha presentación a historia do centro e da incorporación da muller á investigación. En determinados departamentos observaron os traballos de investigación. resistencia das barbas de mexilón ás cordas dependendo da intensidade das correntes mariñas e do seu propio peso; a influencia dos cambios atmosféricos na conservación e transporte do peixe; cambios ambientais para evitar o deterioro dos produtos mantendo ao mesmo tempo as condicións de frescura e sabor; prevención de enfermidades en invertebrados. Finalmente nun laboratorio observaron avanzados aparatos de medida.

DANZA CONTEMPORÁNEA

O 21 de marzo o Centro Coreográfico Galego actuou no Auditorio de Cangas representando Giseliña. Unha das súas compoñentes achegouse ata o noso centro a impartir un cursiño de iniciación á Danza Contemporánea no que tomou parte o alumnado do Ciclo Superior de Actividades Físico-Deportivas. Realizaron exercicios varios de expresión corporal, así como diversos pasos básicos de danza. Esta actividade foi valorada de xeito moi positivo polos alumnos/as.

VISITA A NODOSA

Os alumnos/as de Tecnoloxía Industrial de 1º D de bach., na compaña da súa profesora, realizaron unha visita a Nodosa, na procura de información sobre a construción de barcos de aceiro, o seu proceso de produción, incluso a concepción mesma do proxecto a través das diversas fases de elaboración diseñadas desde a oficina técnica.

De xeito práctico fixeron un seguimento nos talleres de todo o proceso levado a cabo con máquinas CNC: corte de pranchas mediante oxicorte e plasma, realización das diversas pezas e o seu encaixe posterior, soldadura e montaxe. Esta técnica aplícase por parte de Nodosa aos barcos de pesca, barcos de recreo e pasaxe, remolcadores, etc. Para máis información www.nodosa.com

 

VISITA A SANTIAGO

Alumnado de 2º da ESO, acompañado polas profesoras Sela Ares, Carmen Otero e Rosa Cabada, estivo en Santiago o 14 de abril. De mañá participaron en tres obradoiros no Instituto Galego de Consumo: etiquetado de alimentos, videoxogos e linguaxe publicitaria. A finalidade desta actividade radicaba na análise da información que conteñen as etiquetas destes produtos e na identificación dos distintos elementos que conforman a publicidade.

De tarde, en Galicia Dixital, fixeron un percorrido virtual pola cidade, rematando a actividade cunha visita á Catedral. A valoración da actividade, programada polos departamentos de Ciencias Sociais e Tecnoloxía, foi valorada positivamente polo alumnado. 

VISITA INTERNOS DE A LAMA

O día 28 de marzo un grupo de integrantes do módulo de Terapia de Drogodependencia do cárcere de A Lama visitou o noso centro. Despois dun percorrido polas instalacións para observar as distintas dependencias e actividades do alumnado (clases de E. Física, Tecnoloxía, Volume, Música...), tiveron un pequeno,mais interesante, encontro con alumnos/as de 2º A de bacharelato na Biblioteca.

Rematou a súa presenza cunha charla dirixida ao alumnado de 3º e 4º da ESO na que trataron dos perigos que conleva o uso da droga. A actividade foi valorada moi positivamente por ambas partes.

SAÍDA AOS CIFP VALENTÍN PAZ ANDRADE E RICARDO MELLA

O luns 9 de marzo, dentro das actividades organizadas polo Departamento de Orientación, un grupo de 35 alumnos/as de 4º da ESO e do Programa de Cualificación Profesional Inicial (PCPI) realizaron unha visita a dous centros de Vigo nos que se imparten, entre outras modalidades de ensinanza, Ciclos Formativos de Grao Medio. O obxectivo da actividade era darlle a coñecer ao alumnado que remata a súa etapa obrigatoria parte da variada oferta de Ciclos aos que poden acceder.

No Valentín Paz Andrade, ademais das instalacións do centro,  observamos o traballo desenvolvido polos alumnos/as dos Ciclos das Familias Profesionais de Madeira e Moble, de Vehículos autopropulsados, de Fabricación mecánica (soldadura e caldereiría), de Mantemento e Servizos á produción (instalación e mantemento de calefacción e auga quente; instalador/a a mantedor/a frigorista e de aire acondicionado e climatización). Durante toda a visita fomos guiados por profesorado das distintas materias, que nos explicaron as características de cada unha destas familias profesionais.

No CIFP Ricardo Mella entramos en contacto cos Graos Medios relacionados coa saúde (auxiliar de clínica, auxiliar de primeiros auxilios, técnico en rediodiagnóstico, etc.) e tamén coas novas tecnoloxías (informática, imaxe e son). Despois dunha introdución a estes Ciclos visitamos, divididos en dous grupos, os módulos onde se imparten as ensinanzas de tipo sanitario e os módulos de informática, imaxe e son.

Galería de imaxes

VIAXE A LONDRES

Do 25 de febreiro ao 1 de marzo 40 alumnos/as de bacharelato e tres profesores realizaron unha viaxe de estudos a Londres. O programa realizado foi bastante denso e o metro londinense converteuse no verdadeiro protagonista do noso periplo. Que dicir da viaxe a Greenwich o día 26 contemplando a City en Canary Warf? Ou dese paseo polo Foot Tunnel para descubrir o Observatorio do Meridiano Cero? A volta en barco polo Támesis foi memorable, pasando polas pontes máis significativas da capital británica. Ese mesmo día visitamos Westminster Abbey e rematamos de compras en Camden: algúns perdéronse a singularidade de Camden Lock, onde nos atopamos coas nosas compañeiras do IES de Rodeira.

O día 27 resultou, de mañá, un pouco marcial: acudimos aos cambios de garda en Horse Guards Parade e Buckingham Palace. De camiño ao London Eye celebramos o cumpre do director e pasamos a tarde dun precioso día polo Southbank, visitando a Tate Modern, Millenium Bridge, Shakespeare's Globe e Southwark Cathedral.

O 28 foi unha xornada espectacular: os nosos alumnos/as quedaron maravillados pola excelencia dunha das Universidades máis antigas de Europa, Cambridge. O paseo polas súas rúas peatonais, a entrada nos patios dos diferentes Colleges, a chegada ao río cos seus botes, perduran na nosa mente como un lugar que invita ao estudo. Ou non? A volta agardounos a tan esperada National Gallery e os seus magníficos fondos. Por fin puidemos visitala, ao teceiro intento.

Para o domingo pola mañá deixamos a inmensidade do British Museum: sobran as palabras. Esquecemos deliberadamente para o final deste itinerario as nosas horas por Trafalgar Square, Leicester Square, Picadilly Circus e como non o noso amado Royal National Hotel (algo cutre non?) Parodiando a película "sempre nos quedará Londres". Bye. 

ENTROIDO 2009

Como ven sendo tradicional, celebramos no centro a festa do Entroido. O venres, 20 de febreiro, ás 12,00 h., o grupo de percusión de 2º de bacharelato percorreu o Instituto para invitarnos a participar na festa e dirixirnos ás pistas, onde o alumnado do Ciclo Formativo tiña preparada unha serie de xogos, animándonos a participar (tira e acerta, a sombra, o ponche, a laranxa bailonga, o pano, etc.). Ás 12,45 procedeuse no ágora ao desfile de disfraces e comparsas presentes no concurso. Con máis de 130 participantes houbo premio para o mellor disfrace (O Chapapatas), para a mellor parella (Manolo e Benito), para o mellor grupo (A noiva cadáver e compañía) e para a mellor comparsa (Benvidos ao Zoo).

Os premiados recibiron uns vales-regalo aportados pola ANPA. Tamén como agasallo da ANPA, puideron todos os disfrazados degustar as típicas orellas de Carnaval. Para rematar bailamos ao ritmo das pezas propias do carnaval interpretadas polo grupo de gaitas.

Salientamos o feito de que, ao igual que o curso pasado, un grupo de alumnos/as do Xoán XXIII pasou con nós esta xornada festiva.

OBRADOIRO DA ONG PAZ E DESENVOLVEMENTO

O 18 de febreiro a ONG Paz e Desenvolvemento impartiulle ao alumnado de 3º e 4º da ESO un obradoiro formativo baixo o título de "Educación erótica, afectividade e autoestima". En sesións de 50 minutos as monitoras pretendían que o alumnado reflexionara, dun xeito dinámico e participativo, sobre a importancia de coñecer e loitar polos seus dereitos sexuais e reprodutivos. Mediante distintas dinámicas, fíxose fincapé na aplicación dos conceptos de tolerancia, respecto e comprensión cara as diferencias por desigualdades de xénero e roles impostos pola sociedade.

Simultaneamente no ágora había dúas exposicións:

  • Dereitos sexuais e dereitos reprodutivos: o meu corpo é un territorio clandestino.
  • Dez anos loitando contra a escravitude sexual.

A actividade foi valorada positivamente polo alumnado, aínda que se desenvolveu tan só durante unha sesión, feito este que determinou moito as actividades.

Distribuir contido