Skip to Content

Cité de l´Espace e Aeroscopia

No pasado mes de marzo, 40 alumnas e alumnos de 2º de ESO viaxaron ata Toulouse para visitar a Cidade do Espacio e AEROSCOPIA. Trátase dunha viaxe organizada polo Departamento de Tecnoloxía.

Parabéns ás nosas deportistas

A semana pasada tivo lugar “Vigo Porté 2019”, un evento internacional de disciplinas de baile, no que participaron varias alumnas do noso centro na categoría júnior. Por cursos, son as seguintes rapazas: 1° A: Sara Castelo, Paula Conde e Ánxela Vasconcellos. 2° A: Fátima Castro. 4° A: Noela Álvarez e Andrea Verd. 4° C: Ángela Castro. De ciclos medios, Jeni Barbosa. Todas elas bailan coa academia Marcando Pasos, agás Andrea Verd, que o fai con Galicia en Danza.

Queremos felicitar a todas pola súa participación, e especialmente a Andrea Verd, xa que co resto das suas compañeiras de Galicia en Danza, ganaron en varias categorías.

 

Amigos de Pi

Recentemente, o Departamento de Matemáticas celebrou un concurso co gallo do Día de Pi, que consistía en realizar unha fotografía cun motivo matemático.

Concursaban en dúas categorías. Na primeira, para 1º, 2º e 3º de ESO, resultaron ganadoras as fotos "A chuvia do mundo xeométrico", de África Vicente Baz, de 1º C, e "Cubos", de Álex Álvarez Lomba, de 2º C. Na segunda categoría, 4º de ESO, Bacharelato, ciclos e persoas adultas, "Sumando buen tiempo" de Carlos González, de 4º A, e "Triángulos colgantes" de Nerea Álvarez, tamén de 4º A, foron as obras premiadas.

As persoas premiadas recibiron cadansúa calculadora científica. As fotografías do certame están expostas no vestíbulo do instituto.

Parabéns a todas e todos e grazas pola vosa participación!

"A chuvia do mundo xeométrico"

"Cubos"

"Sumando buen tiempo"

Probas libres para a obtención de títulos de ciclos formativos de FP

Achegamos a información referente ás probas libres para a obtención de títulos de ciclos formativos de FP: calendario, trámite, requisitos, oferta de prazas. Consultade os documentos adxuntos.

Composición da comisión do Consello Escolar para as NOF

Segundo encontro do proxecto europeo OpenStreetMap

Durante os días 25-29 de marzo tivo lugar o segundo encontro do Proxecto Europeo OpenStreetMap, sobre a catrografía libre na súa liña humanitaria, desta volta en Irlanda. O noso socio, Portmarnock school, foi o organizador.

A tarefa que desenvolveu o noso alumnado participante foi o traballo con aplicacións de cartografía libre tales como Mapillary, Maps.me, OSMcam e mais o editor cartográfico de libre configuración JOSM co fin de realizar tarefas de mapeo solidario en zonas de Lesoto. O noso socio irlandés, Portmarnock community school, está involucrado nunha ONG dublinesa que traballa na axuda á poboación lesotense. O mapeo en zonas de Lesoto utilizando as devanditas aplicacións é só unha pequena contribución respecto ao total da axuda humanitaria articulada pola dita ONG. Os nosos alumnos e alumnas axudaron a mellorar a cartografía da zona para así facilitar o traballo humanitario no terreo.

A este meeting de Dublin acudiron, como non pode ser doutro xeito, o resto dos países e escolas participantes neste proxecto.

Estudantes e profesorado do IES A Sangriña xunto a persoal investigador da Universidade de Vigo avaliarán o estado ambiental da zona costeira da Guarda

O mércores 3 de abril o alumnado que forma parte do grupo de bacharelato de excelencia científico-tecnolóxico (STEMBach) do noso centro desprazouse ata o Campus da Universidade de Vigo para visitar o Centro de Apoio Científico e Tecnolóxico para a Investigación (CACTI) e realizar a primeira sesión de traballo cos seus titores universitarios.

O programa STEMBach coordinado e dirixido por Juan Hermida (Profesor de Bioloxía), Edita López (Profesora de Física e Química) e Emilio Fernández (Catedrático de Ecoloxía da Universidade de Vigo) ten por obxectivo avaliar a calidade ambiental da costa da Guarda para o que se levarán a cabo diversos proxectos de investigación en diferentes campos. Un total de 11 profesores, profesoras, investigadores postdoctorais e doctorandas da Universidade pertencentes ás Facultades de Ciencias do Mar e Bioloxía e á Escola de Inxenería de Minas e Enerxía, realizarán os labores de titorización dos 10 proxectos de investigación que se están a levar a cabo no IES A Sangriña.

15 de marzo, estudantado polo clima

O cambio climático é unha realidade con efectos globais e locais amplamente demostrados pola comunidade científica. Trátase dun fenómeno de modificación ou alteración das condicións atmosféricas da Terra producido por un incremento da temperatura do planeta de maneira sostida nas últimas décadas. Este quecemento global está producido pola emisión de gases que reteñen a enerxía procedente da radiación solar, o que se deu en chamar o efecto invernadoiro. As actividades humanas son a causa do cambio climático, polo que somos tamén nós mesmos os que, cun pouco de axuda, podemos poñerlle fin a esta barbarie.

As prediccións para o ano 2050 indican que choverá en Galicia a metade do que chove actualmente, a temperatura media incrementará 3,1 0C, o nivel do mar poderá incrementarse ata 25 cm o que supón a desparición dos primeiros 25 m da liña de costa. A costa cambiará tal e como a coñecemos, desparecerán as nosas praias, aumentarán os riscos de inundación, os efectos das mareas serán maiores. Os mares e océanos diminuirán a súa produtividade a causa do aumento da temperatura e acidificación da auga. As paisaxes típicamente galegas cambiarán para sempre, desaparecerán moitas das nosas especies e aparecerán outras novas.

A Terra é o lugar onde todos nós residimos, e a biosfera está sufrindo danos que dentro de moi pouco tempo van ser irreversibles. Que fan as nosas autoridades para resolver este problema que xa nos está a afectar? Que facemos nós? Que fas ti?

Saída a Ourense

O pasado 21 de febreiro houbo unha viaxe conxunta a Ourense dos ciclos de Administrativo e de Tecnoloxía de 1º de Bacharelato.

O alumnado de administrativo visitaron a STL (Sociedad Textil Lonia), empresa téxtil líder en España en confección de gama alta que produce, distriúe e comercializa as marcas Carolina Herrera e Purificación García. Viron as fábricas e o almacén, coñeceron a empresa en xeral e, de preto, as fases de confección, almacenamento e distribución. A continuación, achegáronse ata Aceites Abril, o maior produtor de aceite de Galicia que comercializa as súas propias marcas e as marcas brancas de moitos supermercados (Froiz, Gadis e Dia entre outras). Coñeceuse a historia da empresa, o ciclo de produción do aceite, asistiuse a cadea de envasado e visitáronse os almacéns.

Por outra banda, o alumnado de Tecnoloxía visitou a escola de Enxeñaría Aeronáutica da Universidade de Vigo, os seus laboratorios, as máquinas de mecanizado e mesmo un túnel de vento experimental. Por último, o Centro Tecnolóxico La Molinera, un referente en Ourense, no que viron impresoras 3D que poden imprimir ata 1 metro cúbico, unha máquina de corte por láser e lentes de realidade virtual que todos puideron probar.

STLonia.

Aceites Abril.

Viaxe a Almagro 2019

En Almagro está o único curral de comedias conservado intacto, tal cal eran os teatros destas características no século XVII español. Os currais eran patios de casas que na época foron habilitados como teatros, e nos que representaban comedias, traxedias, entremeses... obras moi do gusto da xente, de autores como Lope de Vega, Tirso de Molina, Quiñones de Benavente...

Visitar este curral e asistir a unha representación de teatro clásico neste espazo é o obxectivo e a esencia da viaxe literaria e cultural que todos os anos realiza o alumnado de 1º de bacharelato. Desta volta, asistiron tamén en Madrid a unha obra de teatro contemporáneo, Corta el cable rojo, no Teatro Gran Vía, visitaron o barrio das letras, coñeceron Toledo, o P. N. das Tablas de Daimiel e viaxaron ata Córdoba. 

Teatro en Madrid.

Casa de Lope de Vega, Barrio das letras, Madrid.

Curral de comedias, Almagro.

P. N. Táboas de Daimiel.

Mesquita de Córdoba.

Distribuir contido


by Dr. Radut