Escola de Pazo

O PRIMEIRO TRIMESTRE NA AULA DE PAZO INFANTIL CURSO 2020-2021

 

Estimadas familias,

O primeiro trimestre chegou ao seu fin. Que rápido pasou!! Tiñamos moitas ganas de volvernos reencontrar despois de tantos meses nas casas. E aínda que dende comezos de setembro sabiamos que ía ser un curso un tanto diferente debido á nova realidade que nos está tocando vivir, as nosas ilusións e ganas de volver a compartir momentos xuntos/as eran se cabe máis grandes que ningunha outra vez.

Volver á escola supuxo para todos/as en parte volver un pouco á “normalidade” que tanto botabamos de menos, e aínda que houbo moitos cambios en comparación ao curso pasado, de novo, quedou demostrado, que somos uns auténticos/as campións e campioas pois superamos con creces os novos retos que nos tocou afrontar e fomos capaces de adaptarnos a eles sen case ningún tipo de dificultade!

Foron uns meses moi intensos repletos de moitas anécdotas, experiencias, aprendizaxes, e sobre todos moitas risas, e bos momentos.

Unha vez máis, para facervos partícipes do que vivimos, gustaríanos compartir convosco algúns deses momentos, e así achegarvos, un pouquiño máis, ao día a día da nosa aula.

 

Aínda que a día de hoxe xa nos coñecemos todos e todas, imos aproveitar para presentarnos e darvos a benvida, unha vez máis, á nosa aula, da que tamén formades parte indispensable.

 

                              

 

No mes de setembro tivo lugar o reencontro que tantos meses levabamos esperando. Foron uns días cheos de cambios para todos/as, e de primeiras veces para outros/as. A maior parte de nós xa nos coñecíamos, e démoslle a benvida aos nenos/as de 3 anos, intentando dende o primeiro día que se sentisen moi a gusto no cole.

Un dos cambios máis significativos co que nos atopamos na aula, en comparación ao ano pasado, foi que dende o primeiro día a distribución da mesma estaba organizada en 4 equipos diferentes. E cada equipo estaba conformado por un número determinado de nenos/as. Do mesmo xeito, a distribución dos materiais tamén estaba cambiada, e cada equipo tiña asignado na aula un espazo determinado para os seus materiais. Ante estes novos cambios, para facilitar a organización do día a día, decatámonos de que cada equipo precisaba ter un nome e unha imaxe asignada, e esa foi unha das nosas primeiras tarefas: os membros de cada equipo pensaron e dialogaron acerca de posibles nomes que lles gustaban e seguidamente escolleron unha foto para asignarlle ao seu equipo.

 

O resultado foi o seguinte: 

                                                                                   

 

 Ao longo das primeiras xornadas levamos a cabo diferentes xogos e dinámicas de presentación, para que os nenos/as de 3 anos nos fosen coñecendo, e empezamos a interiorizar as diversas rutinas establecidas durante a xornada, e as novas formas de organizarnos (espazos establecidos para cada equipo: zonas de traballo, perchas, zonas na asemblea...).

Como podedes ver, tanto na aula coma no patio, non non quedou ningún recuncho por descubrir.

 

             

 

                                                                     

 

 Unha vez superado o mes de setembro, e con el o período de adaptación que supuxo para todos/as debido aos cambios establecidos, seguimos avanzando no trimestre, e adquirindo pouco a pouco novos logros e obxectivos.

Así pois os nenos/as de 3 anos, coa axuda dos compañeiros/as de 4 e de 5 anos iniciámonos pouco a pouco no coñecemento das  LETRAS, as cales se foron presentando non só pola súa grafía, senón tamén polo seu son. Partindo pois, de palabras significativas para todos/as nós como son por exemplo o noso propio nome,  e os nomes dos nosos/as compañeiros/as da escola, así como tamén os dos nosos familiares e amigos/as máis próximos; os días da semana; os carteis da aula; ou os títulos dos contos...; levamos a cabo numerosas actividades: contar o número de letras, ver cal é a letra do inicio e a do final, recoñecer as letras iguais, representar a súa grafía, identificar as letras polo seu son...

De igual xeito, os nenos/as de 4 e 5 anos seguimos avanzando no proceso da LECTOESCRITURA, a través tamén de diferentes actividades lúdicas e significativas como por exemplo: os bingos de letras; discriminación auditiva clasificando pictogramas ou imaxes en función da letra correspondente pola que comece cada palabra; composición de palabras; conteo das sílabas que conforman unha determinada palabra; conteo de vogais e consoantes diferenciando cales son unhas e outras...

 Nas seguintes fotos podedes ver algunha desas actividades.

 

                      

 

                     

 

                       

 

                     

 

                     

 

                      

 

                        

 

                       

 

                        

 

O PRIMEIRO TRIMESTRE NA AULA DE PAZO INFANTIL CURSO 2020-2021

 

A través do método ABN (Método Aberto Baseado en Números), os nenos/as de 3 comezamos a introducirnos nos CONCEPTOS LÓXICO-MATEMÁTICOS, e os nenos/as de 4 e 5 anos seguimos avanzando e experimentando, a través de actividades manipulativas, coa serie numérica, o conteo, a correspondencia, a asociación entre grafía e cantidade, as unidades e decenas,  o tableiro do 100, os amigos do 10 etc. Outras actividades significativas levadas a cabo foron as de pesarnos, medirnos e mirar o nº do noso calzado. 

 

                   

 

                   

 

                    

 

                    

 

                    

 

                 

 

 

                             

 

                                

 

                                 

 

                                  

 

                                                                                  

 

                                  

 

                                 

 

                                

 

                                

 

                                                                              

 

Ao par de todo isto, tamén lle dedicamos tempo ao noso ESQUEMA CORPORAL, o cal imos tendo cada vez máis interiorizado, tal e como se reflicte nas nosas representacións. 

 

                                                                

 

                                                                

 

O presente curso tamén lle demos continuidade ao TALLER DE GRAFOMOTRICIDADE CREATIVA que iniciamos o ano pasado. Os nenos/as de 3 anos iniciáronse nos trazos, concretamente os verticais e horizontais, dado que son os trazos que están presentes en case todas as letras que escribimos (maiúsculas). Con eles levamos a cabo diversas actividades: construílos sobre superficies amplas con obxectos e materiais da aula, trazalos na lousa con rotulador, representalos sobre papel con diferentes elementos... Pola súa parte os nenos/as de 4 e de 5 comezaron a representar algunhas formas xeométricas, en concreto o cadrado. Tamén realizamos algunha que outra creación aproveitando elementos naturais propios do outono como por exemplo as follas das árbores.

 

 

                      

 

              

 

                                                               

 

                                         

                                               

 

                                                                           

 

                       

 

                     

 

 Cantas cousas!

Como xa sabedes, este ano o noso PROXECTO DOCUMENTAL INTEGRADO (PDI) xira en torno aos contos e leva como título “Fíos de palabras (contos impresos e de tradición oral)”. Así pois, partindo desta temática comezamos a analizar máis detidamente os contos que temos na aula cada vez que lemos algún, parándonos a mirar e observar cales son as súas partes: portada, contraportada, follas...; onde está o título; quen é o autor/a do conto; personaxes...

Aproveitando isto levamos a cabo unha actividade que o ano pasado xa nos gustara moito, e que quixemos repetir pero este ano modificando en parte o contido da mesma. Dita actividade é a dinámica da “Maleta”. Cada un de nós levou dita maleta á súa casa e despois de ler as instrucións que ían dentro coa familia, ao día seguinte levámola á aula con 3 cousas nosas que nos gustaban ou nos identificaban (por exemplo unha foto da nosa familia, o noso xoguete favorito, algún obxecto de cando eramos bebés...).

Este ano tratamos de relacionar dita dinámica co PDI, de tal xeito que unha das 3 cousas que tiñan que ir na “maleta” era o noso conto favorito para lerllo aos nosos compañeiros/as. Con dita actividade descubrimos moitas cousas acerca dos gustos e intereses de cada un/a, así como experiencias persoais e recordos, o que permitiu que nos coñezamos máis e que crearamos un maior vínculo de amizade.

 

             

O PRIMEIRO TRIMESTRE NA AULA DE PAZO INFANTIL CURSO 2020-2021

Ao longo do trimestre tampouco nos esquecemos de festexar os ANIVERSARIOS dos nenos/as que cumpriron un ano máis. E para iso, continuamos levando a cabo o ritual da “celebración da vida”, ao estilo Montessori. Para dito ritual colocamos o noso tapete no chan no cal aparece representado o sol, e os nomes dos 12 meses do ano (de diferentes cores, dependendo da estación á que pertenzan). O neno ou nena que está de aniversario colle na man o globo terráqueo, e colócase ao lado do mes no que naceu. Entón comezamos a explicar que naceu “x” día nese mes, e poñemos a primeira foto de bebé ao lado do nome do mes e o neno/a comeza a camiñar ao redor do tapete a medida que explicamos que mentres que van pasando os meses ese bebé vai medrando ata cumprir un ano (momento no que volve estar ao lado do mes no que naceu), e nese momento colocaríamos a foto de cando cumpriu o 1º ano de vida, e así sucesivamente ata chegar ao nº de anos que cumpre na actualidade. Durante ese proceso tamén explicamos que un ano, é o tempo que tarda a terra en dar a volta ao sol, e que durante ese tempo se van sucedendo as 4 estacións.

Esta celebración gústanos moito, pois fai que nos sintamos protagonistas no noso día e que poidamos compartir cos nosos/as compañeiros/as momentos moi significativos da nosa vida, sendo conscientes ademais de todos os cambios que se produciron dende o momento do noso nacemento ata o día de hoxe.  

E posto que este ano tivemos que suprimir da celebración o ritual de soprar as velas, algo que sempre nos gustaba moito, introducimos un pequeno cambio: o neno/a que está de aniversario recibe unha pequeniña sorpresa que ten que coller na “nosa caixa misteriosa”. É un momento que nos intriga moito e ao mesmo tempo nos fai moita ilusión!

                              

 

                                

 

Este curso máis que nunca incidimos tamén na importancia de alimentarnos dunha forma saudable para contribuír desta forma ao benestar da nosa saúde, e para manter ao mesmo tempo as nosas defensas moi altas. Así pois, tratamos de concienciarnos da importancia que ten o consumo de froita no noso día a día, e aínda que non a todos/as nos gustan da mesma forma, todos/as estamos intentando acompañar as nosas merendas diarias cunha peza de froita. En relación a isto, colocamos na aula un panel, o panel do “Club da froita” no que levamos a cabo un rexistro diario, sempre e cando comemos a peza de froita que traemos. Cada día estamos máis motivados/as, e xa houbo varios compañeiros/as que conseguiron completalo!! E como recompensa a dito logro recibimos unhas medallas moi particulares!

                                                                              

 

Este ano sen dúbida unha das cousas que máis botamos de menos foron as xuntanzas e as xornadas en conxunto co resto de escolas do CRA, así como tamén as saídas e excursións que tanto nos gustaban.

Para compensalo, a nivel de escola un día fixemos unha saída aos arredores da Praia da Torre. Alí puidemos recoller follas e facer algún que outro xogo.

                                                                             

 

                                 

 

Pero a pesares disto, tivemos a gran sorte de poder participar no “PROXECTO COIDARMOS” levado a cabo pola asociación AVOAR. Así pois dende o mes de outubro, cada dúas semanas, tiñamos unha cita con eles/as na escola para levar a cabo diversas actividades nas que traballamos diversos contidos en relación aos roles de xénero, ás emocións, igualdade de xénero, formas de discriminación e de violencia...

 Durante a primeira sesión, coñecémonos a través duns xogos de presentación e logo levamos a cabo unha creación artística completando unhas siluetas humanas con diferentes elementos, dando renda solta aos nosos gustos. Como remate da sesión fixemos unha valoración da mesma.

                              

 

                               

 

Durante a segunda sesión, abordamos as diferentes emocións a partires do conto “Bágoas debaixo da cama”. Falamos de como se sentía o protagonista do conto, e tamén analizamos diversas situacións da nosa vida mesma, e as emocións que nos xeran. Por último, fixemos valoración da sesión.

                                                                          

 

Durante a terceira sesión, os mozos/as da asociación AVOAR contáronnos o conto de “Artur e Clementina”, e a partires del analizamos e reflexionamos como se sentía a protagonista, ante o maltrato e a violencia de xénero “silenciosa” recibida por parte de Artur. Así mesmo, tamén falamos da importancia de expresar aos demais en todo momento aquilo que non nos gusta, ou que non nos fai sentir ben. Despois da lectura do conto, creamos as nosas propias Clementinas con diversos materiais, as cales nos quedaron chulísimas! Posteriormente valoramos a sesión. Por outra parte, en relación a esta sesión, pasados uns días recibimos unhas postais de Clementina nas que nos agradecía o bo trato que tivemos cara a ela, e o contenta que estaba polas cousas bonitas que lle dixemos. Fíxonos moita ilusión lelas!

 

             

 

                                         

 

 

Durante a cuarta e última sesión falamos dos coidados e da violencia, tratando de diferenciar diversas situacións que nos presentaban en función de se eran coidados ou violencia. Logo a cada equipo repartíuselle unha determinada emoción, e cada un/unha de nós pintou un debuxo no que aparecía reflectida dita emoción. Para rematar valoramos a sesión e démoslle as gracias a asociación por todas as cousas que nos ensinaron e que aprendemos durante todas as sesións con eles/as. Pasámolo moi ben!!

 

            

 

                                          

 

 

Durante este primeiro trimestre tamén levamos a cabo algunha que outra CELEBRACIÓN E CONMEMORACIÓN.

Así pois a primeira delas, foi a celebración do MAGOSTO, na que pasamos unha xornada moi animada levando a cabo diversos xogos en común como por exemplo: xogos de destrezas e habilidades, os zancos, relevos con culleres... Tamén gozamos dunha merendola a cargo de doces caseiros, etc. proporcionados polas familias, así como tamén das ricas castañas asadas.

                  

 

                   

 

Outra celebración que tamén nos gustou moito, foi a do SAMAÍN. Durante esa semana levamos a cabo un taller de decorado de cabazas, e tamén nos disfrazamos de cousas terroríficas!

 

              

 

                

 

 

                   

 

                  

 

O 25 de novembro conmemoramos o Día internacional contra a violencia de xénero, e para iso fixemos unhas tarxetiñas, nas que a través de debuxos representamos aquelas cousas que podemos facer tanto homes como mulleres, nenos coma nenas, avós como avoas, etc. de forma que todos/as independentemente do xénero ao que pertenzamos nos poidamos sentir ben e felices.

 

                                  

 

 

                  

 

                  

 

 

E xa para cerrar o trimestre, durante as últimas semanas de cole, estivemos facendo algunha que outra manualidade de NADAL para decorar un pouco a escola.

 

Tamén elaboramos unha carta (postal) para os nenos/as doutra escola do CRA, pois xa que este ano non tivemos a oportunidade de poder vernos durante o trimestre, todo o CRA levamos a cabo unha actividade de correspondencia entre as diversas escolas. Así pois, a escola á que nos lle tivemos que escribir foi á de Rañó. O carteiro veu a recollernos a carta, e de alí a uns días recibimos unhas fotos nas que a puidemos ver xa en mans dos nenos/as de Rañó. Días despois o carteiro volveunos sorprender facéndonos chegar a carta (postal) que os nenos/as de Rañó escribiran para a nosa escola. Gustounos moito!!

 

              

 

 

                                                                       

 

            

 

              

 

                                             

 

 

Por outra parte tamén recibimos unha visita moi especial, pois ata a escola desprazáronse de novo os mozos/as da asociación AVOAR, pois recibiran unha carta da “Asociación de Criaturas Máxicas” na que lles encomendaban a tarefa de percorrer as escolas do CRA cun “carro máxico dos desexos” no que tiñamos que depositar as nosas cartas, nas que previamente escribiramos os nosos desexos de cara ao ano 2021.

 

                     

 

                    

 

                                                                       

 

Vémonos á volta das vacacións, pois aínda nos quedan moitas aventuras e bos momentos que compartir. Sen dúbida, xuntos é moito mellor!

 

 

                                                                            

POESÍA DO CORONAVIRUS

BRUNO ,QUE LEVA CAMIÑO DE SER ESCRITOR,

QUIXO DESPEDIR ESTE CURSO TAN ATÍPICO

CUNHAS RECOMENDACIÓNS PARA ESTE PERÍODO

QUE ESTAMOS A VIVIR.

 

 

(Transcripción)

GALEGOS E GALEGAS 

GALEGOS E GALEGAS COIDADO CON ESTE VIRUS

PORQUÉ O CORONAVIRUS PODE CONTAXIAR.

PERO NA CASA HAI QUE ESTAR PARA GAÑAR A ESTE VIRUS

E AS FASES QUE  HAI QUE CUMPLIR:

FASE 1, FASE 2, FASE 3, FASE 4 E FASE 5

                                       Bruno Barreiro

 

RECREANDO OBRAS DE ARTE

    

 

DIA DO LIBRO

 

FESTEXAMOS O DÍA DO LIBRO NA CASA, CUNHA  PRECIOSA HISTORIA

DUN CONTO TITULADO "EL ÁRBOL DE LOS RECUERDOS",

QUE NOS CONTOU A PROFE MARÍA (XA XUBILADA)

E MONTOU A PROFE SOL, DE CRUCEIRO.

TAMÉN VIMOS UN VIDEO DE SAN JORGE E O DRAGÓN 

E ESCOTAMOS OUTROS  POEMIÑAS 

DE AUTORES COMO MANUEL MARÍA....

   

   

   

EU QUEDO NA CASA

COMO A MAIORÍA DOS NENOS E NENAS

ESTAMOS A FACER ACTIVIDADES NA CASA,

AS VECES SOLOS,

E OUTRAS, ACOMPAÑADOS DE PAPÁ OU MAMÁ

             

              

TAMÉN FACEMOS DEBUXOS 

 

     

  

   

 

RECICLAMOS E CREAMOS,

  

  

 FACEMOS DEBERES,

 

 

  

E SEGUIMOS MEDRANDO!!!!!

RESUMO DO SEGUNDO TRIMESTRE NA AULA DE INFANTIL DE PAZO

Estimadas familias, ­

Neste mes de abril, o segundo trimestre chegou ao seu fin. Foi un final un tanto estraño debido ás circunstancias que nos está tocando vivir, e o que sen dúbida máis botamos de menos foi non poder despedirnos en persoa uns/unhas dos/as outros/as.

Sabemos que esta situación se está facendo algo longa e pesada, sen embargo cada día que pasa é un día menos para recuperar a normalidade, e a recompensa sen dúbida merecerá a pena, pois cando nos volvamos a reencontrar farémolo con máis ganas, con máis ilusión e con máis bicos e abrazos para dar.

Mentres tanto, gustaríanos compartir convosco algúns deses momentos vividos na aula ao longo do segundo trimestre, e así poder facervos partícipes deles.

Unha vez finalizadas as vacacións de nadal tocou volver á rutina diaria.

 

Así pois durante estes meses seguimos avanzando no proceso da LECTOESCRITURA e no coñecemento das LETRAS e os seus sons, sempre a partir de palabras significativas para nós. Tendo en conta esta premisa levamos a cabo actividades e xogos que nos axudan a interiorizar aspectos como a súa representación gráfica, o seu son, a lonxitude das diferentes palabras, a identificación de letras, compoñer outras palabras partindo das letras iniciais... 

 

               

 

              

 

De igual xeito, tamén continuamos progresando nos conceptos LÓXICO-MATEMÁTICOS, experimentando a través de actividades manipulativas e traballando diariamente a serie numérica, o conteo, a correspondencia entre grafía e cantidade, as equivalencias, a suma... 

 

              

 

 

               

 

             

 

Continuamos tamén co nosos taller de grafomotricidade creativa recordando os TRAZOS horizontais e verticais que xa coñecemos durante o 1º trimestre, e descubrindo outros novos: os circulares. A partir da súa representación decatámonos tamén, que ao igual que os primeiros, son trazos que tamén están presentes en algunhas das letras que coñecemos por exemplo a O, ou nos números por exemplo o 0. Á hora de representalos empregamos diferentes soportes (lousa, papel...), e tamén diferentes materiais (pinceis, témperas, os dedos, rotuladores...).

 

         

 

         

 

        

 

        

 

 Ao par de todo isto, tamén lle dedicamos tempo ao noso ESQUEMA CORPORAL, o cal imos tendo cada vez máis interiorizado, tal e como se reflicte nas nosas representacións. 

 

 

                                                                       

 

 

Durante o segundo trimestre tamén seguimos experimentado coas novas tecnoloxías, e en concreto dedicámoslle tamén tempo á ROBÓTICA co noso robot DOC, regalo que nos deixaron os Reis Magos para a aula, pois cando o vimos por primeira vez na maleta de xogos viaxeiros da Biblioteca, gustounos tanto que decidimos pedirlle un na nosa carta. Así pois, xogando con el interiorizamos diferentes contidos ao mesmo tempo que desenvolvemos a nosa estruturación e organización espacial dun xeito lúdico. 

 

         

 

 

 

Como xa sabedes, tamén seguimos desenvolvendo o Proxecto Documental Integrado (PDI), o cal xira en torno á “gastronomía: cultura, saúde e sustentabilidade”. En relación a isto durante o segundo trimestre estivemos afondando nas receitas. Así pois, para iso comezamos mirando libros de receitas, en concreto un que nos prestou a familia de Elisa e outro a familia de Celia. Neses receitarios vimos unha gran cantidade de receitas e a partires diso, observamos que nese tipo de textos sempre se mantén unha estrutura moi similar (Título, Ingredientes, e Elaboración).  

 

Aproveitando estes exemplos decidimos elaborar un RECEITARIO VIAXEIRO, no que ir incorporando as receitas levadas a cabo na aula nos diferentes talleres de cociña que fixemos, así como tamén as receitas que cada familia decidise facer nas casas e engadila a dito receitario para compartir con todos/as. 

 

 

A primeira receita que incorporamos ao receitario viaxeiro foi a duns riquísimos boliños de pan con chocolate que elaboramos entre todos/as na aula.

 

              

 

              

 

 

 

Por outra parte, tamén reflexionamos acerca da necesidade de aportar o noso gran de area ao coidado do medio ambiente, concretamente en relación á necesidade de contribuír á redución da cantidade de plástico que xeramos diariamente. Así pois observamos que día a día, concretamente á hora das merendas cada un de nós tira diversos plásticos ao colector correspondente. A partires desta observación, falamos se sería posible darlle algún outro uso a eses plásticos, e decidimos aproveitar os botes de bebibles para poder facer con eles unhas maracas. 

 

        

 

 

Neste segundo trimestre, tampouco nos esquecemos de festexar os aniversarios. E co mesmo ritual que iniciamos no 1º trimestre ,“celebración da vida” ao estilo Montessori, fomos sendo partícipes dos cambios de cada un/unha dos/as nenos/as que cumpriron un ano máis.

 

        

        

 

 

Tamén conmemoramos datas importantes, como por exemplo o día da PAZ e o día do AMOR, a partires das cales nos recordamos a importancia de certos valores no noso día a día para vivir en harmonía e demostrándonos o importantes que somos os/as uns/unhas para aos outros/as.

 

         

 

 

            

 

 

 

Outros días que tamén o pasamos en grande foron aqueles nos que compartimos momentos co resto das escolas do CRA. 

 

Así pois, unha desas xuntanzas, foi a celebración do Entroido na escola de Capela, na que pasamos unha xornada moi animada, cantando, recorrendo a aldea, e posteriormente degustando doces típicos aportados polas familias. 

 

       

 

 

 

 E outra das xuntanzas, foi a saída que tivemos ao Auditorio de Santiago de Compostela para participar no concerto didáctico “De aquí para alá”, interpretado por Lydia Botana, no que o pasamos xenial!

 

 

         

 

 

Como podedes ver, ao longo do 2º trimestre pasamos moi bos momentos xuntos. Esperamos e desexamos retomar a normalidade canto antes para poder seguir compartindo moitos outros momentos.

 

 

Todo vai saír ben, e pronto volveremos a vernos!

 

PERÍODO DE ALARMA SANITARIA DEBIDO AO CORONAVIRUS. NÓS QUEDAMOS NA CASA.

 

Estimadas familias,

Como todos/as sabemos durante estas semanas estamos a vivir unha situación extraordinaria e completamente fora do común debido á propagación e ao contaxio do Coronavirus.

 Como consecuencia disto, unha das medidas que se nos pide que cumpramos (entre moitas outras), e a de  permanecer nas nosas casas.

Sen dúbida, sabemos que serán unhas semanas complexas para todos/as, en especial para os máis cativos/as, polo que para facer máis ameno o confinamento, e asegurar de igual forma a  continuidade do proceso de aprendizaxe do alumnado fóra do ámbito escolar, o profesorado trataremos de poñer ao voso alcance unha serie de propostas e de recursos para que poidades desenvolver e empregar nas vosas casas. Ditas propostas e recursos farémosvolas chegar facendo uso dos diversos medios tecnolóxicos que temos ao noso dispor, e compartirémolas entre outras na páxina web, na aula virtual, ou nos grupos de whatsapp.   

 

QUÉ É O CORONAVIRUS?

A través deste vídeo explicativo, os nenos/as coñecerán máis cousas acerca deste virus, das súas consecuencias e das medidas que temos que adoptar para evitar o seu contaxio.

 

                                             

 

 

Outro dos recursos fundamentais cos que contamos para transmitirlles aos nenos/as moitas ensinanzas son os CONTOS, e neste caso, o Colexio Oficial da Psicoloxía de Madrid, en colaboración coa Editorial Sentir, elaborou o conto Rosa contra el virus. Trátase dun conto para explicar o brote do Coronavirus Covid-19 e outros posibles virus  a nenos/as entre 4 e 10 anos. Dita publicación inclúe ademais un conxunto de recomendacións para que os proxenitores falen cos seus fillos/as desta crise sanitaria da forma correcta e adaptada a cada idade e momento.

 

                                       

 

 

Dende a Escola de Pazo, levamos a cabo unha recompilación dunha serie de propostas de carácter lúdico para que poidades poñer en práctica durante estas semanas nas vosas casas, e repasar e reforzar deste xeito diversos contidos traballados diariamente na aula. Ditas propostas están dirixidas concretamente para o alumnado de Educación Infantil, e trátanse en todo momento de exemplos, aos que vós podedes engadir multitude de outras iniciativas que se vos ocorran.

 

                                   

 

 

 En canto aos RECURSOS NA REDE, tamén vos deixamos unha serie de enlaces a distintas webs con actividades interactivas que vos poden servir durante este tempo que pasemos nas casas.

 

 

Por outra parte nas páxinas webs  https://happylearning.tv/  e https://smileandlearn.com/tamén encontraredes multitude de vídeos educativos así como xogos interactivos relacionados con diversas temáticas(ciencias naturais, historia, matemáticas, curiosidades, educación medioambiental, inglés, música…).

 

Moitos outros recursos ou actividades que vaiamos atopando, así como tamén os que os/as mestres/as especialistas recaden irémolos/as compartindo convosco a través dos distintos medios tecnolóxicos citados anteriormente.

 

Mentres tanto un saúdo e MOITO ÁNIMO a todos/as! 

 

RESUMO DO PRIMEIRO TRIMESTRE NA AULA DE INFANTIL DE PAZO

 

Estimadas familias,

O primeiro trimestre xa rematou. Foron uns meses moi intensos repletos de bos momentos, diversas anécdotas, experiencias, aprendizaxes, novos amigos e amigas, e sobre todo moitas risas, aínda que tamén algunha que outra bágoa.

Para facervos partícipes do que vivimos, e así achegarvos, un pouquiño máis, ao noso día a día, gustaríanos compartir convosco algúns deses intres.

 

Aínda que a día de hoxe xa nos coñecemos todos e todas, imos aproveitar para presentarnos e darvos a benvida, unha vez máis, á nosa aula, da que tamén formades parte indispensable.

 

 

     

 

 

Unha vez superado o mes de setembro, seguimos avanzando no trimestre, adquirindo pouco a pouco novos logros e obxectivos.

 

Así pois os nenos/as de 3 anos, coa axuda dos compañeiros/as de 4 anos iniciámonos na LECTOESCRITURA e descubrimos así ás nosas amigas as LETRAS, ás que fomos coñecendo, non só pola súa grafía, senón tamén polo seu son. Partindo sempre pois, de palabras significativas para todos/as nós como son por exemplo o noso propio nome e o nome dos nosos/as familiares e amigos/as máis próximos; os días da semana; os carteis da aula; ou os títulos dos contos...; levamos a cabo numerosas actividades entre as cales destacamos por exemplo: recoñecer a letra do inicio e a do final, identificar as letras iguais, contar o número de letras, representar a súa grafía, identificar as letras polo seu son, compoñer outras palabras partindo das letras iniciais... 

 

 

        

 

 

     

 

     

 

 

 Outra actividade que espertou unha gran motivación e interese foi o “LIBRO DOS NOMES”, o cal está pasando por todas as casas para poder traballar en familia.  

 

 

 

  

 

 

 

A través do método ABN (Método Aberto Baseado en Números), os nenos/as de 3 comezamos a introducirnos nos conceptos lóxico-matemáticos (serie numérica, conteo, correspondencia entre grafía-cantidade, cuantificadores, equivalencias...), e os nenos/as de 4 anos seguimos avanzando e experimentando, a través de numerosas actividades manipulativas. 

 

     

 

 

 

     

 

 

      

 

       

  

 

 

Ademais das letras e dos números, tamén traballamos os TRAZOS. Así pois, semanalmente desenvolvemos un taller de grafomotricidade creativa. Neste primeiro trimestre coñecemos os trazos verticais e horizontais, e a partir da súa representación decatámonos de que son os trazos que están presentes en case todas as letras que escribimos (maiúsculas). Á hora de representalos empregamos diferentes soportes como por exemplo a lousa, papel ou o chan da aula, así como tamén diferentes materiais como por exemplo pinceis, coches, rotuladores, témperas... 

 

    

 

   

 

     

 

 

 

     

 

 

       

 

 

 

De xeito paralelo a todo o traballado e comentado ata o momento, tamén nos iniciamos no noso Proxecto Documental Integrado (PDI), que como xa sabedes, este ano xira en torno á “gastronomía: cultura, saúde e sustentabilidade”. Así pois, durante estes primeiros meses comezamos a buscar información e a investigar cousas acerca dos alimentos: que tipos de alimentos coñecemos, de onde proceden, a importancia que teñen na nosa saúde, en especial a froita e os vexetais...  

 

Aproveitando todo isto tamén nos puxemos mans á obra e levamos a cabo algún que outro taller de cociña, no que entre outras cousas, fixemos zume de uva e unha macedonia de froitas que degustamos encantados/as.

 

       

 

 

 

      

 

       

 

       

 

 

        

 

 

 

 Outra actividade que levamos a cabo durante este primeiro trimestre, a cal tamén nos gustou moito e nos fixo moita ilusión, foi a dinámica da “Maleta”. Cada un de nós levou dita maleta á súa casa e despois de ler as instrucións que ían dentro coa familia, ao día seguinte levámola á aula con 3 cousas nosas que nos gustaban ou nos identificaban (por exemplo unha foto da nosa familia, o noso xoguete favorito, algún obxecto de cando eramos bebés...). Con dita actividade descubrimos moitas cousas acerca dos gustos e intereses de cada un/a, así como experiencias persoais e recordos, o que permitiu que nos coñezamos máis e que crearamos un maior vínculo de amizade. 

 

 

 

      

 

 

Como podedes observar, non paramos de facer cousas! Pero non todo iba ser traballar! Tamén houbo momentos de festexo. Así pois, non nos esquecemos de celebrar os aniversarios dos nenos/as que cumpriron un ano máis, tanto na nosa aula como na dos nenos/as de 5 anos e dos de primaria. E para iso, levamos a cabo o ritual da “celebración da vida”, ao estilo Montessori.

 

Esta celebración gústanos moito, pois fai que nos sintamos protagonistas no noso día e que poidamos compartir cos nosos/as compañeiros/as momentos moi significativos da nosa vida, sendo conscientes ademais de todos os cambios que se produciron dende o momento do noso nacemento ata o día de hoxe.  

 

    

 

 

 

Pero sen dúbida, os días que tamén o pasamos en grande foron aqueles nos que compartimos e levamos a cabo actividades en conxunto co resto das escolas do CRA. 

 

Así pois, a primeira xuntanza, foi a celebración do Magosto na escola de Abuín, na que pasamos unha xornada moi animada levando a cabo diversos xogos en común e posteriormente unha degustación de castañas asadas e unha merendola con cousas aportadas polas familias.

 

     

 

 

Outra das actividades a nivel do CRA, foi a xornada de convivencia na Biblioteca de Asados, durante a cal desenvolvemos 4 talleres polos que iamos rotando: un de música no que cantamos e bailamos; outro no que elaboramos un balero para encestar un tapón con materiais de reciclaxe; outro no que preparamos unhas ricas brochetas de froitas que degustamos a continuación para repoñer enerxías; e por último un no que estampamos diferentes vexetais sobre papel corrido. Como última actividade da xornada, gozamos dun contacontos na biblioteca, onde vimos a representación nun teatriño do conto “A mellor sopa do mundo” .

 

    

 

     

 

 

 

E xa para cerrar o trimestre, o penúltimo día de clase, desprazámonos ao auditorio de Rianxo para celebrar o festival de Nadal. Durante a mañá gozamos coas diferentes actuacións das escolas do CRA, as cales nos sorprenderon con bailes, cancións, e ata un contacontos. Pero indiscutiblemente, o que máis ilusión nos facía, era recibir a visita dos tres Reis Magos, que coa axuda dos seus paxes recolleron as nosas cartas, nas que previamente con moito agarimo lles transmitimos os nosos desexos de cara ao novo ano que agardamos con entusiasmo. 

 

 

 

 

Isto non fixo máis que comezar! Á volta esperamos seguir compartindo aventuras e bos momentos. Pois, xuntos é moito mellor!

 

 

 

 

BO NADAL E FELIZ ANO NOVO PARA TODOS/AS

 

 

Distribuir contido