Saltar navegación.
Inicio

Actividades

Feliz Día da Capacidade! Día das Persoas con Diversidade Funcional

Feliz Día da Capacidade

O 3 de decembro o IES Marco do Camballón conmemorou o Día das Persoas con Discapacidade con unha serie de xogos inclusivos nos que o alumnado e profesorado se puideron poñer na pel das persoas con diversidade funcional, comprobando os atrancos cos que se atopan a diario, así como as súas fortalezas, pois a pesar das limitacións propias e as sociais impostas son persoas capaces!

Por isto, no centro celebramos este día baixo o lema Feliz Día da Capacidade!

Camballón a un CLIC

No documento adxunto podedes consultar a proposta que fixo un grupo de alumnado. Trátase dunha modesta revista dixital que recolle os recordos dun curso singular que ben seguro recordaremos para sempre. Esperamos que vos guste!

Prevención e educación para a saúde

Ao longo do curso, e con especial intensidade nesta terceira avaliación, a docente do ciclo medio de APSD, Begoña Vázquez, realizou varias actividades relacionadas coa educación para a saúde no noso centro. 

Así, o alumnado de 1º de FPB tivo varias sesións nas que que recibiron información sobre educación afectivo-sexual e prevención de infeccións de transmisión sexual (ITS). Por outra banda, o alumnado de 3º e 4º da ESO recibiron información sobre a prevención do consumo de drogas e os trastornos da conduta alimentaria. 

Sen dúbida, foron unhas sesións moi proveitosas nas que se abordaron cuestións de primeira necesidade na etapa adolescente. 

Obradoiros sobre coidados posturais básicos

Ao longo dos meses de maio e xuño, o alumnado da ESO e FPB participou duns obradoiros sobre Coidados posturais básicos, da man de Sandra Pena, fisioterapeuta e docente do ciclo medio de TAPSD. 

Manter unha postura adecuada é fundamental para que o corpo estea correctamente aliñado e prever doenzas musculares, articulares e dos osos, ao tempo que mellora a respiración e diminúe a fatiga. Sen dúbida, a mellor recomendación para manter unha postura axeitada e evitar os problemas de espalda é realizar algún deporte. A natación, o crossfit ou o ioga son máis que recomendables pero...o importante é moverse!. Sandra ensinounos a forma correcta de facelo mediante unha serie de sinxelos exercicios cos que mellorar a postura e destensar os músculos, á vez que controlamos a respiración. O mellor de todo...que podemos levalos a cabo case en calquera momento e lugar!

Sen dúbida, foi unha gran oportunidade para coñecer aspectos básicos cos que mellorar a nosa calidade de vida, que ademais podemos transmitir aos nosos familiares e amizades. 

Ciberasesor@s

CiberasesoresO alumnado de 2º da ESO estivo a traballar nas titorías sobre os riscos no uso de internet e as redes sociais. Sen dúbida, as novas tecnoloxías están cheas de posibilidades, pero tamén levan consigo certos perigos que é importante coñecer para poder evitar. O noso alumnado, sabedor destas cuestións, elaborou unha serie de traballos para asesorar aos compañeiros/as de 6º de Primaria do centro da vila.

O traballo culminou o pasado  3 de xuño, xornada na que conectaron co alumnado de primaria a través de videoconferencia e asesoraron sobre o ciberbullying, sexting, grooming, stalking, pishing, ciberadicción e vamping. Dende logo, non son poucos os riscos!

Moi agradecidos/as ao Ceip Nosa Señora da Piedade, esperamos que a sesión poida ser presencial para vindeiras ocasións!

Voluntariado - A Miña Horta é a Túa

Hoxe recibimos a visita de Paula e Flavia, da Fundación Baiuca Verdescente, que conversaron co alumnado de 3º e 4º da ESO sobre voluntariado, espertando a conciencia sobre a importancia do mesmo como motor de cambio, desenvolvemento e mellora da comunidade e o entorno. 

Ademais de coñecer os distintos tipos de voluntariado, o alumnado puido achegarse aos diferentes proxectos que levan a cabo na fundación, destacando o próximo regreso do proxecto A Miña Horta é a Túa, iniciativa solidaria que levan a cabo de forma estacional e con gran valor para cubrir as necesidades máis básicas de familias en risco de exclusión social da contorna, dando saída ao excedente de produción que se xenera nas hortas.  

Sen dúbida, foron unhas sesións moi amenas nas que aprendemos que con moi pouco que aportemos cada un de nós pódese facer moito! 

Diversidade afectivo-sexual con Nós Mesmas

Ao longo desta semana contamos nas aulas coa intervención da Asociación Nós Mesmas, que nos visitaron dende Vigo para compartir con nós os seus coñecementos sobre diversidade afectivo-sexual, dando visibilidade á realidade LGTBIA e promovendo a aceptación e normalización da mesma en distintos cursos.

Falamos sobre identidade e orientación sexual, sexo biolóxico, xénero, estereotipos e expresión de xénero, analizando os distintos conceptos e dando conta dunha realidade diversa que vai máis aló do maioritario. Así, ademais da realidade heterosexual e cisexual, existen outras como a homosexual, transexual, bisexual, demisexual, pansexual, transxénero, terceiro xénero, xénero fluído....Tantas realidades como persoas!

Sen dúbida, foron unhas sesións moi enriquecedoras que esperamos deixen pegada, porque como dixeron nalgunha das aulas “Ser normal é ser como cada un é”.

Promovendo valores en igualdade

Na semana do 12 ao 16 de abril, tivemos a oportunidade de conectar por videoconferencia coas técnicas de igualdade de Fademur (Federación de Asociacións de Mulleres Rurais de Galicia), que están a desenvolver o programa "Promovendo valores en igualdade nas escolas rurais". No marco deste programa, levaron a cabo distintas sesións telemáticas co alumnado do ensino obrigatorio e Formación Profesional Básica, adecuando o contido das mesmas a cada curso e o seu nivel madurativo. Estas son as charlas nas que participou o noso alumnado: 

"Imaxes, influencers, pornografía e violencia de xénero": dirixida a alumnado de 3º e 4º ESO e 1º e 2º FPB, nestas sesións falouse sobre o poder das imaxes na lexitimización da violencia de xénero na actualidade. Que lugar ocupa a muller na imaxe ou de que maneira se expón a mesma? Xa a través da arte atopamos manifestacións da consideración que se tiña das mulleres no pasado, vestixios da desigualdade que aínda se mantén na actualidade en distintas formas. Así, as imaxes que recibimos a través das redes sociais e os medios de comunicación (publicidade, programas de televisión...), a pornograficación e cousificación da muller nos mesmos, contribúen a lexitimizar a desigualdade entre os xéneros, proporcinando unha visión irreal das relacións afectivas e sexuais, así como a idea da muller como sumisa e débil. Algo que sen dúbida nos debería facer reflexionar tendo en conta que a maior parte do que recordamos é aquelo que percibimos visualmente. 

"Os mitos do amor romántico e a violencia de xénero": dirixida a alumnado de 2º da ESO, abordou a importancia de desmitificar certos ideais románticos nas relacións afectivas. Non cabe dúbida, consideracións biolóxicas aparte, que somos produto do que nos ensinaron e transmitiron, pero tamén do que vemos e percibimos a cotío, moitas veces sen ser conscientes de que o que se nos está a transmitir non é verdade. Que se o amor todo o pode, que se precisamos unha media laranxa, que os polos opostos se atraen, que se os celos son sinal de amor....non son máis ca mitos que favorecen a violencia nas relacións. Por desgracia, estes mitos seguen a palparse na sociedade actual de distintas formas e son unha constante nos medios de comunicación, en programas e personaxes de referencia do alumnado adolescente, motivo polo que cómpre favorecer aos máis novos estratexias que lles axuden a detectar os mesmos e non caer na trampa.

"A violencia de xénero. Comprendendo, identificando e actuando": dirixida a alumnado de 1º da ESO, traballouse con estes rapaces/as sobre os estereotipos de xénero. Comprender o xénero como construcción social e as múltiples posibilidades que poden darse no mesmo, non atinxíndose exclusivamente a unha interpretación binaria (home-muller) foi o obxectivo da sesión. Que é ser un home ou ser unha muller é unha cuestión que responde a un proceso de socialización diferencial, no que somos educados/as en función do xénero que se nos atribúen, determinando como nos debemos comportar en función do xénero, cales deben ser os nosos gustos...Sen embargo, debemos ser conscientes de que incluso neste proceso de socialización/educación, xeramos en moitas ocasións distintos esterotipos ou prexuízos de xénero, que non fan máis que contribuír á desigualdade entre homes e mulleres, polo que debemos aprender a identificalos e respectar á persoa, os seus gustos, intereses, comportamentos...independentemente do seu xénero e/ou sexo. 

Aínda a pesar dalgúns problemas técnicos, foron sen dúbida unhas sesións moi interesantes!

Charlas sobre enfermidade mental

Ao longo do mes de marzo o alumnado de distintos cursos e etapas (3º ESO, 4º ESO, 1º e 2º de FP Básica e 2º CM de Atención a Persoas en Situación de Dependencia), tiveron a oportunidade de conversar coa psicóloga da Asociación de Familiares e Enfermos Mentais - MOREA, de Lalín. Foron unhas sesións moi amenas nas que se achegou ao alumnado información sobre a enfermidade mental e os factores de risco e de protección ante a mesma, coa finalidade de dar a coñecer unha realidade moi común pero que sen embargo está moi estigmatizada socialmente. Deste xeito, transmitiuselle ao alumnado unha información fiable e verídica, promovendo a normalización da enfermidade mental e a concienciación sobre a importancia do coñecemento, comprensión, respecto e inclusión das persoas con enfermidade mental nos distintos ámbitos da vida.  

A enfermidade mental pode, en definitiva, afectar a calquera ao longo da súa vida, en distintos graos e intensidades. É unha realidade que afecta á persoa que a padece pero tamén ao seu entorno, especialmente ao máis próximo (familia, amizades...), sendo fundamental saber identificala e aceptala, para poder atallala.

A ponte entre o ensino medio e a USC

Na semana pasada o alumnado de 2º de Bacharelato participou dunha charla no marco do programa "A ponte entre o ensino medio e a USC", na que recibiron información sobre os estudos da USC, admisión na universidade, programas de mobilidade, residencias e vida no campus...

Asemade, o alumnado tamén recibíu información sobre a organización e estrutura das probas da ABAU, que se celebrarán no próximo mes de xuño.  

 

Distribuir contido