| IES A SANGRIÑA

MEGABAU 2024: Estudantes da Sangriña entre os mellores de Galicia

Xov, 27/06/2024 - 20:06 — IES A Sangriña

a sangriña megabau

O pasado venres 21 de xuño celebrouse no Coliseum de A Coruña o acto de recoñecemento académico MEGABAU 2024. O acto estivo presidido polo conselleiro de Educación, Ciencia, Universidades e Formación Profesional da Xunta de Galicia e os reitores das tres universidades.

Fíxose entrega dun diploma de recoñecemento e duns agasallos das tres universidades. O Centro IES A Sangriña tamén recibiu unha distinción pola excelencia acadada por tres alumnos/as do centro que obtiveron unha nota superior a 9.00 na fase xeral das ABAU 2024, á que se lle sumará a nota da parte voluntaria. Así, Manuel Moreira Rodríguez cun 9,518, Irene Vicente Cividanes con 9,278 e María Lima González cun 9,004 recibiron este recoñecemento tan merecido tras un ano de esforzo e dedicación.

Moitísimos parabéns, rapaces!

Sodes un orgullo para o IES A Sangriña!

Acabamos o curso e o Proxecto Simula!

Lun, 24/06/2024 - 20:18 — IES A Sangriña

Desde o pasado mes de abril, o alumnado da familia de Administración participou no programa SIMULA da Xunta de Galicia.

Durante este período, a través dá plataforma de simulación SEFED, os alumnos de ciclo medio e ciclo superior, interactuaron con outras empresas simuladas realizando todo tipo de operacións empresariais. Estes alumnos e alumnas de ciclo, comezaron coa constitución dun negocio virtual, As Aceñas, SLS e despois xestionaron todas as áreas da empresa, reproducindo na aula desde a dirección ata o resto de situacións reais do ámbito financeiro, administrativo, laboral, comercial, fiscal ... da empresa. Esta actividade encadrada dentro do Plan EduEmprende da Xunta de Galicia, permitiu aos alumnos coñecer un pouco máis, e desde dentro, a realidade administrativa e comercial da empresa.

Foi unha actividade moi enriquecedora, polo que no próximo curso contamos con traballar no proxecto desde o mes de setembro, de modo que podamos ampliar o número de participantes e a posta en práctica de maiores contidos.

Mil grazas aos participantes (alumnos e profesores) e en especial aos profes Pilar e Javi pola súa total implicación no proxecto.

Matrícula ESO e Bacharelato 2024 - 2025

Lun, 24/06/2024 - 19:54 — IES A Sangriña

web matrícula sangriña

Xa está dispoñíbel o formulario de matrícula online. Desde hoxe, e independentemente do calendario estipulado para a entrega dos documentos no centro, xa poden cubrir os datos en liña en envialos a través do seguinte link:

https://www.edu.xunta.gal/centros/iesasangrina/matricula2025

Alén da modalidade online, este ano a matrícula inclúe unha serie de novidades:

- Non será necesario seleccionar as materias. Entregaráselles no centro o formulario en papel xa cuberto, de acordo coa escolla feita na prematrícula.

- Xa se inclúen algunhas das autorizacións que, en anos anteriores, era necesario ir entregando ao longo do curso.

- A foto do/a estudante, en vez de entregarse fisicamente, cargarase a través do seguinte formulario:

https://www.edu.xunta.gal/centros/iesasangrina/fotosangrinha

- Non será necesario achegar de novo documentación que xa se entregase no ano anterior e que non sufrise alteracións. Basta con indicar no formulario que desexa reutilizala e asegurarse de que non caducase ou cambiase algún dato.

As persoas que non dispoñan de acceso á Internet, que non teñan onde imprimir ou que non posúan dispositivos electrónicos adecuados contarán a partir de mañá con dous computadores no vestíbulo da escola dedicados exclusivamente ás matrículas.

Finalmente, publicaremos tamén ao longo do día de maña un breve videotutorial para seguir o proceso paso a paso.

Calendario de matrícula 2024 - ESO e Bacharelato

Ven, 21/06/2024 - 13:22 — IES A Sangriña

Candario matrícula 2024 A Sangriña

A continuación, publicamos as datas de matrícula asignadas para cada un dos cursos de ESO e Bacharelato no noso centro. As matrículas realizaranse gradualmente en función das avaliacións que se vaian realizando durante a próxima semana e para que os trámites poidan facerse dunha maneira máis cómoda na secretaría do IES A Sangriña.

Igual que xa aconteceu coa prematrícula, a realización da matrícula responderá a unha modalidade mixta. A documentación cubrirase online a través dun formulario que posteriormentese entregará asinado no centro. Por se algunha familia non dispuxese do equipamento necesario para realizar a matrícula online, ou de conexión a Internet, haberá dous equipos informáticos ao seu dispor no hall do instituto.

O enlace para acceder aos formularios de matrícula dos diferentes cursos e etapas educativas estará dispoñíbel nesta mesma web a partir do luns día 24 de xuño ás 14:30.

O calendario para a entrega do formulario de matrícula no centro será o seguinte:

Días 25 e 26 de xuño: 2º de Bacharelato.

Días 27 e 28 de xuño: 1º e 2º de ESO.

Días 1 e 2 de xullo: 3º e 4º de ESO.

Días 3 e 4 de xullo: 1º de Bacharelato.

Horario de xuño: de 9:00 a 14:00 e de 17:00 a 19:00.

Horario de xullo: de 9:00 a 14:00.