Extraescolares e Complementarias

Actividades Extraescolares e Complementarias

As actividades Complementarias e Extraescolares representan, no María Soliño, un apartado importante dentro do proxecto educativo e por iso teñen un peso significativo na programación ao longo do curso.

O obxectivo fundamental destas actividades é potenciar a educación integral do alumnado tanto no ámbito académico como no de desenvolvemento duns determinados valores persoais de traballo, respecto, tolerancia e compañeirismo.

Estas actividades deben ser na súa maioría formativas, sociais, culturais, lúdicas, nalgúns casos, e en maior ou menor grao, interdisciplinares e globalizadoras, que permitan conectar a vida do Centro coas diversas materias e a vida real do noso contorno.

En cada nivel pódense ver as actividades que propoñen para realizar neste curso os distintos departamentos. Irase completando a información a medida que se vaian realizando as actividades

Visita ao Instituto Camoês

O venres 13 xaneiro o alumnado de Português visitou o Centro Cultural do Instituto Camões, que ten a súa sede na praza de Tenente Almeida, en Vigo.

Explicáronnos as actividades que desenvolve o devandito centro para divulgar a lingua e a cultura portuguesa, como presentacións de libros a cargo dos autores/as, proxeccións de filmes, exposicións, representacións teatrais a cargo de grupo de teatro afeccionado do propio centro (dirixido pola canguesa Vanesa Sotelo); tamén imparten cursos de Língua Portuguesa, ademais realízanse os exames oficiais para acadar os certificados que acreditan os niveis A1, A2, B1, B2.

Todas as persoas podemos visitalo, acudir aos actos culturais ou consultar a súa biblioteca que conta con máis de 2000 libros, Cds de música, filmes e documentais, así mesmo ten sevizo de préstamo facendo o carné de socia/o.

 Na visita coñecemos o edificio histórico do século XVI e como foi a súa rehabilitación.

Visita a Galería de fotos clicando aquí.

Campionato provicial de orientación 2015

Este mércores, 11 de marzo,  celebrouse o Campionato provincial de orientación coa participación por vez primeira do nosos centro. Os resultados poden considerarse como magníficos na medida en que se competía con alumnos/as federados: Martina acadou o 3º posto en cadete feminio e Marcos o 4º en infantil masculino. Noraboa a todos/as os participantes. Clicando aquí podes ver unha pequena mostra do evento.

FESTIVAL BENÉFICO MARÍA SOLIÑA-INDIA

FESTIVAL BENÉFICO. ESCOLAS DO MUNDO.Risa

O sábado 7 de xuño de 2014, ás 22,00 h., terá lugar no Auditorio Municipal o Festival Benéfico a prol da Escola María Soliña da India.  Clicando nos arquivos adxuntos podedes consultar o cartel e a programación do evento.Tanto a Fila 0 como a entrada anticipada para o mesmo poden retirarse no Instituto a un prezo de 3 euros (4 euros en taquilla).

Agardamos a vosa desinteresada colaboración.

Cartel

Programación

IV XORNADAS DE ORIENTACIÓN DO MORRAZO

Alumnos/as de 4º da ESO do noso centro realizaron unha visita ao IES Johan Carballeira de Bueu dentro das IX Xornadas de Orientación do Morrazo. Cliclando aquí podes ver aos asistentes.

Día Mundial da Poesía

DÍA MUNDIAL DA POESÍA

Manifesto

Aquí e agora, en Cangas, a 21 de marzo do 2014, queremos reivindicar a Poesía. É, para nós, moi, moi necesaria

PORQUE para quen escribe é unha maneira de liberarse; para quen le, é un xeito reconfortante de sentir que non está só no mundo: hai alguén máis que pensa coma ti.

PORQUE poesía é liberdade, beleza, soños convertidos en palabras. Medos, pesadelos, monstros e escuridade. A poesía é unha mestura de todo o que nos move por dentro. A poesía é un cacho de alma.

PORQUE é ese sentimento que non se pode demostrar pero si mostrar. Unha maneira de fuxir deste [p...] mundo que non mellora e que non ten pinta de mellorar PORQUE é unha forma de respirar, de saír do teu corpo, de rachar co silencio.

PORQUE é un xogo hipnótico de palabras que se enlazan, que se xuntan con coherencia ou sen ela, con ou sen rima, pero cargadas de emocións. Cantadas, interpretadas... son silencios, son murmurios, son versos, son estrofas que se moven pola cabeza para expresar as emocións do corazón.

Club de Poesía María Soliño Cangas- 2014

Imaxes do acto

Saída didáctica a Bueu

SAÍDA DIDÁCTICA  A BUEU
ALUMNADO DE 4º ESO-PDC. ÁMBITO SOCIO´LINGÜÍSTICO
Mª XESÚS MOREIRA FONTÁN

  A finalidade da saída didáctica a Bueu foi coñecer as actividades económicas relacionadas coa pesca (industria conserveira, extracción, comercialización), ademais de observar como eran as artes e embarcacións tradicionais. Tamén visitamos o Museo Massó, emblema da industrialización galega de finais do século XIX.

  Comezamos o noso percorrido na lonxa, onde o patrón maior nos informou da pesquería máis importante e recoñecida de Bueu, o polbo, e doutras como a navalla que conta cun selo de calidade específico, recoñecido a nivel mundial, o percebe e outras pesquerías de baixura (maragota, linguado, robaliza, etc.) e de cerco (xurelo, xarda e sardiña) que se comercializa baixo a denominación “pesca de rías”. Todas estas pesquerías captúranse no contorno da illa de Ons que ofrece boa alimentación ás diferentes especies mariñas.

  Despois continuamos o percorrido seguindo o sendeiro litoral de Bueu escoitando as explicacións dun guía excepcional, Manuel Otero. Ademais de todo o relacionado coa pesca actual, o cultivo de mexillón en batea e pesca tradicional, recibimos información sobre a orixe romana de Bueu, os vestixios da salga e o comercio nesa época. Seguindo o itinerario chegamos ao peirao onde están as reproducións das embarcacións tradicionais da  Asociación “Os Galos”, onde puidemos comprobar as características das embarcacións segundo a pesquería e as artes que empregaban. Máis adiante vimos o monumento a Johan Carballeira, xornalista, poeta e alcalde de Bueu durante a II República,  entre os seus logros como alcalde destaca o acordo entre os mariñeiros e os empresarios da conserva sobre o prezo da sardiña.  Johan Carballeira foi encarcerado durante a Guerra do 36 e axusticiado inxustamente.

  Para acabar a nosa visita fomos ao Museo Massó, que está situado na antiga conserveira do mesmo nome. Puidemos ver a evolución da industria conserveira desde a salga á conserva, propiamente dita, como se estableceron en Bueu e Cangas os fomentadores cataláns desde finais do século XIX. De entre os fondos do museo destacariamos: as embarcacións e utensilios de carpintaría de ribeira, as artes de pesca tradicionais, as diversas máquinas e útiles da conserva (pódese observar a evolución tecnóloxica desde o XIX ao XX, pois Massó foi unha das industrias punteiras na Europa dos anos 60, con instalacións médicas para atender as traballadoras e traballadores), a caza da balea e o seu aproveitamento. Tamén é moi interesante a colección de maquetas de barcos, libros antigos e gravados dos Masso¨.


Marzo, 2013

Visita de Elena Gallego

VISITA DE ELENA GALLEGO ABAD A 3º C

  Sorprendeunos moito a visita de Elena Gallego Abad, unha gran escritora, autora de Dragal, a herdanza do dragón e Dragal II, a metamorfose do dragón. Todos e todas da clase de 3ºESO C lemos o primeiro dos seus libros e algunhas o segundo.Contounos como foi a súa relación coa literatura, o moito que lle gusta ler e que nunca pensou en que escribiría un libro. Tamén por que se decidiu a escribir a novela que inaugura a triloxía de Dragal, en que e en quen se inspirara para facela (nun Hadrián que estaba en Diversificación), explicounos, ademais, o tempo que tardara en escribir os libros, o primeiro tres ou catro meses e o segundo un ano. Nós fixemoslle preguntas e ela contestounos moi amablemente, gustounos moito a súa maneira de falar, de expresarse. Ao final da clase sacamos fotos para gardalas de recordo deste memorable dia. Asinounos os libros cunha dedicatoria, démoslle as grazas por vir ao noso instituto e facernos gozar con Dragal e coa súa conversación. 

 Gustaríanos que viñese outra vez a visitarnos cando poidamos ler o terceiro libro da triloxía que publicará proximamente.

Rebeca, Fernando, Sheila, Brais, Tomás, Paula, Iván.

Visita ao Castro de Vigo

Visita ao Castro de Vigo.

Alumnos/as de Cultura Clásica de 3º da ESO e de Latín de 4º A realizaron unha visita ao Castro de Vigo o venres 24 de febreiro. Estiveron acompañados pola profesora de grego do centro Susana Otero e polo profesor de latín Xosé Martínez. Durante practicamente unha hora e nunha visita guiada, achegáronse aos restos dunha pequena parte do oppidum de Vigo, un gran castro que ocuparía boa parte do monte sobre o que se asenta.

Ante as réplicas alí levantadas os alumnos/as puideron contemplar o verdadeiro significado das construcións orixinais: as tres edificacións reproducen un  momento inicial da ocupación romana. Toda a información arqueolóxica que se ofrece consitúe un valioso documento do pasado que debemos conservar e coñecer.

Visita ao CITEXVI (EFICIENTIC)

O ALUMNADO DO IES MARÍA SOLIÑO EN EFICIEN(TIC)

    O día 7 de febreiro, a maior parte do alumnado dos 1º e 2º cursos do Bacharelato de Ciencias desprazáronse ao CITEXVI ( Cidade Tecnolóxica de Vigo) para participar na actividade EFICIEN(TIC) organizada por Gradiant e Energylab co patrocinio da FECYT ( Fundación Española para a Ciencia e a Tecnoloxía), acompañados polos profesores Manuel Silva e Serafín Parcero.
    Os alumnos foron partícipes de varias e interesantes experiencias relacionadas coa eficiencia enerxética. Puideron comprobar como unha radio pode funcionar coa enerxía residual desprendida por unha pequena candea; fixeron funcionar un “escalectric” a base de pedalear nunhas bicicletas fixas, compararon o consumo e o rendemento de diversos tipos de lámparas ( incandescentes, fluorescentes, halóxenas, leds...), comprobaron, mediante unha cámara térmica a eficacia dos diversos tipos de illamento, recibiron  consellos para usar os seus teléfonos móbiles e ordenadores dunha forma eficiente e responsable co medio ambiente.   
    Tamén usaron un programa de recoñecemento facial e recibiron nocións de aproveitamento do hidróxeno como fonte de enerxía.

Distribuir contido