Mirón

Esta semana realizamos novas actividades que gustaron moito entre os nenos/as. Despois de explicar en grande grupo cada unha delas, comezamos introducindo os transvases sólidos nos que había que cambiar o contido dun recipiente a outro procurando que non caese nada por fóra. Utilizamos culleres, pinzas e embudes. Tamén realizamos series con pompóns e pinzas, traballando así a psicomotricidade fina e a lóxica-matemática.

Os máis maiores, ademais, tiñan un reto por diante, conseguir facer varios quebracabezas de entre 100 e 150 pezas. Resultou ser unha actividade apaixonante e moi motivadora. O mellor de todo foi a alegría que causou o resultado final, que alcanzaron entre eles, sen intervención ningunha por parte das mestras. Deste xeito, comprobaron que co traballo en grupo conséguese alcanzar os obxectivos. Neste caso, gozar do quebracabezas totalmente armado.

Nesta semana divertímonos na mesa de luz con algúns xogos novos. Os máis maiores tiñan que escribir o nome dos animais salvaxes que elixiran, primeiro asociando a foto coa etiqueta do seu nome e logo escribíndoo eles mesmos con rotuladores de cores. Despois, asociando a foto coa etiqueta do seu nome, pero escribindo nesta ocasión con culleres de cores que contiñan as letras do abecedario. Resultou unha actividade divertida, pois tiña a súa gracia buscar cada letra entre tantas culleres! Ademais, para os máis atrevidos tamén había sopas de letras. Era moi difícil atopar nomes de animais entre tantas letras!

Os máis pequenos realizaron actividades co conto "Unha eiruga moi larpeira" (Eric Carle) nas que debían ordenar as partes da eiruga de tal xeito que formasen eirugas grandes, pequenas... Asimesmo, en posteriores ocasións, realizaron actividades de asociación. Debían colocar cada elemento no seu bote correspondente atendendo á súa cor. Primeiro, empregando os dedos e despois unhas pinzas (motricidade fina e precisión). Hai que agradecer, neste caso, a colaboración da mestra María, de música, quen nos trouxo as eirugas, os botes e as pezas de cores para realizar estas actividades tan entretidas.

As mestras procuramos non intervir no caso de producirse algunha equivocación, pois é moi interesante (e enriquecedor) observar como eles mesmos se percatan do erro e o corrixen.