Visitas e excursións

O venres día 9 de xuño, visitounos Víctor de Laxe. Ademais, Víctor é un músico profesional namorado do rock, e por iso aceptou a invitación que lle fixemos: facer un percorrido pola historia deste estilo musical. Foi así como, a través de vídeos e de pequenos fragmentos musicais que tocaba o propio Víctor (coa guitarra, o baixo ou a harmónica) puidemos ver e escoitar como evolucionou o rock desde os seus comezos ata agora. E incluso nos amosou como se baila o rock and roll, aínda que aquí o público amosouse un pouquiño tímido... Tamén cantamos con Víctor as cancións que nos propuxo ter preparadas ("La plaga" e "Rock del primitivo"), aínda que ao final moitas das nenas e nenos conseguiron que o noso invitado tocara os acordes de cancións que coñecían moito mellor. E rematamos baixando ao patio para montar unha curta batukada, xa que o tempo non deu para máis. Moitas grazas Víctor!!! Para poder ver as fotos de ese día preme AQUÍ.

O martes día 23 de maio, fumos todos (excepto os compañeiros de 5º e 6º que están de excursión na Ribeira Sacra), a un Musical para toda a familia na Aula de Cultura de A Picota para ver a obra teatral do grupo MALASOMBRA titulada "OS ROCKENSTEIN".Tamén asistiu o alumnado dos centros do C.E.I.P. de Pino de Val e o C.P.I. da Picota. Para ver máis información sobre o musical ou sobre o grupo teatral, picade nos nomes ou nas fotos. Para ver tódalas fotos pica AQUÍ.

O martes día 9 de maio, fixemos unha excursión, só pola mañá, para facer unha visita guiada ao CASTELO DE VIMIANZO (conserva partes do S.XIII, aínda que a maioría pertencen aos S.XIV e XV), e para visitar posteriormente AS TORRES DO ALLO, mediante unha teatralización do Grupo OS QUINQUILLÁNS. A primeira hora recorrimos tódalas dependencias (na actualidade acolle unha mostra permanente de artesanía popular) do Castelo de Vimianzo, tamén coñecido como Torres de Martelo, ás que nos ía levando e explicando o guía. Logo paseamos cos mestres polas distintas salas do Castelo e mesmo subimos á Torre do Homenaxe e paseamos polas almeas do castelo, onde nos esperaba unha fantástica vista. Máis tarde fumos Ás Torres do Allo (Concello de Zas), onde nos recibiron cunha teatralización do Grupo Os Quinquilláns, que nos serviu de guía por un dos pazos máis antigos de Galicia, construído na 1ª metade do S.XVI polo Fidalgo Gómez de Rioboo Vilardefrancos. Ao remate demos un pequeno paseo polos arredores do pazo ata chegar de volta a xantar ao colexio. Tamén ides ver as fotos dunha noticia da Voz de Galicia (edición Carballo), feitas polo fotógrafo José Manuel Casal (pica AQUÍ).

Fotos Castelo de Vimianzo AQUÍ. Fotos das Torres do Allo AQUÍ.

A través do Consorcio Editorial Galego, visitou o noso centro o xoves día 4 de maio, "O BARDO ABELARDO", na persoa de Servando Barreiro, que nos amosou a súa proposta didáctica, xunto co seu repertorio de cantigas tradicionais acompañado da súa concertina. Tamén rendiu un homenaxe a Carlos Casares, no ano que se lle adica o Día Das Letras Galegas 2017, a través dun percorrido audiovisual pola vida e obra do autor. Tamén nos deleitou con contos sobre as obra infantiles máis coñecidas de Carlos Casares como "As laranxas máis laranxas de tódalas laranxas" ou "A galiña azul". Escoitamos a historia de Leoncio o inventor da Bomba da Felicidade e outras historias. Se queredes ver as fotos e os vídeos de ese día, picade AQUÍ.

Tivemos a gran sorte de contar no centro coa presencia de JOAQUÍN CASTAÑO, o venres día 21 de abril en xornada de mañá, para facer cos nenos sesións de mindfulness e xogos nas respectivas aulas. Antes do recreo fixo unha sesión con 1º e 2º de primaria e despois con 3º e 4º de primaria. Despois do recreo tocoulles o turno a Infantil e 5º e 6º de primaria. Tamén fixemos unha sesión de mindfulness no comedor do centro antes de que os nenos comezaran a xantar. Foi unha mañá fantática e diferente. Joaquín xantou con nós, degustando así os manxares que elaboran as nosas cociñeiras día tras día,  e pola tarde sumouse ás actividades que tiñamos previstas para a celebración do Día do Libro. Pica nas fotos para ver tódalas fotos de ese día. Se queres ver vídeos pica AQUÍ.

O xoves día 16 de marzo dende as 12:20, tivemos a oportunidade de poder contar no colexio coa Asociación ÁLCER, para falarnos das enfermidades do Ril, para os alumnos de 5º e 6º de educación primaria. Se queredes saber máis sobre esta Asociación e informarvos sobre este xesto tan bondadoso, podedes visitar a páxina web de ALCER premendo na imaxe.

O martes día 21 de febreiro fomos de excursión todo o colexio a Coruña. Os nenos de Ed. Infantil viron o AQUARIUM, e os alumnos de Primaria asistiron ao PALACIO DA ÓPERA DE CORUÑA, para ver "HISTORIAS DO MAR" representado pola ORQUESTA SINFÓNICA DE GALICIA e coa narración de KIKO CADAVAL. Logo fomos xantar ao Monte de San Pedro (pica para ver máis fotos), para despois de xogar un rato voltar para o centro. Para ver vídeos poca AQUÍ. E para ter máis información visita o nosoi blogue da Biblioteca ou pica AQUÍ.

O venres día 20 de xaneiro de 2017, fumos todo o colexio de excursión á Coruña para visitar o MACUF.Mentres os alumnos de 3º, 4º, 5º e 6º facían unha visita guiada ás exposicións de Rubén Ramos Balsa "El doble de la mitad" e de Juan Luis Moraza "Trabajo absoluto", os máis pequenos do cole, os de E.I. e 1º e 2º, facian un obradoiro sobre o medo os cales comerían posteriormente convertidos en chocolate. Despois fumos xantar ao Monte de San Pedro e os nenos disfrutaron coas vistas e co fantástico día que fixo. Preme na foto para ver todas as de ese día.

O martes día 13 de decembro de 2016, fomos á Aula de Cultura da Picota para ver a actuación do grupo de teatro FACE 2 FACE, que levou a cabo dúas sesións de contacontos en inglés: un para o alumnado de ed. infantil e 1º e 2º cursos de ed. primaria titulada "JUNGLE FEVER", e outra para os cursos de 3º, 4º, 5º e 6º de ed. primaria co título de "CINDERELLA". Foron dúas sesións e mentras uns vían o contacontos os outros visionaban unha serie de curtas sobre o espacio, e viceversa. Esta actividade fíxose co colexio de Pino de Val.

Para celebrar este día 22 de novembro Día de Santa Cecilia, patroa dos músicos, poetas e cegos, e dada a temática do noso proxecto integrado de centro de este ano sobre a música, tivemos a sorte de poder contar no centro coa actuación de LUIS SOTO AMIL, frautista, membro fundador do Taller Atántico Contemporáneo e parte da plantilla da REAL FILHARMONÍA DE GALICIA, que nos deleitou coa súa presenza e algunha que outra actuación. Para ver todas as fotos pica AQUÍ.

O mércores día 9 de novembro fixemos unha saída didáctica con todos os alumnos de educación primaria á Coruña para asistir ás 11 horas, ao TEATRO COLÓN para ver "AS CATRO ESTACIÓNS" de Vivaldi a través de Danza Contemporánea da man dos coreógrafos Iker Gómez e Kenneth Tindall, a través do Centro Coreográfico Galego. Primavera, verán, outono e inverno, reflectidas sobre o escenario nas distintas variacións interpretadas por un elenco de 8 bailaríns e bailarinas. De 12:15 ás 13 horas demos un paseo pola cidade herculina ata o Palacio da Ópera e de 13 a 14 horas fixemos unha visita guiada ao Palacio da Ópera sede da Orquestra Sinfónica de Galicia. Vimos diferentes salas e estivemos no escenario do Auditorio Principal, dotado de extraordinarias condicións acústicas e técnicas, polo que pasaron grandes nomes do mundo do espectáculo.

O luns día 24 de outubro, en horario de 10 a 12 horas na Biblioteca do centro, fixemos 2 Obradoiros de Percusión con Material de Refugallo a cargo de José Troncoso Barros, celebrando así o "Día da Biblioteca". Un obradoiro para os pequenos de infantil e 1º e 2º de primaria, e outro para os maiores de 3º, 4º, 5º e 6º de primaria. Estes obradoiros estaban baseados en ritmos interpretados con instrumentos musicais feitos con obxectos de refugallo do tipo de botellas de plástico, latas de conservas, globos, ou mesmo botes de pintura. Picando na imaxe veredes as fotos que fixemos esa mañá.

Tamén podedes ver un vídeo gravado noutra escola, pero onde se pode ver o tipo de actividade que fixemos esa mañá. Pica no enlace.

https://youtu.be/MOA4iG4HRoY

O venres día 13 de outubro visitounos Emilio, acompañado de Irene, que é a presidenta da Asociación de Amas de casa de San Cosme. Emilio é músico e presentounos varios instrumentos musicais, para animarnos a asistir ás clases que a Asociación oferta para este curso: acordeón, frauta, pandeireta, tambor, gaita,...Picando nas imaxes, veredes algunhas das fotos de ese día.

Asistimos na Aula de Cultura da Picota o día 26 de maio de 2016 ás funcións da Compañía de Teatro FACE 2 FACE para escolares en Inglés. Foron dúas actuacións, unha dirixida para os nenos de infantil e 1º ciclo e outra para os alumnos do 2º e 3º ciclo.

Picando nas fotos poderedes ver tódalas fotos das dúas actuacións.

E neste enlace tedes toda a informaión necesaria:

http://bibliovictorsaenz.blogspot.com.es/2016/05/teatro-en-ingles.html

A Consellería de Política Social ofrece a posibilidade de que a xuventude galega empregue o seu tempo libre estival participando en actividades de educación non formal moi diversas: de carácter cultural, ambiental, deportivo, de tempo libre, de voluntariado... que sirvan non só para divertirse, senón tamén para o seu enriquecemento persoal e vital.

A Dirección Xeral de Xuventude, Participación e Voluntariado pretende facer realidade este obxectivo a través da Campaña de verán 2016. Para máis informaión pica no enlace ou pásate polo colexio ou o Concello que che corresponda.