Este curso participamos de novo no programa "Iniciación segura á pegada dixital". Estivo dirixido a alumnado de 2º e 3º da ESO, que tomou conciencia da importancia de manter unha identidade dixital adecuada, pois todo o que facemos en internet deixa pegada e non está exento de riscos. 

No día de hoxe, o alumnado de 1º Bacharelato desfrutou dunha xornada de orientación e convivencia na localidade de Lalín.

Acompañados da súa titora e a orientadora do centro, asistiron á Primeira Feira de Orientación Universitaria e Formación Profesional organizada neste municipio.

Ademais, aproveitaron a visita á capital dezá para coñecer o museo Castro Deza, dedicado á divulgación da cultura castrexa, as lendas e a gastronomía; e tamén se achegaron ao Espazo Xove de Lalín (Casa da Xuventude), onde puideron desfrutar da exposición fotográfica "Ceos galegos" explicada da man do divulgador científico Dosi Veiga. 

Porque é importante non perder o norte cando navegamos na rede, rematamos o 2º trimestre participando no programa Navega con rumbo. 

O alumnado de 1º ESO e 1º FPB tivo a oportunidade de asistir á actividade, conducida por un enxeñeiro informático experto na materia, co que dialogaron de forma amena sobre internet e as oportunidades e perigos que pode levar asociados. 

Dende logo, serán moi útiles os seus consellos e ter presente sempre o decálogo do bo uso de internet para unha navegación segura!

Desta volta deixamos un resumo do traballo efectuado no 2º trimestre co alumnado de 3º ESO e FPB no marco do programa de educación afectivo-sexual "Quérote Máis". 

Tras rematar algunha tarefa pendente...adentrámonos na diversidade afectivo-sexual! Na presentación que se xunta no enlace, podedes consultar as obras que realizou o alumnado, a fin de promover o respecto cara as distintas identidades e orientacións sexuais. 

Pero non só iso...Tamén tivemos tempo para investigar sobre o amor romántico e detectar os mitos sobre o mesmo na música, literatura, publicidade...

Finalmente, abordamos a importancia da prevención. O alumnado descubríu a través de variadas metodoloxías e actividades os distintos métodos anticonceptivos e o seu papel na prevención de embarazos non desexados e ETS. Foron varias sesións interesantes nas que dialogamos sobre as preocupacións e dúbidas adolescentes, achegándonos tamén á regulación legal da IVE no noso país. 

Premendo nesta presentación podedes ver un resumo do traballado en imaxes. 

No segundo trimestre, continuamos a centrar esforzos na mellora da convivencia. Tras un traballo de reflexión sobre o clima de aula, dedicamos dúas sesións de titoría a falar sobre o acoso escolar co alumnado de 1º ESO, para concienciar sobre as súas implicacións e consecuencias. Para iso, servímonos da análise e comentario de casos reais como o caso Jokin Cebeiro e tamén o coñecido youtuber e instagrammer Miquel Montoro. 

Destacando sempre a importancia das persoas espectadoras na detención dos casos de acoso escolar, que a miúdo se producen lonxe da mirada adulta, aproveitamos as sesións para dar a coñecer o Punto Laranxa, tanto físico como virtual, como un recurso de denuncia anónimo ao abeiro do novo Protocolo para a prevención, detección e tratamento do acoso e ciberacoso escolar, que pretende romper co a lei do silencio.

Facémonos eco da publicación do Ministerio de Educación, que nestes días anuncia a convocatoria de becas para o próximo curso 2024-25, para continuación de estudos universitarios e non universitarios. 

Permanece atentx ao prazo de solicitude, do 19 de marzo ao 10 de maio, e consulta toda a información na ligazón correspondente: 

• Se o próximo curso vas estudar Bacharelato, Formación Profesional ou FP Básica, informáte aquí. 
• Se vas realizar estudos universitarios, esta é a túa ligazón de referencia.  

Os próximos días 21, 22, 25 e 26 de marzo podes coñecer máis de cerca a USC. 

Conéctate aos seus encontros virtuais e infórmate sobre os seus graos, programación cultural, residencias....e pregunta todas as dúbidas! 

Consulta máis información e horarios na ligazón aos encontros. 

Nunha semana tan significativa como esta, na que se celebra o Día Internacional da Muller, desenvolvemos no centro unha serie de actos e actividades conmemorativas.

Por cortesía do Concello de Vila de Cruces, empezamos a semana con unha mesa redonda baixo o título “Mulleres inspiradoras”. O concelleiro de igualdade deu apertura ao acto, do que puideron desfrutar o alumnado de 3º e 4º da ESO, coñecendo de primeira man a experiencia de catro mulleres traballadoras e pioneiras en moitos casos nos seus ámbitos laborais, mulleres loitadoras que tiveron que abrirse camiño facendo fronte a distintas adversidades, incluídas aquelas que tiveron que afrontar polo seu xénero. Así, compartiron con nós as súas experiencias a recoñecida artesá Elena, máis coñecida como a zoqueira de Merza; Mónica, licenciada en dereito e axente de emprego e desenvolvemento local do Concello; Rocío, empresaria hostaleira e Cinthia, emprendedora e luthier de clarinete.

Catro mulleres referentes que coa súa experiencia favorecen a inspiración nas alumnas e a visibilidade da muller en sectores masculinizados. A mesa estivo moderada por Fátima, tamén empresaria e emprendedora no sector dos recursos humanos.

Publicada a Resolución do 20 de febreiro de 2024, da Secretaría Xeral de Universidade e da Dirección Xeral de Ordenación e Innovación Educativa, pola que se ditan instrucións para a realización, dentro do curso 2023/24, da avaliación de bacharelato para o acceso á universidade (ABAU) para o curso 2024/25. Acceso á resolución nesta ligazón. 

Máis información sobre ABAU, preinscrición e matrícula na universidade aquí. 

Consulte aquí os prazos destacados a ter en conta no procedemento de admisión para o curso 2024/25: 

• Reserva de praza no centro de orixe: do 15 de xaneiro ao 5 de febreiro.
• Publicación da listaxe de alumnado con posto reservado: 22 de febreiro.
• Sorteo público da letra a efectos de desempate: última semana de febreiro
• Publicación de postos escolares vacantes: antes do 1 de marzo. 
• Presentación da solicitude de admisión (para alumnado que cambie de centro para cursar a mesma ensinanza ou para estudos superiores en centros non adscritos): do 1 ao 20 de marzo. 
• Presentación da documentación acreditativa dos criterios de baremo: 10 días hábiles contados a partir dos dous días seguintes ao remate do prazo para presentar as solicitudes de admisión.
• Publicación das listaxes provisionais de persoas admitidas e non admitidas: 25 de abril.  
• Reclamacións: prazo máximo de 5 días hábiles a partir do día seguinte á súa publicación).
• Publicación das listaxes definitivas de persoas admitidas e non admitidas: 15 de maio. 
• Formalización da matrícula en educación infantil e primaria: 20 a 30 xuño. 
• Formalización da matrícula en ESO e bacharelato: 23 de xuño a 7 de xullo

Normativa:

• Instrucións do proceso de admisión 2024/25 na web da Consellería de Educación. 
• Decreto 13/2022, do 3 de febreiro, polo que se regula a admisión de alumnado en centros docentes sostidos con fondos públicos que imparten ensinanza de 2º ciclo de Ed. Infantil, Ed. Primaria, ESO e BAC reguladas na LOE.
• Orde do 21 de outubro de 2022, pola que se desenvolve o decreto 13/2022.